Ia Faaalia le Faamaoni Faa-Kerisiano pe a Faateʻaina se Tasi o le Aiga
1. O le ā le tulaga e mafai ona tofotofoina ai le faamaoni o se Kerisiano?
1 E mafai ona matuā malolosi le sootaga i le va o tagata o le aiga. E mafai ona tofotofoina se Kerisiano i lenei mea pe afai e faateʻaina pe vavaeeseina se paaga faaipoipo, se tasi o le fanau, se matua, po o se tauaiga vavalalata o ia lava mai le faapotopotoga. (Mata. 10:37) E ao faapefea ona feagai Kerisiano faamaoni ma sea tagata faateʻaina? Po o le a iai ea se eseesega pe afai e nofo lea tagata i lou aiga? Muamua, seʻi o tatou tilofaʻia le mea o fai mai ai le Tusi Paia e uiga i lenei mataupu, i mataupu silisili ia e tutusa lo latou faatatauina i tagata ua faateʻaina ma i latou ua vavaeeseina i latou lava mai le faapotopotoga.
2. E tusa ai ma le faamatalaga a le Tusi Paia, e faapefea ona feutagaʻi Kerisiano ma i latou ua faateʻaina mai le faapotopotoga?
2 Le Auala e Feutagaʻi ai ma i Latou ua Faateʻaina: Ua poloaʻi e le Afioga a le Atua Kerisiano ina ia aua neʻi feoaʻi pe faifaimea faatasi ma se tagata ua faateʻaina mai le faapotopotoga: “Ai se tasi ua taʻuusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava neʻi tou feoai, aua foi tou te aai faatasi ma le o faapea. . . . ia faateaeseina e outou lena tagata amio leaga ia te outou.” (1 Kori. 5:11, 13) E mafai foʻi ona faatatauina iai upu a Iesu o loo faamauina i le Mataio 18:17, LF: “Ia avea o ia [lē ua faateʻaina] ia te oe, ia pei o le faapaupau, po o le tagata ao lafoga.” Sa iloa lelei e le ʻaufaalogologo a Iesu, sa leai ni fesootaʻiga a tagata Iutaia ma tagata o Nuu Ese i na aso, ma sa latou teena le ʻauaolafoga e faapea o tagata ua tuulafoaʻiina. I lea, na poloaʻiina ai e Iesu ona soo ina ia aua neʻi auaufaatasi ma ē ua faateʻaina.—Tagaʻi i le Watchtower o Setema 15, 1981, itulau 18-20.
3, 4. O ā ituaiga o aufaatasiga ma tagata ua faateʻaina ma i latou ua vavaeese i latou lava e faasāina?
3 O le uiga o lenei mea, e leai ni aufaatasiga faaleagaga a Kerisiano faamaoni ma so o se tasi ua faateʻaina mai le faapotopotoga. Ae e tele isi mea o loo aofia ai. Ua taʻua i le Afioga a le Atua e faapea, “aua foi tou te aai faatasi ma le o faapea.” (1 Kori. 5:11) I lea, e lē tatau foʻi ona tatou auaufaatasi ma se tagata ua faateʻaina. E aofia ai le auai ma ia i se tafaoga, se fiafia, taaloga, pe malaga faatasi atu e fai se faatauga, pe ō faatasi i se tifaga pe aai faatasi foʻi ma ia i le aiga po o se faleʻaiga.
4 Ae faapefea le talanoa atu i se tagata ua faateʻaina? Ona e lē o taʻua i le Tusi Paia tulaga talafeagai uma, ae ua fesoasoani mai le 2 Ioane 10 iā i tatou ina ia maua le silafaga a Ieova e faatatau i mataupu: “Pe a alu atu ia te outou se tasi a e le molia lenei lava aʻoaʻoga, aua tou te talia o ia i o outou fale, aua foi tou te ofo alofa ia te ia.” I le faia o se faamatalaga i lenei mataupu, o loo taʻua i le Watchtower o Setema 15, 1981, itulau 25: “I le na o se faatalofa atu i se tagata ua faateʻaina e mafai ona avea ma uluaʻi laasaga e amataina ai se talanoaga ma atonu e oo ai lava i se faauōga. Pe e tatou te mananaʻo e faia lenā uluaʻi laasaga ma se tagata ua faateʻaina?”
