Pe Mafai Ona E Faaavanoaina Oe?
1 I le tausaga e 778 T.L.M., na tupu ai se mea uigaese. I se faaaliga, ua iloa ai e le perofeta o Isaia “le Alii [o Ieova], o afio i le nofoālii silisili ma le maualuga.” Ona faalogo atu lea o Isaia i serafi o valaau ina ia iloa uma le mamalu o Ieova, ua faapea atu: “E paia, e paia, e paia Ieova o ʻau.” Maʻeu se vaaiga ina mataʻutia! I lena tulaga, na lāgā ai e Ieova se fesili ua avea ma luʻi e faapea: “O ai ea ou te auina atu? o ai foi e alu atu mo i matou?” E leai se faamatalaga ua aumaia e tusa ai ma le tulaga o le tofiga pe o le ā foʻi se mea o le a maua e le tagata lea o loo tauofo. E ui i lea, na tali atu Isaia e aunoa ma le faatalatū, e faapea: “O aʻu lenei, ina auina atu aʻu.”—Isa. 6:1, 3, 8.
2 O lenei agaga o le lotomalie e faia so o se mea e finagalo i ai Ieova, ua iloga ai ona tagata. (Sala. 110:3) O lea ua alu atu nei se valaau faapitoa iā i latou o ē e mafai ona faaavanoaina i latou lava. Po ua e nofosauni e tali atu ma le agaga lotomalie e pei o Isaia?
3 O loo iai se manaʻoga faifai pea mo uso e auauna i Peteli. O lenei valaau e mo i latou o loo iai se faanaunauga malosi e faamuamua manaʻoga o le Malo ma ia lotomalie e faia so o se mea e manaʻomia e lagolagoina ai le galuega talaʻi i le lalolagi aoao. (Mata. 6:33) O le mea moni, o le auauna e avea o se sui o le aiga Peteli ua avatu ai i se tasi se avanoa faapitoa e auauna ai iā Ieova i se uiga loto atoa. E faapefea?
4 Le Galuega o Loo Faia i Peteli: Seʻi manatu i mea uma ua faia i maota e tolu o Peteli o loo iai i le Iunaite Setete, i Brooklyn, i Patterson, ma Wallkill, i Niu Ioka. O le 5,730 o uso ma tuafāfine o loo faia aʻe ai le aiga Peteli i nei nofoaga e tolu, ua maua le faaeaga o le galulue vavalalata lea i le lagolagoina o le auauna faamaoni ma le mafaufau ma lana Vaega Pule, i le saunia o Tusi Paia ma lomiga faale-Tusi Paia mo le faaaogāina i le fanua i le lalolagi aoao ma i le faia ai o suʻesuʻega totino. (Mata. 24:45) Mo se faaaʻoaʻoga, i le tausaga faaleauaunaga lea ua mavae, e 24,364,670 tusi, 39,813,464 tamaʻitusi ma polosiua, e 270,528,000 mekasini, ma le 1,271,041 kaseti puʻeleo na saunia ma aauina atu ona o taumafaiga tuufaatasi a le aiga Peteli i le Iunaite Setete. Ua faia foʻi se taumafaiga maoaʻe i le faia o saʻiliʻiliga ma le filifilia o “upu e faafiafia aʻi; o mea ua tusia foi e tonu ia, o upu moni lava” mo nei lomiga. (Fai. 12:9, 10) Ua saunia foʻi taʻiala mo le ʻaufaaliliu e sili atu i le 1,900 i le lalolagi aoao o ē o loo fesoasoani e saunia lomiga i gagana e silia ma le 300. E tele mea ua faia ina ia faatonutonu ai le galuega ua faataunuuina i lālā e 111 i le lalolagi aoao, e aofia ai le sili atu i le 11,500 faapotopotoga i le Iunaite Setete. Ua tuuina atu foʻi le fesoasoani i lālā o loo aafia i le sauniunia ma le fauina o isi maota faaopoopo o le aiga Peteli, ma Maota mo Fonotaga ma le 15,248 Maota o le Malo o loo manaʻomia i le taimi nei i atunuu e lē o lava ni alamanuia. E faitau selau le ʻautauofo o loo manaʻomia e vaaia le lolomiina ma le felaʻuaʻia o lomiga, le faamamāina, le faaleleia ma le tausiga o mea, le saunia o mea taumafa, faia o faatauga, le tausia o le soifua mālōlōina, ma le tele lava o isi galuega i Peteli. O le tele o na galuega o loo faia i se fua itiiti i isi lālā, e aofia ai le lālā i Samoa.
