Ia Atiina Aʻe Lou Tomai Faalemafaufau
1 O aso faigatā e gata ai, o loo tatou ola ai nei, ua aumaia le tele o omiga ma ituaiga eseese o tofotofoga ogaoga i tagata o le Atua i so o se mea. (2 Timo. 3:1-5) E manaʻomia e i tatou faalaeiauga ina ia tumau mausalī ai i le faatuatua. (1 Kori. 16:13) E mafai ona tatou faia faapea i le fesoasoani mai a Ieova a o faaauau ona fafagaina e lē aunoa i tatou i lana Afioga, faalagolago atu i lona agaga, ma pipii vavalalata atu i lana faalapotopotoga.—Sala. 37:28; Roma 8:38, 39; Faaa. 2:10.
2 Ona o māfuaaga aogā, na talanoaina ai le matua “Ia Avea ma Tagata Matutua i Tomai o le Malamalama” i le polokalame o le aso faapitoa o fonotaga i le tausaga na teʻa nei. Na faavae mai le 1 Korinito 14:20 (NW), lea tatou te faitau ai i upu a le aposetolo o Paulo e faapea: “Uso e, aua neʻi avea outou ma fanau iti i tomai o le malamalama, ae ia tamameamea i mea leaga; peitaʻi ia avea ma tagata matutua i tomai o le malamalama.” O le ā sou manatu e uiga i le polokalame?
3 “Maʻeu le faalaeiauina ai!” “O le mea tonu lava lea na matou manaʻomia!” Ua na o ni manatu faaalia na se lua. E oo lava i se tasi e lē o se Molimau na auai i le aso faapitoa o fonotaga, e fia matamata i le papatisoga o lona afafine e 12 tausaga le matua na faapea mai, sa ia matuā maofa i le polokalame ma sa ia mafai ona iloa le aogā o le a iai i lona aiga. Po o lou lagona foʻi lenā? Seʻi o tatou tomanatu i nisi o manatu tāua o le polokalame.
4 E Manaʻomia le Poto Saʻo e Atiina Aʻe ai o Tatou Tomai Faalemafaufau: I le lauga amata, “Ia Atiina Aʻe Nei Ou Tomai o le Malamalama,” o le ā na faamamafa mai e le failauga e manaʻomia ina ia faafetaiaʻia ai luʻi i aso nei? E sili atu na i lo ni tomai faalemafaufau. E tatau ona tatou atiina aʻe ma faalolotoina o tatou tomai o le malamalamaga faale-Tusi Paia, ina neʻi faatoʻilaloina i tatou i mea leaga uma tatou te fetaiaʻi. O lenei malamalamaga e manaʻomia ai le taʻitaʻiga tauatua. I le pei o le faisalamo, tatou te tatalo e talosaga atu ai iā Ieova ina ia faalotomatalaina pe faamalamalamaina i tatou i ana tulafono ma upu faamanatu, ina ia tatou auauna ai ma le loto atoa iā te ia.—Sala. 119:1, 2, 34.
5 I le vaega na sosoo ai, na faailoa mai ai e le ovasia o le matagaluega e faapea, ua saunia mai e Ieova mo i tatou “O Fesoasoani Ina ia Avea ma Tagata Matutua i le Malamalamaga o le Tusi Paia”, e ala mai i lana Afioga ma le faalapotopotoga. Na faamatalaina le malamalama e faapea “o le tomai lea e tagaʻi atu ai i se mataupu ma iloa mea o loo faia aʻe ai, e ala i le manino i sootaga o ona vaega eseese agaʻi i le mataupu atoa, ma iʻu ai i le mauaina o lona uiga.” O ai e mafai ona fesoasoani iā i tatou i le atiina aʻe o lenei tomai? Ua saunia e Ieova meaalofa i tagata e fesoasoani iā i tatou e agaʻigaʻi ai i luma faaleagaga. (Efe. 4:11, 12) Ua uunaʻia i tatou e lana faalapotopotoga faalelalolagi ina ia faitau i le Afioga a le Atua i aso uma ma auai e lē aunoa i sauniga uma a le faapotopotoga. (Sala. 1:2) Ua aʻoaʻoina i tatou i le auala e faaaogā ai le Tusi Paia ma a tatou lomiga faa-Kerisiano i suʻesuʻega totino ma suʻesuʻega faaleaiga, atoa ma le sauniuni ai mo sauniga ma le auaunaga i le fanua. Po ua e faaaogāina tatau ea nei sauniuniga uma? Po o e tausisia ea se polokalame o le faitauina totino o le Tusi Paia e lē aunoa? E tāua tele lenei, pe afai tatou te puipuia i tatou mai le maileia i āʻega, tifiga, filosofia, ma taaʻiga taufaasesē a le lalolagi.—Kolo. 2:6-8.