5. Pe a faateʻaina, o ā mea ua melea e lea tagata?
5 O le mea moni, e pei lava ona taʻua i le itulau e 31 o le lomiga lava lea o le Watchtower e faapea: “O le mea moni, pe afai e lolo atu se Kerisiano i le faia o le agasala ma faateʻaina ai, e tele lava ni mea ua ia melea: o lona tulaga faamaonia i luma o le Atua; . . . le aufaatasiga manaia ma uso, e aofia ai ma le tele o aufaatasiga na ia maua ma ona tau aiga Kerisiano.”
6. Pe e tatau i se Kerisiano ona taofia aufaatasiga uma ma se tasi o le aiga ua faateʻaina lea o loo latou nonofo faatasi? Faamatala.
6 I Totonu o le Aiga: Po o le uiga o lenei mea, o Kerisiano o loo nonofo faatasi ma se tasi o le aiga ua faateʻaina, e tatau ona ʻalofia le toe talanoa atu iā te ia, aai ma faifaimea faatasi ma ia a o faia a latou feʻau masani o le aso? Ua faapea mai le faaopoopoga i le pito i lalo o Le Olomatamata o Aokuso 15, 1991, itulau e 18: “Afai e iai i se aiga Kerisiano se tauaiga ua faateʻaeseina, o le a avea pea lenā tagata ma vaega o feutagaʻiga ma gaoioiga masani a le aiga i aso taʻitasi.” I lea, o le a tuu i le faitalia o tagata o le aiga ina ia filifilia pe faaaofia lē ua faateaina o le aiga pe a aai pe faia foʻi isi gaoioiga i le fale. Ma e tatau ai ona faaeteete i latou ina ia lē avatu i uso o loo latou faifaimea faatasi le manatu e faapea, o loo sologa lelei pea mea uma e pei ona sa iai a o leʻi faateʻaina lea tagata.
7. E faapefea ona suia aufaatasiga faaleagaga i le aiga pe afai ua faateʻaina se tasi o le aiga?
7 Ae peitaʻi, ua faailoa mai i le Watchtower o Setema 15, 1981, itulau e 28, le manatu e faatatau i se tagata ua faateʻaina po o se tasi na vavaeese o ia lava mai le faapotopotoga: “O fesootaʻiga faaleagaga uma na faia muamua, ua matuā motusia uma lava. E faapena foʻi i ona aiga vavalalata, e aofia ai ma ona tauaiga. . . . O lona uiga, ua suia aufaatasiga faaleagaga atonu sa faia muamua i le aiga. Mo se faaaʻoaʻoga, afai o le tane lea ua faateʻaina, o le a lē lelei la mo le avā ma lana fanau ona toe faia se suʻesuʻega faale-Tusi Paia faaleaiga ma ia, pe taʻimua i le faia o le faitauga Tusi Paia ma le faia o se tatalo. Pe afai e manaʻo o ia e fai se tatalo i le taimi o le taumafataga, e iai lana aiā e faia ai faapea i lona lava fale. Ae e mafai e tagata taʻitoʻatasi o le aiga ona fai lana ia lava tatalo lē leoa i le Atua. (Faata. 28:9; Sala. 119:145, 146) Ae faapefea pe afai e manaʻo lē ua faateʻaina i le aiga e auai a o fai faatasi le faitauga Tusi Paia a le aiga po o le suʻesuʻega faale-Tusi Paia? E mafai ona faataga o ia e auai e faalogologo pe afai o le a lē taumafai o ia e aʻoaʻo i latou pe tufa atu ona manatu faalotu.”
8. O le ā le tiute tauave a mātua Kerisiano i se tamaitiiti laʻitiiti ua faateʻaina ae o loo i lalo o la laʻua vaavaaiga, ma o loo nofo i le aiga?