5 O le faataunuuina o nei galuega uma, o se galuega telē ae e faamalieina ai faaleagaga. E maua le tele o le olioli i le iloaina o loo faaaogāina lo tatou malosi uma e lagolagoina ai le galuega talaʻi ma le aʻoaʻo atu. O le auaunaga i Peteli ua fesoasoani iā i tatou e matuā malamalama lelei ai i auʻiliʻiliga uma o le faalapotopotoga a Ieova. Ua faamanatu mai iā i tatou le faalaeiauina e le faisalamo o le nuu o Isaraelu ina ia matuā iloa lelei le nofoaga autū o le pulega faatiokarate i le lalolagi i o latou aso.—Sala. 48:12, 13.
6 Faamanuiaga o le Auaunaga i Peteli: O ā lagona o i latou o loo auauna i Peteli e uiga i o latou faaeaga o le auaunaga? Mātau faamatalaga nei mai le ʻautalavou faapea ma ē matutua o le aiga Peteli. Ua faapea mai se tasi o le aiga Peteli o lē ua tolu tausaga o olioli i le auaunaga i Peteli: “O le iai i Peteli, ua faamalosia ai laʻu faiā ma Ieova. O le umi ona ou auauna iinei ma o le faateleina o loʻu iloa i le auala o loo faagaoioia ai Peteli, o le tele foʻi lena o le aʻoaʻoina ai o aʻu e faatatau i uiga o Ieova. O le auaunaga foʻi i Peteli ua pupula ai oʻu mata ma iloa ai o loo faaaogāina e Ieova tagata—ituaiga uma o tagata. Ma e lē tau manaʻomia ona e lelei atoatoa ina ia talia ai oe e ia.”
7 Ua faapea mai se tasi uso talavou: “Ou te manatuaina loʻu mafaufau ifo iā te aʻu lava e faapea, ‘E ese le manaia pe a ou oo atu i le lalolagi fou ma faamatala i tagata faatuatua anamua e faapea, sa ou auauna i Peteli mo le tele o tausaga, ae lē o le lalolagi i le taumafai e maua ni tupe se tele.’”
8 Ua manatua e se uso talavou le toleniga na ia maua e faapea: “O le aʻoaʻoina e uiga iā te aʻu lava ma le mea e manaʻomia ona ou galue i ai, ona atiina aʻe loa lea o nei uiga, ua avea o se faamanuiaga sili. Ua ou lagona ua mafai nei ona ou auauna lelei iā Ieova. Ua ou iloa ua lava si oʻu onosai, ua mafai foʻi ona iai se pulea totino, ma ua mafai ona ou faaali atu le alofa i se tulaga e sili atu na i lo le tulaga sa iai muamua.”
9 Ua mafaufau se tuafafine i faamanuiaga ua ia maua seʻi oo i lenei vaitaimi: “O le polokalame faaleagaga iinei ua aʻoaʻo mai ai iā te aʻu le tele o mea e uiga iā Ieova ma le auala e mafai ai ona ou faataʻitaʻi lelei iā te ia i manatu, faalogona, ma gaoioiga. Ma ona o loo faifai pea le toleniga, e faaauau pea la ona avea ma se faamanuiaga.”
10 Ua taʻua e se uso o lē na tuutoina le 59 tausaga i le faiva faataimi atoa, ma e sili atu i le 43 o na tausaga na faaalu i Peteli e faapea: “O Peteli, e lē pei o se monaseri, lea atonu o loo manatu ai isi tagata. E tele mea matou te faataunuuina ona o la matou faasologa masani o le olaga. . . . E leʻi iai lava se aso ua ou sau ai ou te faigaluega ma ou leʻi olioli ai i aʻu galuega na fai. Aiseā? Talu ai, pe afai e tuuina atu lo tatou tagata atoa iā Ieova, e tatou te maua le lotomalie i le iloaina ua ‘tatou faia mea e tatau ona tatou faia.’”—Luka 17:10.
