‘O Loo Matuā Galue le Afioga a le Atua’
1 Na tusi le aposetolo o Paulo e faapea: “O loo ola le afioga a le Atua, o loo matuā galue foi.” (Epe. 4:12) O le ā le uiga o lana faamatalaga? O le afioga a le Atua, po o le feʻau, o loo maua i le Tusi Paia e mafai ona taaʻina malosi ai olaga o tagata. O le atamai lea e i le Tusi Paia o loo iai le malosi e suia ai le olaga o se tasi ina ia lelei. O faamāfanafanaga ma le faamoemoe o loo iai ua tosina atu ai tagata i Lē Foaʻi Ola, o Ieova le Atua. O le feʻau o loo iai e mafai ona taʻitaʻia ai ē lotofaamaoni i le ala i le ola e faavavau. Ae peitaʻi, ina ia iloa nei āuga, e tatau ona tatou faaaogā le Tusi Paia pe a tatou molimau atu i isi.
2 Faitau se Mau i Avanoa Uma: E foliga mai e toʻatele le ʻautalaʻi ua fai ma masani le lē faaaogāina o le Tusi Paia i le talaʻiga mai i lea fale i lea fale. Pe e faapena oe? Talu ai e toʻatele tagata e foliga mai e lē lava le taimi e fai ai se talanoaga umi, atonu la ua fai ai ma au masani le na ona ofo o se lomiga pe na ona toe faaupu atu foʻi o se mau. E matou te faalaeiauina le ʻautalaʻi ina ia matuā taumafai e faitau a itiiti mai o se fuaiupu se tasi mai le Tusi Paia pe a molioo atu le tala lelei, o le faia faapea, e mafai ai ona iloa e le tagata, o la tatou feʻau o loo aumai moni i le Afioga a le Atua.
3 E ui lava e toʻaitiiti tagata o loo fai ma masani le faitauina o le Tusi Paia, ae e toʻatele lava o loo latou faaaloalogia pea. E oo lava i tagata o loo pisi, e masani ona faataga se taimi puupuu e faalogo ai i se feʻau a o faitau tuusaʻo mai i le Afioga a le Atua. Pe afai e faitauina ma le māfana ma faamatala puupuu se mau talafeagai, o le a iai se aafiaga lelei o le mana o le afioga a Ieova i lē o loo faalogologo mai. Ae e faapefea ona e faafesootaʻi atu au upu tomua i le faitauina o se fuaiupu mai le Tusi Paia?
4 Faataʻitaʻi le Auala Lenei i le Galuega Mekasini: E faaaogā ma le uigā e se ovasia femalagaaʻi le Tusi Paia a o auai i le galuega mekasini. E na te aveina se Tusi Paia laʻitiiti i le taga o lona ofu. Pe a uma ona ofo atu mekasini ma faatomua puupuu se mataupu, ona ia tatala loa lea o le Tusi Paia e aunoa ma le faatuai ma faitau se fuaiupu e fesootaʻi ma le mataupu. E mafai ona faia lenei mea i le na ona fesili atu e faapea, “O le ā sou manatu i lenei folafolaga faalaeiau?” ona faaauau lea i le faitauina o se mau ua filifilia.
5 Ia avea ma ou sini le faitauina o se fuaiupu se tasi po o se lua mai le Tusi Paia i tagata uma e faalogologo mai i a te oe. O lona mana e uunaʻia ai, e mafai ona tatalaina ai le auala mo le toʻatele o tagata e tosina atu i le Atua.—Ioa. 6:44.