Po o se Toʻatugā Lea i le Talaʻiga?

¹ O le toʻatele o tagata e ola i ni olaga pisi. O Molimau a Ieova, o nisi ia o tagata e matuā sili ona pisi—i le suʻesuʻeina o le Afioga a le Atua, le auai i sauniga a le faapotopotoga, ma le faia o se sao i le auaunaga i le fanua. E lē gata i lea, e tatou te pisi foʻi i le vaaia o a tatou galuega totogi, galuega i le fale, po o galuega i le aʻoga, ma le tele lava o isi tiute tauave ia e manaʻomia uma ai le taimi. Ua matuā sili atu ona faigatā lenei mea mo ulu o aiga.

² Ona o le lē lelei o le tulaga tau i le tamaoaiga i nofoaga eseese, e manaʻomia ai e ulu o aiga ona galulue mo le tele o itula, ma tauivi mo le saʻilia o mea e ola ai. Pe a fao uma e a latou galuega totogi le tele o o latou taimi ma le malosi, ua itiiti ai la se taimi mo i latou e faaalu i le galuega talaʻi. Ona o i latou ua iai le tiute tauave mo le saunia o meafaitino mo o latou aiga, ua lagona ai e nisi le laʻitiiti o se sao e mafai ona latou faia i le faiva. (1 Timo. 5:8) O le mea moni, e matuā tele lava omiga ua iai i le saʻilia o mea e manaʻomia mo le olaga i aso nei. Ae e lē manaʻomia ona avea le galuega a se tasi ma faalavelave i le talaʻiina o le tala lelei. (Mare. 13:10) O lea, e tatau ona tatou iloiloina le tulaga moni o loo tatou iai.

³ Ona o le fesuisuiaʻi pea o le tulaga o le lalolagi, atonu ua agaʻi atu ai ina faaalu e le ulu o le aiga se taimi tele i le galuega ma le manatu e faaputuina ni tupe mo ni mea lē mailoa e ono tutupu mai. (1 Kori. 7:31) A o foliga mai o le faateleina o galuega totogi e mafai ona maua ai nisi o meafaitino po o ni avanoa faaopoopo mo faigāmālōlōga ma faafiafiaga, po o le a sili atu ea ona fiafia ai le aiga ma faamalieina i nei mea, pe afai e faataulagaina ai taimi mo sauniga faaleagaga ma le auai e lē aunoa i sauniga? E mautinoa o le a tatou mananaʻo e ʻalofia so o se mea o le a lamatia ai lo tatou tulaga faaleagaga. O le utagiaina o le fautuaga a Iesu ina ia ‘toloʻaʻi oa i le lagi’ ma ia “mauoa i le Atua,” o le auala atamai lea.—Mata. 6:19-21; Luka 12:15-21.

⁴ Muaʻi Saʻili Manaʻoga o le Malo: Na aʻoaʻo e Iesu ona soo ina ia faamuamua mea faaleagaga i lo o mea uma lava. Sa ia uunaʻia i latou e faapea: “Aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai?” Aiseā na ia tulei atu ai faapena? Na ia faamatala atu: “Auā ua silafia e lo outou Tamā o i le lagi e aoga ia mea uma ia te outou.” Afai e tatou te talitonu faamaoni i na mea, o le a leai la se toʻatugā o le a taofia ai i tatou mai le faia o le isi mea lea na fetalai i ai Iesu e faapea: “A ia outou muai saili lona malo ma lana amiotonu; ona faaopoopoina atu lea o ia mea uma [mea e tatau] ia te outou.” O le a silasila i ai le Atua ua tatou maua na mea e tatau! (Mata. 6:31-33) O le mea moni, e lē o se taimi lenei e faavaivai ai ona o popolega lē talafeagai e faatatau i le saʻilia o mea e ola ai po o faanaunauga ina ia ola i se olaga sologa lelei, i se faiga o mea lea ua lē o toe umi se taimi ae mavae ese atu.—1 Pete. 5:7; 1 Ioa. 2:15-17.

⁵ O le fuafuaga autū lava o galuega totogi, ina ia saunia ai mea faaletino e manaʻomia e se tasi. Ae o le ā le tele o mea e tatou te manaʻomia? Na tusi le aposetolo o Paulo e faapea: “Afai ua maua e i tatou o mea e aai ai ma mea e oofu ai, ia gata ai o tatou manao.” Po o tatou taumafai ea e maua ni mea e sili atu na i lo o na mea? Afai o lea, atonu la o le a tatou seleseleina iʻuga ia na lapataʻi mai ai Paulo: “A o e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” (1 Timo. 6:8, 9; Mata. 6:24; Luka 14:33) E mafai faapefea ona tatou iloa po ua aafia i tatou i le manaʻo tele?

⁶ Afai ona o o tatou popolega i meafaitino ua laʻitiiti ai se taimi e faaalu i le auaunaga i le fanua, pe e lē taulau foʻi ona iloa le manaʻoga ina ia faia ni faataulagaina ona o le tala lelei, ua manaʻomia la ona toe fetuutuunaʻi mea e tatou te faamuamua. (Epe. 13:15, 16) O le a fesoasoani se olaga e lē tele ni meafaitino i le faaleleia o lenei toʻatugā i la tatou talaʻiga. O mataupu tau i le Malo e tatau lava ona faamuamua pea pe a oo i le faaaogāina o lo tatou taimi ma le malosi.

⁷ Le Tautigā e Lē Faalēaogāina: E faalaeiauina pea i tatou i upu a Paulo ina ia ‘alualu lo tatou faamalosi i le galuega a le Alii ma le le aunoa, ina ua tatou iloa e le se mea faaleaoga lo tatou tautiga i le Alii.’ (1 Kori. 15:58) O le “galuega a le Alii” e aupito sili lava, o le talaʻiina lea o le Malo ma le faia o soo. (Mata. 24:14; 28:19, 20) Ina ia faia se sao atoatoa e mafai ai, e tatau ona faia se faasologa o o tatou taimi mo le auaunaga i le fanua i vaiaso taʻitasi ma taumafai ina ia aua neʻi faaaogāina lenā taimi mo nisi mea. (Efe. 5:15-17) O lea, e lē o le galuega po o se isi lava mea o le a avea ma toʻatugā i la tatou faiva.

⁸ Pe a ofoina atu i tatou lava i le tufaina atu o upu moni o le Tusi Paia i isi, ona tatou tofo lea i le fiafiaga sili e maua mai le foaʻi atu. (Galu. 20:35) O le faia o le galuega talaʻi o le Malo ma sini, e mafai ai ona tatou vaavaai atu ma le mautinoa i le lumanaʻi, “aua e le amioletonu le Atua, na te le faagalogaloina la [tatou] galuega ma le alofa ua [tatou] faaali [atu] ai i lona suafa.”—Epe. 6:10.