Ia Lotomalie i Mea ua E Maua

¹ Ua apoapoaʻia i tatou e le Tusi Paia ina ia tausia o tatou aiga i mea faaletino, ae e lē tatau ona avea lenei mea ma sini autu o o tatou olaga. E tatau ona faamuamua mea faaleagaga. (Mata. 6:33; 1 Timo. 5:8) Ua avea o se luʻi i nei “aso faigata” le taumafai ina ia ola i se olaga talafeagai. (2 Timo. 3:1) O le ā o le a fesoasoani iā i tatou e faia ai faapea?

² Ia Talia Manatu o le Tusi Paia: Ua lapataʻia i tatou e le Afioga a le Atua e faapea, o le saʻilia o ʻoa faaletino, e mafai ona faaleagaina ai faaleagaga. (Fai. 5:10; Mata. 13:22; 1 Timo. 6:9, 10) I lenei vaitaimi faigatā, o le a avea o se mala mo so o se tasi o i tatou le soona pupū atu i galuega totogi, po o le popole i tupe, ma tatou manatu māmā ai ma lē faamuamuaina ai i o tatou olaga ia gaoioiga faaleagaga, o sauniga, suʻesuʻega, ma le auaunaga. (Luka 21:34-36) I se faaeseesega, ua fautua mai le Tusi Paia e faapea: “Afai ua maua e i tatou o mea e aai ai ma mea e oofu ai, ia gata ai o tatou manao.”—1 Timo. 6:7, 8.

³ E lē o le uiga o lenei mea e faapea, e manaʻomia ona ola matitiva Kerisiano. Ae e fesoasoani lea iā i tatou ina ia iloa ai po o ā moni lava meafaitino o loo tatou manaʻomia, o meaʻai, lavalava, ma fale talafeagai e tatou te nonofo ai. Pe afai ua maua mea e tatou te manaʻomia i le olaga, e lē tatau la ona tatou soona saʻilia ni olaga ma ni tulaga e sili atu ona lelei. Pe afai e fia faatau mai se mea pe fia faia se isi galuega faaopoopo, e lelei ona tatou fesili ifo iā i tatou lava, ‘Pe e manaʻomia moni lenei mea?’ O le faia faapea, o le a fesoasoani iā i tatou e utagia ai le fautuaga faagaeeina e faapea: “Ia aunoa a outou amio ma le matapeapea; ia gata ia o outou manao i mea ua ia te outou.”—Epe. 13:5.

⁴ Afai e tatou te faatuatua iā Ieova, o le a ia fesoasoani iā i tatou. (Faata. 3:5, 6) E ui e tatau ona tatou galulue mamafa ina ia maua mea e manaʻomia i aso taʻitasi, ae e lē tatau ona avea na mea ma sini i o tatou olaga. E tusa lava pe laʻitiiti pe tele mea ua tatou maua, ae tatou te faalagolago iā Ieova e na te faamalieina o tatou manaʻo. (Fili. 4:11-13) O le iʻuga, e tatou te olioli ai i le lotomalie mai le Atua faatasi ai ma le tele o isi faamanuiaga.

⁵ Faataʻitaʻi i le Faatuatua o Isi: O se matua nofo toʻatasi o lē na tausia aʻe lana tama teine i ala o le upu moni, sa faasolosolo ona faafaigofieina lona olaga. E ui sa fiafia o ia i se fale e lelei tele, ae sa siitia atu o ia i se fale e laʻitiiti atu, ma mulimuli ane i se fale sa sili atu ona laʻitiiti. O lenei tulaga na mafai ai ona faaitiitia ona itula faigaluega i se galuega totogi ina ia mafai ai ona faateleina lona taimi i le faiva. Ina ua matua lana tama teine ma faaipoipo, sa vave ona mālōlō le tinā mai lana galuega a o leʻi oo i le taimi e faia ai faapea, e ui lava sa faaitiitia ai lana tupe maua. Ua fitu nei tausaga talu ona paeonia sauatoa lo tatou tuafafine, ma e leai ni mea na ia lē fiafia ai ona o mea faaletino na ia faataulagaina ina ia faamuamua ai le Malo i lona soifuaga.

⁶ Sa paeonia se toeaina ma lana avā mo le tele o tausaga a o tausia la laʻua fanau e toʻatolu. Sa aʻoaʻoina e lo latou aiga ina ia lotomalilie e ala i le faamalieina o o latou manaʻoga na i lo o le tuʻinanau e fia mauaina mea sa latou mananaʻo i ai. Ua faapea mai le uso: “Sa tatau ona matou ola i se olaga e sili atu ona faigofie. E ui lava sa iai ni taimi faigatā na oo iā i matou, ae e saunia pea e Ieova mea na matou manaʻomia. . . . Ina ua ou iloa ua faamuamua e loʻu aiga manaʻoga faaleagaga, ua ou lagona ai e faapea, ua tulaga saʻo mea uma e pei ona tatau ai, ma ua ou lagona ua taulau manuia taumafaiga.” Ua faaopoopo mai lana avā e faapea: “Ou te lagona le matuā faamalieina pe a ou iloa ua pisi [laʻu tane] i mea faaleagaga.” E fiafia foʻi tamaiti latou ona ua filifili o latou mātua e auauna faataimi atoa iā Ieova.

⁷ Ua folafola mai e le Tusi Paia le anoanoaʻi o faamanuiaga mo i latou uma lava e filifilia sea auala o le tuutoina i le Atua na i lo le saʻilia o mea faitino, e lē gata i le taimi nei ae faapea foʻi le ola atalī.—1 Timo. 4:8.