6 E Tatau Ona Toleniina o Tatou Tomai Faalemafaufau: I lana uluaʻi lauga, ua faamatuaina “Ia Leoleomalu le Itu Faaleagaga i le Toleniina o Ou Tomai Faalemafaufau,” na faamatalaina ai e le failauga asiasi faapea e lē mafai e i latou o i le lalolagi ona iloa le eseesega o le mea saʻo mai le mea sesē. (Isa. 5:20, 21) Ua māfua lenei mea, talu ai ua latou mumusu e fiailoa ma tausia faatulagaga amiotonu a le Atua. I lona tuufaafeagai, ona ua tatou maua le toleniga faaleagaga i le faalapotopotoga a Ieova, ua tatou iloa ai tapulaa a le Atua, lea e taʻitaʻia ai a tatou galuega ma amioga. O lea, ua tatou iai i se tulaga e faamaonia ai iā i tatou lava le mea saʻo ma mālie i le silafaga a Ieova ma mea e ōgatusa ma lona finagalo lelei atoatoa.—Roma 12:2.
7 Ina ia ʻalofia mafaufauga lavelave a le lalolagi ma ona fua leaga e iʻu i ai, e ao ona faaauau ona toleniina o tatou tomai faalemafaufau. E faapefea ona ausia lenei mea? E pei ona faamauina i le Eperu 5:12-14, na faamamafa ai e le aposetolo o Paulo le manaʻomia ona fafagaina i mea e sili atu i lo o le “suāsusu” o le upu. E tatou te manaʻomia meaʻai aano faaleagaga, e pei ona tatou mauaina a o suʻesuʻeina polosiua i le Suʻesuʻega Tautusi a le Faapotopotoga. O lea e ao ai ona tatou lē faatalatū e faatatauina i o tatou olaga mea o tatou aʻoaʻoina. Pe afai tatou te faia faapea, e faatalitonuina ai i tatou i le saʻo o mataupu silisili ma tapulaa a Ieova. E toleniina ai e lenei mea o tatou tomai faalemafaufau e iloa manino ai le mea saʻo mai le mea sesē.
8 E faanoanoa e faapea atu, ua vaivai nisi faaleagaga. Aiseā? Ua latou lē taulaʻi atu i le mea ua lelei ma tonu i le silafaga a Ieova. O le iʻuga, ua aafia nisi i felafolafoaʻiga i luga o leitiō ma televise o loo faia ai ni faatalanoaga o mataupu e feteenaʻi ma le Tusi Paia, i musika lē taupulea, po o aafiaga leaga i polokalame o talanoaga faakomepiuta. E ala i le gaoioi ma le poto, o le a tatou ʻalofia ai le aafia i taaʻiga a tagata amio matagā, vālea, pe amioleaga.—Faata. 13:20; Kala. 5:7; 1 Timo. 6:20, 21.
9 E Ao i Talavou Ona “Tamameamea i Mea Leaga”: E lua vaega o le polokalame sa faalaeiauina patino ai talavou ina ia atiina aʻe o latou tomai faalemafaufau. Na faaalia e le failauga faapea o le uiga o le avea ma “tamameamea i mea leaga” o le tumau lea ona leai se poto masani, i se isi ona faaupuga, ia lē ponā e pei o pepe, i le faasino atu lea i mea e lē mamā i le silafaga a Ieova. (1 Kori. 14:20, NW) Na faalaeiauina i tatou uma ina ia matuā faaeteete i le auala e faaaogā ai o tatou taimi, ina ia tetee atu i le aafia i mea leaga eseese ma ʻalofia le pisia ai. (Efe. 5:15-17) Na faalaeiauina i tatou ina ia fuaina lelei le aofaʻiga o le taimi o loo tatou faaaluina e faitau ai faamatalaga e lē iai sona vaega tuusaʻo i le faateleina o lo tatou malamalama i mea faaleagaga. Pe na e faia faapea? O le ā na faailoa mai e iʻuga na iai? E faaopoopo atu i le faitauina e lē aunoa o le Tusi Paia, ia maumauaʻi e faitauina pea lomiga o loo saunia mai e le faalapotopotoga. O le faia faapea o le a fesoasoani ai iā i tatou uma, e aofia ai ma talavou, ina ia “maua mai ai le atamai [“malamalama,” NW].”—Faata. 4:7-9.
10 “Ia Maua Aogā Mai le Faatatauina ma le Malamalama o Mataupu Silisili o le Tusi Paia”: O le matua lenā o le lauga faaiʻu o le polokalame o le aso faapitoa o fonotaga. Na faamatalaina e le failauga asiasi e faapea o Ieova o le Puna o le malamalama foaʻi ola, lea e matuā maoaʻe atu na i lo le malamalama o tagata uma. Seʻi mafaufau i le mauaina o se avanoa e utufia mai ai i le malamalama o Ieova! E na te foaʻi mai ma le agaalofa iā i latou o ē saʻili atu ma le faamaoni i le malamalama ma ole atu i ai i le faatuatua. (Faata. 2:3-5, 9; 28:5) Po o e faaaogāina tatau ea lana foaʻi?
