Pe Mafai Ona E Auauna i Nofoaga o Loo Tele ai le Manaʻoga?
1 Pe sa e mafaufau e te siitia atu i se nofoaga o loo manaʻomia tele ai nisi tagata e faalauiloaina le Malo? Pe a valaaulia e te “sau ia . . . ma fesoasoani,” po o le a e tali atu e pei ona faia e le aposetolo o Paulo? (Galu. 16:9, 10) I le tele o faapotopotoga, o loo iai se manaʻoga mo aiga taʻumatuaina faaleagaga, o paeonia, ina ia fesoasoani i le galueaʻiina atoa o le oganuu, po o toeaina ma auauna o le faiva e agavaa ina ia fesoasoani e taʻimua. O le oganuu, atonu e faia aʻe i ni aai laiti e tutū solo i se vaipanoa telē e maotua. O le Maota o le Malo latalata ane, atonu e mamao tele, ma e lē tele naʻuā foʻi ni galuega totogi. Atonu e faalēlelei i taimi uma le tau. Pe faamata e te lotomalie e talia se luʻi faapena? E mafai faapefea ona taulau i le uia o lea laasaga?
2 E Manaʻomia le Faatuatua ma le Faamoemoe: I le faatonuga a le Atua, na tuua ai e Aperamo lona nuu o Uro ma faimalaga atu mo le 600 maila (1,000 kilomita) i Karana faatasi ma lana avā, le atalii o lona uso, ma lona tamā ua matua, o Tara. (Kene. 11:31, 32; Nee. 9:7) Ina ua maliu Tara, ona poloaʻi lea o Ieova iā Aperamo ua 75 ona tausaga, ina ia tuua Karana ma ona tauaiga ae faimalaga atu i se nuu o le a faasino atu e le Atua iā te ia. “Ona latou o atu lea” o Aperamo, Sarai, ma Lota. (Kene. 12:1, 4, 5) O le mea moni, sa leʻi siitia atu Aperamo ina ia auauna i se nofoaga sa tele ai le manaʻoga mo ni faifeʻau. Ae sa iai le mea na manaʻomia i lona siitia atu. O le ā lena mea?
3 Sa manaʻomia ai le faatuatua ma le faamoemoe o Aperamo i le faia o lea gaoioiga. Na tatau ona suia ona mafaufauga ma le auala e ola ai. Sa tatau ona ia tuua le tulaga saogalemu o ona tauaiga. Ae sa faamoemoe iā Ieova o le a na tausia o ia ma lona ʻauaiga. E toʻatele tagata i aso nei ua faapena foʻi ona faaalia lo latou faamoemoe iā Ieova.
4 Tofiga mo Taimi Puupuu: Pe sa e olioli i le ʻoa o faamanuiaga e maua mai le galueaʻiina o oganuu e leʻi tofia i ni faapotopotoga po o nuu maotua e seāseā galueaʻiina? I le tausaga ua mavae i le Iunaite Setete, e toʻa 5,699 le ʻautalaʻi na galueaʻiina le 163 mai le 174 o oganuu e leʻi tofia i ni faapotopotoga. O le isi ʻautalaʻi e 5,676 na fesoasoani i faapotopotoga e 380 i le galueaʻiina o oganuu e seāseā talaʻia. Mo nisi o i latou, sa aofia ai le mamao o nofoaga e faimalaga atu i ai. I Samoa, sa galueaʻiina ai e ni vaega o le ʻautalaʻi nisi o nuu maotua. Pe sa aogā na taumafaiga?
