Ia Mataalia i le Saʻilia o Tagata Logonoa i la Outou Oganuu
1 Ua faasalafa atu e Ieova le valaaulia e faapea: “Ina sau ia; o lē . . . manao i ai, ina ave fua ia le vai o le ola.” (Faaa. 22:17) O loo iai faatasi ma i latou o loo tali mai i lenei valaau se aofaʻiga faatuputeleina o tagata logonoa. O le iʻuga, i le faagasologa o le 13 tausaga ua mavae, ua faavaeina ai i le lālā a le Iunaite Setete ia faapotopotoga e 27 ma vaega e 43 e faaaogā ai le gagana faagūgū, ma e tele foʻi isi vaega ua faavaeina i isi lālā.
2 O loo taulaʻi atu taumafaiga uma o le talaʻiga a faapotopotoga ma vaega o loo faaaogāina le gagana faagūgū, i le faafesootaʻia o tagata logonoa ma tagata e faalēlelei le faalogo i a latou oganuu tofia. Ae ui i lea, e toʻatele tagata faapena i isi vaipanoa o ē e tatau ona saʻilia ma avatu i ai se molimau.
3 E Mafai Faapefea Ona E Fesoasoani? A o e iai i nofoaga faitele, po o e mātauina ai ni tagata o loo faaaogāina le gagana faagūgū? Po o e iloa se tasi i lou fale faigaluega po o le aʻoga e iai se tagata o le aiga e logonoa? Ia mataalia i le saʻilia o i latou e logonoa a o e auai i au galuega masani. Ae faapefea ona e faamautinoa o le a tuu atu iā i latou se molimau e uiga i le Malo?
4 Avatuina o se Molimau: Pe afai e iai se faapotopotoga po o se vaega e faaaogāina le gagana faagūgū i la outou oganuu, faailoa atu iā i latou le nofoaga o loo iai le tagata logonoa. E toʻatele tagata logonoa ua vave ona agaʻigaʻi i luma i le aʻoaʻoina o le upu moni pe afai e mafai ona latou auaufaatasi ma Molimau logonoa i sauniga a le faapotopotoga ia o loo faia i la latou gagana faagūgū. O le failautusi o la outou faapotopotoga e tatau ona tuu atu i faapotopotoga po o vaega o loo faaaogāina le gagana faagūgū ia faamatalaga e uiga i tagata logonoa uma o i la outou oganuu.
5 Ae faapefea pe afai e leai se tasi e latalata ane e avatua se fesoasoani faaleagaga i tagata logonoa i lo outou vaipanoa? E mafai faapefea ona e fesoasoani? Aiseā e te lē toe asiasi atu ai ma talanoa atu i so o se tasi o le aiga e lelei le faalogo? Atonu e mafai ona latou fesoasoani iā te oe e talanoa atu i le tagata logonoa. Afai e malamalama le tagata i le gagana faagūgū lea e faaaogā i lo outou atunuu, ia fesili mo le igoa aloaʻia o lena gagana ma faailoa atu i le failautusi o la outou faapotopotoga. E mafai e le failautusi ona siaki i le ofisa o le lālā pe e iai ni vitiō o maua o lena gagana faagūgū. Afai e iai, e mafai ona e ofo atu e faaali se vitiō o le gagana faagūgū ina ia faagaee ai le fiafia o le tagata logonoa. Ua oo lava ina aʻoaʻoina e nisi tagata talaʻi le gagana faagūgū a la latou vaipanoa ina ia mafai ai ona oo atu i tagata logonoa ma maua ni iʻuga lelei. (Galu. 16:9, 10) Ua mafai ona maua le vitiō o le tusi o Le Poto ma le polosiua o le Manaomia i le gagana faagūgū faa-Amerika, ma ua saunia na vitiō i nisi o gagana faagūgū o loo faaaogāina i isi atunuu. O le faia o suʻesuʻega faale-Tusi Paia e faaaogā ai nei mea faigaluega ua maua ai le tele o iʻuga mautinoa.
6 O le mataalia i le saʻilia o tagata logonoa i lou vaipanoa, ua mafai ai ona e tuuina atu iā i latou le avanoa e ave fua ai le vai o le ola.—Mata. 10:11.