Ua Tatou Maua se Meafaigaluega Fou mo le Amataina o Suʻesuʻega!
1 O le fafine Amerika sa tuutoina i le lotu Katoliko Roma. Sa ia puipuia ma le faamaoni aʻoaʻoga a le lotu. Na oo lava ina ia faimalaga faapitoa atu i le Vatikana. Ae peitaʻi, ina ua asiasi atu se tasi o Molimau a Ieova i lona fale, sa ia talia le ofo e faia se suʻesuʻega faale-Tusi Paia. Aiseā? Auā na manaʻo o ia e fia iloa mea o fai mai ai le Tusi Paia ae e leʻi ofoina atu e lana lotu se suʻesuʻega faale-Tusi Paia i le aiga. O le ā ua aʻoaʻoina mai iā i tatou e lenei mea na tupu? E faapea, e tatou te lē iloa lava po o ai e foliga mai o le a talia se suʻesuʻega faale-Tusi Paia e aunoa ma se totogi.—Fai. 11:6.
2 Po o e faalotolotolua ea e faailoa atu i tagata e faapea, o loo tatou naunau e suʻesuʻe le Tusi Paia ma so o se tasi e fiafia e faia faapea? Po o iloa e tagata uma i lou nuu o loo tatou ofo atu lenei auaunaga e aunoa ma se totogi? E mafai faapefea ona tatou faamautinoa o loo latou iloa? E ala i le faaaogāina o se mea faigaluega fou! O se sāvali matagofie e ono itulau, o lona matua, Pe E te Manaʻo e Fia Iloa Atili e Faatatau i le Tusi Paia? Seʻi o tatou faamasani i ulutala taʻitasi o lenei sāvali.
3 “Aiseā e Faitau ai le Tusi Paia?” O māfuaaga o loo aumaia i le sāvali e matuā logoleleia lava. O loo faamatala mai ai e faapea, o loo iai i le Tusi Paia “aʻoaʻoga alofa mai le Atua,” o loo faaalia ai le auala e faalatalata atu ai iā te ia i le tatalo mo se fesoasoani ma le auala e maua ai lana meaalofa o le ola e faavavau. (1 Tesa. 2:13) Ua faasino le sāvali i le tele o “upu moni e faamalamalamaina ai” o le Tusi Paia, e pei o le manatu po o le ā e tupu pe a tatou feoti ma le pogai ua matuā tele ai faalavelave i le lalolagi. O loo faamatala mai ai foʻi “mataupu silisili mai le Atua o loo i le Tusi Paia” pe afai e faatatauina, o le a maua ai aogā faaletino ma ati aʻe ai le fiafia, faamoemoe ma isi lava uiga moomia. Ua faailoa mai e le sāvali se isi lava māfuaaga e faitau ai le Tusi Paia—o valoaga e uiga i le lumanaʻi ia e faailoa mai ai po o ā mea o loo i le lumanaʻi ua lē o toe umi lava se taimi ae oo mai.—Faaa. 21:3, 4.
4 “Fesoasoani Ina ia Malamalama i le Tusi Paia”: O loo taʻua i le sāvali e faapea: “Tatou te manaʻomia uma lava le fesoasoani ina ia malamalama ai i le Afioga a le Atua.” Ona faamatala mai ai lea o a tatou metotia e suʻesuʻeina ai le Tusi Paia: “E masani lava e sili ona lelei ona suʻesuʻeina faasolosolo le Tusi Paia, e amata i aʻoaʻoga faavae.” A o faamanino mai ai e faapea “o le Tusi Paia, o le tusi autū lea,” o loo taʻua patino mai i le sāvali le polosiua o le Manaomia e faapea o se lomiga o le a fesoasoani i le tagata suʻesuʻe “ina ia malamalama i faamatalaga faale-Tusi Paia i mataupu eseese.” I le ulutala e sosoo ai, ua lāgā ai se fesili faatupu manatu.