5 Na tusi mai se uso mai Kalifonia o lē na alu atu i Utah e faapea: “Sa ou faalotolotolua ina ua muaʻi talosagaina aʻu ou te taʻimua i se vaega e galueaʻiina ia oganuu e seāseā talaʻia. Ae sa ou filifili e talia le tofiga. E lē gata o se mea e lē taitai ona ou faanoanoa ai, ae na suia ai foʻi loʻu olaga. Ou te faafetaia Ieova i aso uma mo le faaeaga i le faia o se sao i lea faigāmalaga.” Na taʻua e se uso mai Florida o lē na malaga atu i Tennessee e faapea, o se mea e sili ona mataʻina i le 20 tausaga talu ona iai o ia i le upu moni! Na taʻua e se talavou mai Connecticut o lē na alu atu i West Virginia e faapea: “O se mea aupito sili lenei ona lelei na tupu i loʻu olaga!” E ioeina e le toʻatele o le ʻautalaʻi e faapea, o le auauna e tusa lava pe mo se taimi puupuu i se nofoaga o loo tele ai le manaʻoga, ua matuā faalolotoina ai lo latou talisapaia mo le faiva. Ia talanoa atu iā i latou na faia lena mea. O le a e iloa ai na faagaeetia faaleagaga i latou ma o le a mananaʻo foʻi e toe faia faapea pe afai e tuuina atu i ai se avanoa.
6 O le taliaina o se tofiga e auauna i nofoaga o loo tele ai le manaʻoga mo se taimi puupuu, e mafai foʻi ona faataunuuina ai se isi fuafuaga. O i latou o loo faia faapea e mafai ona maua mai ai ni faamatalaga aogā e fesoasoani iā i latou e “faitau tupe e totogi ai” le ō atu i se isi vaega o le oganuu a le lālā.—Luka 14:28.
7 O loo maumauaʻi Ieova ina ia folafola atu le tala lelei “i le atu laulau uma” a o leʻi oo mai le iʻuga. (Mata. 24:14) I le iloaina o lenei mea, po o le a e lotomalie e siitia atu i nofoaga o loo tele ai le manaʻoga pe afai e te mafaia? O loo iai le manaʻoga i le tele o vaipanoa.
8 Siitia Atu i Nofoaga o Loo Tele ai le Manaʻoga: Po ua e litaea mai lau galuega? Po o iai sau alagātupe o maua mai pea? Afai e leai, pe mafai ona e fuafua e te galue mo oe lava? Pe e mafai ona maua ni mea e tausia ai oe mai so o se nofoaga e ala i le faaaogāina o le telefoni po o le komepiuta? Afai e lē mafai ona e siitia atu, pe mafai ona e fesoasoani i se tasi o le aiga e auauna i se isi nofoaga?
9 Pe afai ua uma ona iloiloina faatasi ma le tatalo ma ua e lagona e mafai ona e talia le luʻi o le siitia atu i se nofoaga o loo tele ai le manaʻoga, ia talanoa le mataupu ma lou aiga ma toeaina o lau faapotopotoga. Ia, ona faia loa lea o se tusi ma avatu i toeaina ina ia mafai ona faaaofia ai o latou manatu ma fautuaga a o leʻi auina atu i le ofisa o le lālā.
10 O ā mea e tatau ona faaaofia i lau tusi? O ou tausaga, le aso na e papatiso ai, le atunuu o loo avea ai oe ma tagatānuu, tiute tauave i le faapotopotoga, tulaga tau i le faaipoipoga, ma po o iai sau fanau laiti o tausi. Taʻu mai le igoa o le motu po o le aai ua e filifili e te fia auauna ai, e tusa ai ma ou manaʻoga totino. Mo se faataʻitaʻiga, pe e mafai ona e nofo i se motu laʻitiiti e fai sina tū mamao ese? Pe e mafai ona e faimalaga i ni vaa laiti? Pe e mafai ona e savali mamao ina ia oo atu i tagata ma le upu moni? Pe e mafai ona e tautala i nisi gagana e ese mai i lau lava gagana?
11 Pe e te maelega ma tausolomua? Pe e faatagaina e ou tulaga oe e auauna i nofoaga o loo tele ai le manaʻoga? Afai o lea, mātau auala o loo faaauau ai pea ona liligiina mai e Ieova faamanuiaga faaʻoaina iā i latou o loo faamoemoe atu iā te ia, a o latou faaalia le agaga o le faataulagaina totino!—Sala. 34:8; Mala. 3:10.