11 Na faapea mai se tasi uso o lē na auauna i Peteli mo le 62 tausaga: “Ua ou matuā talitonu maumauaʻi o Peteli, o le nofoaga aupito sili lea ona lelei i le lalolagi i lenei itu o le Parataiso faalelalolagi lea o loo fotuaʻi mai. Ou te leʻi faanoanoa lava ona o le avea o le auaunaga faataimi atoa ma aʻu galuega i loʻu olaga. Maʻeu le olioli i le molimau atu ma le faia o se sao i le matuā faatuputeleina o le faalapotopotoga faalelalolagi a Ieova! O laʻu filifiliga maumauaʻi, faatasi ai ma le fesoasoani a Ieova, le faaauau pea ona avea o Peteli ma oʻu aiga ma faia soʻu sao ma loʻu tagata atoa i le faaauilumaina o manaʻoga o le Malo.”
12 Ua taʻua e nei sui o le aiga Peteli na o ni nai faamanuiaga mai le tele o faamanuiaga e mafai ona e olioli i ai pe afai e faaavanoa oe lava mo le auaunaga i Peteli. Ae ina ia maua faamanuiaga o le auaunaga, e tatau ona e muaʻi ausia ni agavaa. O ā nisi o mea manaʻomia ina ia auauna ai e avea o se sui o le aiga Peteli?
13 Mea e Manaʻomia mo le Auaunaga i Peteli: O manaʻoga autū mo i latou e talosaga mo le auaunaga i Peteli, o loo faailoa mai i le pusa lea o loo i lenei faaopoopoga. E lē gata i lea, e tāua foʻi lo latou naunau e galulue mamafa, ae lē o ni ē “ua tele le manao i mea faafiafia.” (2 Timo. 3:4; 1 Kori. 13:11) O sui o le aiga Peteli e tatau ona avea o ni tane ma ni fafine faaleagaga o ē ua fai ma masani le faia o suʻesuʻega totino, ma ua toleni foʻi o latou tomai e mafaufau ai “e iloa ai le lelei ma le leaga.” (Epe. 5:14) E tatau foʻi ona faaalia lo latou matutua faa-Kerisiano i vala uma o le olaga, e aofia ai o latou laʻei, teuga, ma le filifilia o musika ma faafiafiaga. O sui o le aiga Peteli, e lotomalilie lava e auauna i so o se mea e manaʻomia ai i latou. O sui talavou, e masani lava ona tuu i ai tofiga e aofia ai galuega mamafa, e pei o le lolomiina o tusi, saunia o lomiga ma le felaʻuaʻiina, le faaleleia ma le tausia o mea, teuina o fale, faamamā, tatāina o lavalava ma le saunia o mea taumafa. (Faata. 20:29) E lē pei o galuega totogi, o tofiga taʻitasi e matuā faamalieina ai ona o le auaunaga paia e faamamaluina ai Ieova.—Kolo. 3:23.
14 O le taimi e aupito puupuu e faatulagaina e nonofo ai i latou ua valaaulia mo le auaunaga i Peteli e tasi le tausaga. O le faia faapea ua mafai ai ona toleniina i latou e avea o se ʻaufaigaluega e fua tele mai. O le faamoemoe, ina ia mafai ona latou faia Peteli e avea ma o latou aiga. O le alofa mo Ieova ua uunaʻia ai sui o le aiga Peteli ina ia faamuamua le galuega o le Malo na i lo o latou fiafiaga totino, auā e faafiafiaina ai Ieova.—Mata. 16:24.
