Ia Faatulaga Saʻo Taimi o Mālōlōga
1 I nei aso faigatā, e manaʻomia ai e i tatou uma mai lea taimi i lea taimi ni fetuutuunaʻiga. E talafeagai le iai o ni taimi mo faafiafiaga. Ae peitaʻi, o le tele naʻuā o le taimi e faaalu i mālōlōga, i faafiafiaga, ma faatasitasiga ma isi, e mafai ona taaʻina atu ai se tagata e faaitiitia lona taimi e tuliloa ai mea faaleagaga. E tatau ona tatou faatulaga saʻo taimi e mālōlō ai. (Mata. 5:3) E mafai faapefea ona faia o lenei mea? E ala i le mulimuli i le fautuaga o loo maua i le Efeso 5:15-17.
2 Faataatitia ni Tapulaa: Na tusi mai Paulo e faapea, e ao i Kerisiano ona “faaeteete” ma ia faautauta e tusa ma auala e ola ai o latou olaga. E manaʻomia le fuafua lelei ma le pulea totino ina ia faatapulaaina taimi e mālōlō ai i se tulaga e manaʻomia moni lava. O se mea lelei le manatunatu mamafa i le auala tatou te faaaogā ai o tatou taimi paganoa. O faafiafiaga e tatau ona avea ma se fuafuaga aogā na i lo o le oo ai iā i tatou o se lagona e faapea, ua maʻimau lo tatou taimi pe e lagona ai foʻi le vaivai. Pe afai e tuua ai i tatou ma se faalogona gaogao, le leai o se lotomalie, ma se lagona o le tigā o le lotofuatiaifo pe a uma ona auai i se gaoioiga, o le a faaalia ai i lenei mea le manaʻomia ona faia o ni fetuutuunaʻiga e tusa ai ma le faaaogāina o o tatou taimi.
3 Ia Magafagafa: Na fautua mai Paulo e uiga i le “faatauina mai o le taimi tatau” (NW) mo mea e sili ona tāua o le olaga, ae aua neʻi ‘faavaleaina.’ E lē mafai ona faatagaina e Kerisiano tuuina atu o latou olaga e faaautū i faigāmālōlōga. E ui lava o le mālōlō ma le faia o ni faafiafiaga e mafai ona faafouina ai i tatou i le itu faaletino, ae o le puna o le malosi faaleagaga o le mana galue lea o le Atua. (Isa. 40:29-31) E tatou te maua lona agaga e ala i gaoioiga faatiokarate—suʻesuʻeina o le Tusi Paia, le auai i sauniga a le faapotopotoga, le auai i le auaunaga i le fanua—ae lē ala i faafiafiaga.
4 Faatulaga Mea e Faamuamua: Na faatonuina e Paulo ia Kerisiano ina ia faaauau ona latou “iloa le finagalo o [Ieova].” Na aʻoaʻo e Iesu e faapea, e tatau ona faaautū a tatou gaoioiga i le Malo o le Atua, o se mea e faamuamua i o tatou olaga. (Mata. 6:33) O se mea tatau lo tatou faia muamua o mea o le a mafai ai ona tatou ola e tusa ai ma lo tatou tuuina atu iā Ieova. Mulimuli ane, ona faatulaga tatau ai lea o le taimi e mālōlō ai. Pe afai e faia lenā mea, o le a maua ai ni āuga lelei tele, ma o le a sili atu ona tatou olioli ai.—Fai. 5:12.