5 “Pe E te Finagalo Malie e Faaalu se Taimi i Vaiaso Taʻitasi Ina ia Malamalama ai i le Tusi Paia?” O loo faamatala mai i le sāvali e faapea, e mafai ona fuafua le suʻesuʻega faale-Tusi Paia i se taimi ma se nofoaga e talafeagai mo le tagata suʻesuʻe, pe i le toʻafilemu o lona lava aiga pe faia foʻi e ala i le telefoni. O ai e mafai ona auai ai i le talanoaga? Ua tali mai le sāvali: “O lou aiga atoa. So o se uō foʻi e te manaʻo e valaaulia e mafai ona auai. Ae afai e te lē manaʻo i ai, e mafai ona fai le talanoaga tau lava o oe.” O le ā le umi e tatau ai ona suʻesuʻe se tasi? Ua faamatala mai i le sāvali: “E toʻatele ua faaavanoaina se itula i vaiaso taʻitasi e suʻesuʻe ai le Tusi Paia. Afai e mafai ona e faaalu se taimi e sili atu pe itiiti ifo foʻi i vaiaso taʻitasi, e mafai e Molimau ona faaavanoa atu i latou lava e fesoasoani iā te oe.” O le manatu tāua lenā! E matou te naunau e fetuutuunaʻi e tusa ai ma tulaga o tagata suʻesuʻe taʻitoʻatasi.
6 “O se Valaaulia Ina ia Faia se Suʻesuʻega”: Ua saunia se kuponi ina ia mafai ai e lē o loo taliaina le sāvali ona talosagaina le polosiua o le Manaomia po o le asiasi atu foʻi o se tasi e faamatala atu le polokalame o le faia o suʻesuʻega faale-Tusi Paia i le aiga e aunoa ma se totogi. O le faavaa o le polosiua o le Manaomia, o loo faaalia i ata lanu. Po ua e iloa mai le māfuaaga o le a faalaeiau ai e lenei sāvali le toʻatele o tagata loto faamaoni e talia la tatou fesoasoani? O lea la, e mafai faapefea ona tatou faaaogā i se auala sili lenei meafaigaluega fou?
7 Iā te Ai e Mafai Ona E Ofo i ai le Sāvali? E mafai ona e avatu e oe lava le sāvali i tagata pe tuu foʻi i fale e lē maua atu i ai ni tagata. E mafai ona tufatufa atu i lea fale i lea fale, i le alatele, ma oganuu o pisinisi. Ofo le sāvali i tagata e tusa lava pe latou te talia pe teena a tatou mekasini. Tuu i totonu o mekasini po o isi lomiga na e tufa atu i tagata. Tuu i totonu o ni tusi e te tusia. Ofo e aauina atu i le meli i tagata na e te talanoa atu i ai i le telefoni. Ia iai pea ni kopi o le sāvali i lau ato e tufa atu pe a e alu e te faatau, pe i auala o femalagaaʻiga mo le lautele, ma pe a e molimau atu lē fuafuaina. Avatu i so o se tagata lava e alu atu i lou fale. Ofo le sāvali i ou tauaiga, tuaoi, tagata tou te faigaluega faatasi, aʻoʻoga faatasi, ma isi lava e te masani ai. Taumafai e tufa atu lenei sāvali i tagata uma lava e tou te feiloaʻi! Ona ā lea?
8 Pe Afai e Vave Ona Tali Mai le Tagata: O le a vave lava ona tali mai nisi tagata i le faapea mai, e latou te mananaʻo e fai se suʻesuʻega faale-Tusi Paia. O le mea lea, e so o se taimi lava e te auai ai i le galuega o le auaunaga i le fanua, ia faamautinoa ua iai ni au kopi se lua o le polosiua o le Manaomia i lau ato—e tasi mo le tagata suʻesuʻe ma le isi mo oe. Afai e manaʻo ai le tagata, ia amata loa lava le suʻesuʻega i le taimi lava lenā. Suʻe le pito i totonu o le faavaa, ma faitau le faatonuga “Le Auala e Faaaogā ai Lenei Polosiua.” Ona ō saʻo lava lea i le lesona 1, ma faataʻitaʻi le faiga o le suʻesuʻega. Pe e lē faigofie ea lenei taulimaga?