15 Manaʻoga i le Taimi Nei: Ona o le tulaga masani o le galuega o loo faia nei i Peteli, o le manaʻoga autū lava i le taimi nei, e mo uso nofofua. E ui e lē o se mea e manaʻomia, ae e avatu lava le faamuamua iā i latou o loo paeonia sauatoa, talu ai o lea ua auai i latou i le faiva faataimi atoa. I nisi taimi, atonu o le a iai ni avanoa mo tuafāfine nonofofua ma ulugalii faaipoipo e mai le 19 e oo i le 35 tausaga le matutua o ē atonu o iai nisi o tomai o loo manaʻomia i Peteli. E lē gata i lea, e iai nisi o uso ma tuafāfine o ē ua fai lava si matutua atu na i lo o le taʻi 35 tausaga e iai ni tomai faapitoa ma ni aʻoaʻoga e mafai ona faaaogāina i Peteli, ua faalaeiau ina ia talosaga atu. Mo se faaaʻoaʻoga, e aofia ai i mea nei ni fomaʻi nifo, fomaʻi, tausi tusi tupe ua maua ni tusi pasi, tusiata o fale, inisinia faufale, tausimaʻi ua lesitalaina, inisinia o taavale, po o ē e faaleleia mea e faaaogā ai le eletise, ma isi mea faapena. Ae peitaʻi, e matou te lē o faalaeiauina ia tagata ina ia maua ni aʻoaʻoga po o ni toleniga faapitoa ma le manatu e faapea o lenei mea o le a faaleleia atili ai o latou avanoa e valaaulia ai i Peteli. Atonu o i latou ua maua ni toleniga faapitoa a o leʻi ō mai i le upu moni, e ono mananaʻo e tusia mai ni faamatalaga auʻiliʻili ma faapipii faatasi mai ma a latou tusi talosaga i Peteli.
16 Afai e te talosaga ae ua lē valaaulia oe e auauna i Peteli, aua le faavaivai. E mafai ona e manatunatu e toe faia sau tusi talosaga fou i tausaga taʻitasi. O nisi uso ua maua aʻoaʻoga faapitoa ma tomai atonu e manaʻomia i Peteli, ua faaavanoaina i latou lava e tauofo e auauna mo se taimi lē tumau. Atonu e mafai ona latou talosaga ina ia auauna i Peteli mo se tasi, lua, tolu, po o le fā vaiaso pe oo atu lava i le tolu masina. O loo i ai i le failautusi a le faapotopotoga pepa talosaga tauofo lē tumau mo i latou e fia fesoasoani i lenei auala. E mafai ona ota ni pepa mo talosaga tauofo lē tumau i le Literature Request Form.
17 O le auauna soosoo tauʻau iā Ieova ma uso o Keriso, o se faaeaga tutasi lea mo i latou o loo galulue i Peteli. E talisapaia e le Vaega Pule le agaga faataulagaina o i latou uma o ē ua faaavanoaina i latou e auauna atu ai i manaʻoga o lo tatou ʻauuso i le lalolagi aoao.—Fili. 2:20-22; 2 Timo. 4:11.
18 Talavou e—Ia Outou Sauniuni Nei mo le Auaunaga i Peteli: E amata lava ona sauniuni mo le auaunaga i Peteli a o leʻi taitai ona aulia le 19 tausaga faatulagaina. O le ā e mafai ona faia e le ʻautalavou e sauniunia ai i latou mo le auaunaga i Peteli? Na fetalai Iesu e faapea: “O ai foi so outou ua fia fai se ʻolo, e le muai nofo i lalo e faitau tupe e totogi aʻi?” (Luka 14:28) Talu ai o sauniuniga ma fuafuaga e tāua tele mo le taulau manuia o le faia o so o se faugafale, maʻeu le tāua mo talavou ina ia uaʻi totoʻa atu i le auala o loo atiina aʻe ai i latou mo le lumanaʻi i le auaunaga a Ieova! E tatau lava ona faataatia se faavae mautū i le amataga o le olaga ina ia mafai ai ona latou ausia sini faaleagaga. I le avea ma talavou, o le ā le lelei o e faataatia ai lou faavae? Afai e te fia auauna i Peteli, o le a e maua aogā e ala i le manatunatu ma le faaeteete i mea nei.
19 “Fai se Avanoa” mo Lenei Faaeaga Faapitoa o le Auaunaga: E pei ona faamauina i le Mataio 19:12 (NW), na faalaeiau e Iesu ona soo ina ia “fai se avanoa” mo se olaga nofofua. Aiseā? E lē mo ni māfuaaga totino, ae “ona o le malo o le lagi.” Sa faapena foʻi ona faalaeiau e Paulo sea olaga ina ia “auauna lelei foi i le Alii ma le loto le fetosoaiina.” (1 Kori. 7:32-35) Ae pagā, ona e toʻatele nisi ua misia le faaeaga o le auaunaga i Peteli e avea o ni tane nonofofua ona o le saʻilia o ni faaipoipoga a o laiti. E matou te fia faalaeiauina o tatou uso talavou ina ia faaaogā o latou malosi i le tuliloaina o le faiva faataimi atoa a o leʻi iai ni o latou tiute tauave faaleaiga. Ia, ae afai ua mavae se vaitaimi ae ua latou filifili e faaipoipo, o le a avea ai loa la i latou o ni tane e sili atu ona lelei ona ua maua le tele o le poto masani i le olaga atoa ma le faiva faa-Kerisiano. Ina ua uma ona auauna i Peteli mo le tele o tausaga, ua faaipoipo nisi ma ua mafai ona faaauau pea ona auauna ai iinā e avea o se ulugalii. Afai e mulimuli ane maua nisi o latou faaeaga, e pei o le galuega femalagaaʻi po o le auaunaga faamisionare, o le mea moni lava e latou te lē faanoanoa ona o le taimi lea sa latou faaavanoaina mo le auaunaga i Peteli.
