Pe E te Fia Faia Nisi Gaoioiga Faaopoopo?
1 Na faatusaina e Iesu le Malo i se ʻoa e lē mafaataulia. (Mata. 13:44-46) O le galuega o le faasalalauina atu o le tala lelei o le Malo, o se ʻoa tautele foʻi. E tatau lava la ona faamuamua lenei faiva i o tatou olaga, e tusa lava po o le a avea le faia atoatoa ai o so tatou sao ma māfuaaga o le taofia ai o nisi o mea o loo tatou naunau totino i ai. (Mata. 6:19-21) Pe te fia faia nisi gaoioiga faaopoopo i le auaunaga o le Malo?
2 Manatunatu i Mea Tāua Nei: E tele nisi mea e manaʻomia ina ia faalautele atu ai so tatou lava sao i le faiva: (1) o le maumauaʻi e faamuamua manaʻoga o le Malo i le olaga (Mata. 6:33); (2) faaalia o le faatuatua ma faalagolago atu iā Ieova (2 Kori. 4:1, 7); (3) saʻili le fesoasoani a le Atua e ala i le tatalo faamaoni ma le faatauanau (Luka 11:8-10); ia mulimuli ma gaoioi e tusa ai ma a tatou tatalo.—Iako. 2:14, 17.
3 Auala e Faalautele ai la Tatou Faiva: E mafai e i tatou uma lava ona faataatia se sini autū o le faaalu e lē aunoa o se taimi i le faiva i masina taʻitasi. Ae po o e manatunatu foʻi i le puʻea o avanoa uma e molimau atu ai lē fuafuaina, ma tauivi ina ia matuā uigā au taulimaga, ia faateleina le uigā o au toe asiga, ma taumafai e faia ni suʻesuʻega faale-Tusi Paia e agaʻigaʻi i luma i aiga? Pe faamata e mafai ona e paeonia lagolago pe sauatoa po o le auauna foʻi i nofoaga o loo manaʻomia tele ai le fesoasoani? Afai o oe o se uso ua papatisoina, pe mafai ona e aapa atu ina ia taʻuagavaaina oe e avea o se auauna o le faiva po o se toeaina? (1 Timo. 3:1, 10) Pe e mafai ona faalautele atu lau faiva i lou talosaga atu mo le auaunaga i Peteli, le Aʻoga mo Toleniga i le Faiva, po o toleniga faamisionare i le Aʻoga o Kiliata?—Luka 10:2.
4 O se uso o lē sa faigaluega i aso uma lava i se galuega totogi ma faaalu le tele o lona taimi i taaloga, sa faalaeiauina o ia ina ia paeonia sauatoa. Na amata lava i le paeonia lagolago, ona ia faia lea o ni fetuunaʻiga i lona tulaga ina ia ulu atu i le faiva faataimi atoa. Mulimuli ane, na auai atu o ia i le Aʻoga mo Toleniga i le Faiva, lea na sauniunia ai o ia mo lona tofiga lea o loo galue ai nei o se ovasia matagaluega. Ua matuā fiafia lava ona sa tali atu i faalaeiauga na ia maua, ma ua ia mautinoa ua matuā sili atu lona fiafia ona o lana filifiliga ina ia faia nisi gaoioiga faaopoopo i le auaunaga o le Malo.
5 E faamanuia e Ieova i latou o ē ua faaavanoaina i latou lava. (Isa. 6:8) Aua lava neʻi iai se mea e taofia ai oe mai le faalautele atu o lau faiva ma olioli ai i le faamalieina e sili atu ma faafouina ai ona o le faia faapea.