11 Na faalaeiauina i tatou ina ia aʻoaʻoina e mātaulia mataupu silisili a o tatou faitauina le Tusi Paia. (2 Timo. 3:16, 17) Ia suʻesuʻe ma le faaeteete i ai ina ia maua se malamalamaga saʻo i fetalaiga a Ieova. Ia faaalu se taimi e mafaufau loloto ai i nei mataupu silisili ma tāmau i lou mafaufau ma le loto. O le a toleniina e lenei mea lou tomai faalemafaufau ina ia mafai ona e taulau manuia ai i le faia o filifiliga i le olaga. (Iosua 1:8) Seʻi o tatou iloiloina nisi o tulaga o loo fesagaʻia e le toʻatele ma vaai pe mafai faapefea ona fesoasoani iā i tatou le faatatauina o mataupu silisili o le Tusi Paia ina ia taulau manuia ai.
12 ‘Pe e tatau ona ou faataʻitaʻi i se ituaiga patino o laʻei ma teuga?’ O tifiga o loo āʻe mai i laʻei ma teuga a le lalolagi e masani lava ona faaatagia mai ai le agaga o le fouvale. O se agaga faapena e taaʻina ai tagata ina ia laʻei i se auala faatalalē ma le lē onomea, pe laʻei foʻi i se uiga faatosina faaleituaiga. O ā mataupu silisili tāua faale-Tusi Paia o le a fesoasoani iā i tatou ina ia faafetaiaʻia ai na faanaunauga? O le toleniina o o tatou tomai faalemafaufau, o le a tatou iloiloina ai le mataupu silisili o loo i le 1 Timoteo 2:9, 10, ia oofu i ofu ma “ia le teuanoai, a ia [faatagatamatua] . . . , o le mea lea e tatau i [tagata] ua taʻua latou e i latou o e amio Atua.” O isi mataupu silisili e faatatau i ai e aofia ai ia o loo taʻua i le 2 Korinito 6:3 ma le Kolose 3:18, 20.
13 ‘O le ā e mafai ona ou faia ina ia tausia ai pea le malolosi o faiā a loʻu aiga?’ E matuā tāua fesootaʻiga lelei a tagata uma o le aiga. Ua taʻu mai iā i tatou e le Iakopo 1:19: “Ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.” E manaʻomia i tagata o le aiga ona faalogologo ma talanoa le tasi i le isi, ona o fesootaʻiga i aiga o se mea e fetufaaʻi ai manatu o tagata uma ae lē na o se toʻatasi. E ui lava o mea o loo tatou fai atu ai e moni, ae pe a fai atu i se auala sauā, faamaualuga, pe i se uiga lē magafagafa, e masani lava ona sili atu ona faamanuʻalia ai na i lo se lelei e maua ai. O lea, e tusa lava pe o i tatou o se tane po o se avā, se matua po o se tamaitiiti, e tatau i a tatou faaupuga ona “le aunoa . . . ma le alofa, ia faamāi i le masima.”—Kolo. 4:6.
14 ‘Po o aafia ea aʻu i le matapeʻapeʻa i meafaitino?’ O le matapeʻapeʻa i meafaitino o se omiga mai le lalolagi e faafaigatā ai le olaga o se tasi. E lē faigofie ai ona maua e tagata le fiafiaga moni. (Fai. 5:10; Luka 12:15; 1 Timo. 6:9, 10) Ina ia fesoasoani iā i tatou e ʻalofia le mailei o le matapeʻapeʻa i meafaitino, na aʻoaʻo mai ai e Iesu iā i tatou lenei mataupu silisili tāua: Tausisia se vaaiga faafaigofie. O le ola i se olaga paleni, e lē soona lavelave naʻuā e aofia ai le taulaʻi atu o la tatou vaai i manaʻoga o le Malo, ae lona lua ai isi mea uma.—Mata. 6:22, 23, 33.
15 O le ā lo Tatou Sini e Tatau Ona Iai?: Ua tatou mauaina i le Afioga a le Atua se puna maufaatuatuaina o mataupu silisili amiotonu e taʻitaʻiina ai i tatou i le faia o filifiliga. E manaʻomia ona tatou aʻoaʻoina nei mataupu silisili, ia mafaufau loloto i ai, ma ia malamalama i le auala e faatatauina ai i o tatou olaga. O lea, e ala i le ‘toleniina o o tatou tomai faalemafaufau e iloa ai le mea saʻo mai le mea sesē,’ o le a tatou manuia ai ma faamamaluina ai Ieova.—Epe. 5:14, NW.