20 Aua Neʻi Taaʻina i le Saʻilia o Mea Faitino: E lelei mo talavou taʻitoʻatasi ona fesili ifo: ‘Po o loʻu sini pe a uma ona faauu aʻu mai le aʻoga maualuga o le saʻilia o se galuega e telē le totogi po o le auauna faataimi atoa iā Ieova?’ E ioeina e faapea, o le uia o le ala lona lua e manaʻomia ai ni faataulagaina. Ae e faapena foʻi le saʻilia o se galuega totogi! I le iʻuga, o lē fea auala o le a maua moni ai se iʻuga e tumau ma aogā? Na tuuina mai e Iesu le tali saʻo ma le manino. E tusa ai ma le Mataio 6:19-21 na ia fetalai mai: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.” Aua lava neʻi taʻitaʻiina i tatou e o tatou loto e saʻilia se galuega faalelalolagi po o mea faitino na i lo o le auauna ma le tagata atoa iā Ieova. E tatau ona iloa e i tatou uma e faapea, e na o le pau lava le ʻoa tāua e aogā ona saʻilia, o se faiā lelei lea ma Ieova, ina ia tatou faafiafia ai lona finagalo. (Faata. 27:11) O le faamuamua o Ieova i o tatou olaga a o laiti, ua tatou faaalia atu ai po o fea mea e sili ona tatou faatāuaina ma po o le ā le tāua o le Malo iā i tatou. Ia manatua, “o le faamanuia a Ieova, o lea e faatamaoaiga aʻi; na te le faaopoopo i ai se tiga.” (Faata. 10:22) Ua maua e le ʻautalavou le avanoa lelei e faaalia ai po o fea o iai o latou loto e ala i le avatu o se mea tāua iā Ieova ona o mea uma ua ia foaʻi atu iā i latou. O le auaunaga i Peteli ua mafai ona maua ai sea avanoa matagofie mo i latou ua ausia agavaa.
21 O i Latou e Auauna i Peteli e Tatau Ona Amio Mamā: Na fesili le faisalamo e faapea: “E faapefea ea ona faamamaina e le taulealea o lona ala?” Na ia tali mai: “Ona ua tausi i ai e tusa ma lau [Ieova] afioga.” (Sala. 119:9) O le a aofia ai i lena mea le ʻalofia o so o se mea e fesootaʻi ma amioga iʻuvale o le faiga o mea a Satani. O ata ma faamatalaga o faiga matagā faaleituaiga o loo maua e ala i le Initineti, o musika matagā, faafiafiaga paʻū maulalo, ma inugaʻava a o laiti, o nisi na o mailei ua faaaogā e Satani e taofia ai o tatou talavou mai le aapa atu i sini faaleagaga. E manaʻomia ai se filifiliga maumaututū ina ia teena nei faiga faatogafiti. I le avea o se talavou, afai ua e iloa ua oo ina e aafia i so o se mea o nei togafiti, ia talanoa atu i toeaina o la outou faapotopotoga ma ia foʻia nei mataupu a o e leʻi talosaga atu mo le auaunaga i Peteli. O le iai o se lotofuatiaifo mamā, e matuā tāua mo le auauna atoatoa atu iā Ieova.—1 Timo. 1:5.