9 Pe a Manaʻomia e Lē o Faalogologo iā te Oe se Taimi e Mafaufau Ai: A o leʻi mavae se taimi umi, taumafai e toe faafesootaʻi le tagata. Pe a e faia faapea, ia mautinoa ua iai sau polosiua o le Manaomia. Ia faaali iā te ia le faasologa o mataupu i le pito i totonu o le faavaa i luma. Tuu i ai e na te filifilia se mataupu e sili ona ia fiafia i ai. Suʻe i ai ma talanoa loa le lesona na ia filifilia.
10 Toe Asia i Latou na Tuu ai Mekasini: Afai sa e tuu se sāvali faatasi ma se seti o mekasini, e mafai ona e toe foʻi atu ma faaaogā le taulimaga lenei: “I laʻu asiasiga talu ai, na ou fiafia ai e tuu iā te oe se kopi o le mekasini o Le Olomatamata. Atonu sa e mātauina o le igoa atoa o le mekasini e faapea, Le Olomatamata Faasilasilaina le Malo o Ieova. I le aso lenei, ou te fia faamatala atu ai iā te oe po o le ā lenei Malo ma o le ā o le a uiga i ai mo oe ma lou aiga.” Ona suʻe lea o le polosiua o le Manaomia i le lesona e 6. Ia amata i le palakalafa muamua, faitau ma talanoa i le tele e mafai ai e tusa ma le taimi o lē e ona le fale. Ia, ona fai lea o se fuafuaga e toe foʻi atu i se isi aso e faauma le lesona.
11 Aua Neʻi Leai ni Au Sāvali: E ao i le ovasia o le auaunaga ma le uso o loo gafa ma lomiga ona vaai po ua lava le sapalai o sāvali, Iloa le Tusi Paia i le potu tusi a le faapotopotoga i taimi uma lava. Tuu ni sāvali i le taga o lou ofu po lau tamaʻi ato, i totonu o lau taavale, i le mea e te faigaluega ai, i le aʻoga, i tala ane o le faitotoʻa o lou fale—i so o se mea e maua gofie ai. Ioe, ave ni sāvali i lau ato talaʻi mo taimi e te feiloaʻi ai i se tagata e mafai ona e talanoa atu i ai e uiga i le Tusi Paia.
12 Tau Ina ia Faamanuia e Ieova a Tatou Taumafaiga: O le sini moomia lava mo Kerisiano uma, o le aʻoaʻo lea o le upu moni i se isi tagata. (Mata. 28:19, 20) Po o e faia se suʻesuʻega faale-Tusi Paia i le aiga ma se isi i le fanua i le taimi nei? Afai o e faia, pe mafai ona e maua se taimi mo se isi i lau faasologa faalevaiaso? Afai e te lē o faia nei se suʻesuʻega, e mautinoa lava o loo e manaʻo e faia se suʻesuʻega. Tatalo mo le faamanuiaga a Ieova i au taumafaiga e saʻili se tasi e mafai ona lua suʻesuʻe. Ia, ona galue lea ia ōgatasi ma na tatalo.—1 Ioa. 5:14, 15.
13 Ua tatou maua se meafaigaluega fou mo le amataina o suʻesuʻega! Ia faamasani i ai. Tufatufa atu i so o se avanoa. Ia fai mea uma e te mafaia ina ia ‘agalelei atu, ia tamaoaiga i galuega lelei, ia mataalofa, ia avatu fua’ mea na e aʻoaʻoina e uiga i le Afioga a le Atua.—1 Timo. 6:18.
[Pusa i le itulau 4]
AVANOA E TUFATUFA ATU AI LE SĀVALI
◼ Talanoaga i lea aso ma lea aso
◼ Pe a talia e se tasi a tatou lomiga
◼ Pe a lē maua atu se tagata i le fale
◼ Pe a faia a tatou toe asiga
◼ Pe a tatou fetaui ma se tagata a o molimau atu i le auala
◼ Pe a tatou molimau atu i oganuu o pisinisi
◼ Pe a molimau atu lē fuafuaina
◼ Pe a tusia ni tusi
◼ Pe a malaga i auala o femalagaaʻiga mo le lautele
◼ Pe a asiasi mai se tasi i lou fale
◼ Pe a talanoa ma ou tauaiga, tuaoi, ē e faigaluega faatasi, aʻoʻoga faatasi, ma isi e tou te masani