22 Aʻoaʻo ia Galulue Faatasi ma Isi: O se manaʻoga tāua ina ia taulau manuia ai i le auaunaga i Peteli, o le aʻoaʻo lea ina ia galulue faatasi ma isi. O le aiga Peteli o loo faia aʻe i le faitau afe o uso ma tuafāfine mai talaaga eseese o le olaga. A o faaopoopo atu nei uiga eseese i le matagofie faaleagaga o Peteli, e iai foʻi isi taimi e tulaʻi mai ai ni luʻi. Afai o loo e manatunatu mo le auaunaga i Peteli, e lelei pe a e fesili ifo iā te oe lava: ‘Po o aʻu o se tagata e itaitagofie pe a lē tutusa oʻu manatu ma isi? Po o faigofie ona matou faifaimea faatasi?’ Afai e te manaʻomia ona faaleleia o na vala, amata nei loa ona e galue i ai. O lou faia faapea o le a fesoasoani lea iā te oe ina ia faigofie ai ona e fetuutuunaʻi e ola ma faigaluega faatasi ma tagata o le aiga Peteli.
23 Ia galue malosi i le avea ma se tagata faaleagaga e ala i le atiina aʻe o se faiā vavalalata ma Ieova. Ati aʻe se masaniga lelei o le faia o suʻesuʻega totino, e aofia ai le faitauina o le Tusi Paia i aso taʻitasi. Ia sogasogā i le tufaina atu o le tala lelei i isi. O le faatinoina o na mea, o le a iloa ai lou agaʻigaʻi i luma faaleagaga. (1 Timo. 4:15) Maʻeu ni faamoemoega matagofie o loo faatali mai mo i latou o ē ua nofosauni nei mo se galuega i le auaunaga faataimi atoa!
24 Mātua, ia Aʻoaʻo a Outou Fanau: O le ā e mafai ona fai e mātua e faalaeiau ai a latou fanau talavou ina ia tulimataʻi le faiva faataimi atoa? Na fetalai Iesu: “Ua taitasi ma faapei o lona aʻoaʻo o e ua atoatoa ona aoaoina.” (Luka 6:40) O se tamaitiiti aʻoga e aʻoaʻoina lelei, e mautinoa lava, e na te faaalia mai uiga lelei o lona faiaʻoga galue faamaoni. Ua saunia e lenei mataupu manatu e tatau i mātua Kerisiano ona mafaufau i ai, a o la galulue malosi i le aʻoaʻoina o le la fanau ina ia avea le “faamasani i le amio Atua” ma o latou sini. (1 Timo. 4:7) Talu ai e tele lava ina faaalia e le fanau uiga o o latou mātua agaʻi i mea faaleagaga, e lelei ai la i mātua ona fesili ifo iā i latou lava: ‘Pe e tatou te faatāuaina totino le galuega o loo faia i Peteli ina ia siitia ai le tulaga o le tapuaʻiga moni iā Ieova? Po o tatou iloaina le faamanuiaga a Ieova i faatulagaga i Peteli? Po o tatou talitonu, o se olaga i le auaunaga a Ieova, o se galuega aupito sili lea ua mafai e a tatou fanau ona filifilia?’ O lo tatou lava talisapaia mai le loto mo le auaunaga i Peteli ma le galuega o loo faia ai iinā, o le a fesoasoani iā i tatou e totōina i a tatou fanau lena lava talisapaia.
25 Sa matuā talisapaia e Elekana ma Hana le tapuaʻiga moni. Ua la faataatia se faaaʻoaʻoga matilatila mo mātua Kerisiano i aso nei. I Isaraelu anamua, sa na o tane Isaraelu lava sa manaʻomia ona ‘iloa i luma o le Alii o Ieova,’ e faatolu i le tausaga i le falefetafaʻi. O lea la, na faimalaga atu ai Elekana mo le 20 maila (30 kilomita), e foliga sa tele lava ina savavali, ma lona aiga atoa “i lea tausaga ma lea tausaga” ina ia fai taulaga i lenei nofoaga autū o le tapuaʻiga iā Ieova. (Eso. 23:17; 1 Samu. 1:3, 4, 9, 19; 2:19) E aliali mai, sa manaʻo lenei ulu o le aiga ina ia manatu mamafa uma lona aiga atoa i mea faaleagaga e pei o ia.
26 Sa iai foʻi iā Hana le naunau i le tapuaʻiga moni e pei lava o lana tane. Sa iā te ia le lagona naunau i lana tiute tauave ina ia faia se sao e lagolagosua ai i le tapuaʻiga i le falefetafaʻi. Na tautō Hana e faapea, afai e foaʻi atu e Ieova iā te ia se tama, o le a ia faaavanoaina pe tuuina atu o ia mo le auaunaga i le falefetafaʻi. (1 Samu. 1:11) I le Tulafono a Mose, sa tuuina atu ai i se tane le aiā e faalēaogāina ai se tautoga lē talafeagai a lana avā. (Nu. 30:6-8) Ae peitaʻi, e aliali mai, na matuā lagolagoina e Elekana le tautoga a Hana, e faaalia ai e faapea, sa ia lagolagoina foʻi lena faailoaga o le tapuaʻiga moni!—1 Samu. 1:22, 23.
27 Pe na maua e le la tama o Samuelu se aogā mai le lagona talisapaia ma uiga sili ona lelei na faaalia e ona mātua? Ioe, o le mea moni. A o laʻitiiti lava, sa tausia ma le lotomalie ma le faamaoni e Samuelu ana galuega tofia ma sa aʻoaʻoina foʻi o ia mo isi faaeaga tāua i le auaunaga a le Atua. O le naunau na faaalia e Elekana ma Hana i le auaunaga a Samuelu i le falefetafaʻi, sa leʻi faamutaina ina ua faatinoina e Samuelu lana auaunaga iinā. Sa la asiasi atu pea iā te ia e lē aunoa e avatu faalaeiauga ma le lagolagosua, a o ia faaauau pea i le auaunaga faataimi atoa.—1 Samu. 2:18, 19.
28 Maʻeu se faaaʻoaʻoga mataʻina na faataatia e Elekana ma Hana mo mātua Kerisiano i aso nei! Pe a faalogoina e a tatou fanau faaupuga o lo tatou talisapaia mai o tatou loto mo le faaeaga o le auaunaga i Peteli, ma vaai mai i le agaga o le faataulagaina totino o loo tatou faaalia i le faaauilumaina o manaʻoga o le Malo, o le a atiina aʻe foʻi la e i latou se faanaunauga e auauna ai i isi. E toʻatele mātua ua taulau manuia i le tāmauina o lenei faanaunauga e sili ona lelei iā latou fanau. Na tusi mai se tasi teineitiiti e 7 tausaga le matua e faapea: “Pe a ou matua, ou te manaʻo ia ou iai i Peteli, ma e iai ni nai mea ou te manaʻo e faia ai iinā. (1) O le lolomiina o mekasini o Le Olomatamata ma le Ala Mai!, (2) galue i la outou matagaluega o tusiga ata, (3) gaugauina o tagamea. Po o le ā lava le galuega e avanoa. E lē āfaina lava.” Maʻeu se faamāfanafana loto e vaai atu i le tuputupu aʻe o sea agaga fia auauna i loto o a tatou fanau!
29 Talavou e, ia manatua “o le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioa. 2:17) Faaauau ona saʻili sini faaleagaga, e aofia ai le faaeaga faapitoa o le auaunaga i Peteli. Matua e, ia faataʻitaʻi i faaaʻoaʻoga a ē faamaoni o aso ua mavae o ē na faalaeiauina a latou fanau ina ia ati aʻe le amio Atua. (2 Pete. 3:11) Tau ina ia faia e i tatou uma lava la tatou vaega i le tele e tatou te mafaia ai, e fesoasoani ai i o tatou uso ma tuafāfine talavou ina ia auauna i Lē Silisili na Foafoaina i tatou, auā o lenei mea “o loo i ai le mea ua folafolaina mai i la le olaga nei atoa ma lē atali.”—1 Timo. 4:8; Fai. 12:1.
[Pusa i le itulau 4]
Manaʻoga Autū mo le Auaunaga i Peteli
● Ia papatisoina pe ā ma le tasi le tausaga
● O se tagata faaleagaga e alofa loloto mo Ieova ma lana faalapotopotoga
● Ia lelei le tulaga faaleagaga, le mafaufau, faalogona, ma le soifua mālōlōina faaletino
● Ia avea o se tagatanuu, pe ia iai foʻi se pepa nofo mau faaletulafono i Samoa, Amerika Samoa, po o Toga
● Ia iloa faitau ma tusitusi ma ia sologa lelei le tautala i le gagana faa-Peretania
● E 19 i le 35 tausaga le matua