8 Afai o le tamaitiiti lea ua faateʻaina e nofo i le aiga, e iai pea i mātua Kerisiano le tiute tauave o le tausia o ia. O loo taʻua i Le Olomatamata o Iuni, 1989, itulau e 32: “E pei lava ona o le a faaauau pea ona la avatu iā te ia o meaʻai, lavalava, ma le fale e nofo ai, e manaʻomia ai ona la faatonu ma aʻoaʻi iā te ia ia ōgatasi ma le Afioga a le Atua. (Faata. 6:20-22; 29:17) E mafai la ona fuafuaina e mātua alolofa e faia se suʻesuʻega faale-Tusi Paia ma ia, e tusa lava pe ua faateʻaina. Atonu o le a sili ona ia maua mai ai aogā e faasaʻoina ai pe afai e suʻesuʻe na o i laʻua ma ia. Pe atonu la te filifili foʻi e mafai ona faaauau pea ona fai sona sao i faatulagaga o le suʻesuʻega faaleaiga.”—Tagaʻi foʻi i Le Olomatamata o Oketopa 1, 2001, itulau e 16-17.
9. O le ā le tele e ao i se Kerisiano ona faia ai ni fesootaʻiga ma se tauaiga ua faateʻaina e lē o nofo i le aiga?
9 Tauaiga e Lē Nonofo Faatasi: Ua taʻua i Le Olomatamata o Fepuari 1, 1989, itulau e 28 e faapea: “E ese le tulaga pe afai o lē ua faateʻaina po o lē ua vavaeese o ia lava mai le faapotopotoga, o se tasi o le aiga o loo nofo i fafo atu o le liʻo o le aiga pe e nofo ese mai le aiga. Atonu o se mea tatau ona matuā leai lava ni fesootaʻiga ma le aiga. E tusa lava pe e iai ni mataupu faaleaiga e tatau ona faafesootaʻia ai o ia, e mautinoa lava o lenei mea e tatau ona faia i se tulaga faatapulaaina,” ina ia ōgatasi ai ma le poloaʻiga a le Atua e “aua lava neʻi tou feoai, aua foi tou te aai faatasi ma le o faapea” o lē o loo faia le agasala ae lē salamō. (1 Kori. 5:11) E tatau i Kerisiano faamaoni ona tauivi e ʻalofia ia aufaatasiga lē tatau ma se tauaiga faapea, ma e tatau foʻi ona matuā faatapulaaina le faia o ni faiga faapisinisi ma sea tagata faateʻaina.—Tagaʻi foʻi i le Watchtower o Setema 15, 1981, itulau e 29-30.
10, 11. O le ā o le a manatunatu i ai se Kerisiano a o leʻi faatagaina se tauaiga faateʻaina e foʻi mai i le aiga?
10 Ua talanoaina i Le Olomatamata se isi tulaga e ono tulaʻi mai: “Ae faapefea pe afai o lē ua faateʻaina o se tauaiga vavalalata, e pei o se tasi o le fanau, po o se matua, ae e lē o nofo i le aiga, ma mulimuli ane ua manaʻo e toe foʻi mai i le aiga? E mafai ona filifili le aiga po o le ā le mea e fai, e faalagolago lava i le tulaga ua iai. Mo se faaaʻoaʻoga, atonu ua maʻi po ua lē toe mafai e se matua ua faateʻaina ona tausia o ia lava i le itu faaletino ma le tulaga tautupe. O le tiute tauave faale-Tusi Paia ma tau amio a le fanau Kerisiano, o le fesoasoani atu lea iā te ia. (1 Timo. 5:8) . . . E mafai ona faalagolago le mea e faia i vala e pei o manaʻoga moni o se matua, ona uiga faaalia ma popolega o le ulu o le aiga mo le lelei faaleagaga o le aiga.”—O le Watchtower o Setema 15, 1981, itulau e 28-29.
11 A o se tamaitiiti, ua faaauau mai lea lava mataupu: “I nisi taimi, e faataga ai e mātua Kerisiano se tamaitiiti faateʻaina e foʻi mai i le aiga mo sina taimi ona ua maʻi faaletino pe e tau i faalogona. Ae, e tusa ai ma nei tulaga, e mafai e mātua ona fuafua lelei tulaga o lea tagata. Pe sa nofo le atalii faateʻaina na o ia, ma ua lē mafai nei ona ia faia faapea? Po o le autū ua manaʻo ai o ia e toe foʻi mai i le aiga ona ua ia iloa o se olaga lea e sili atu ona faigofie? Ae faapefea ana amio ma ona uiga faaalia? Po o le a ia aumaia le ‘mea faafefete i le aiga?’—Kala. 5:9.”
12. O ā nisi aogā o le faatulagaga o le faateʻaina?
12 O Aogā o le Faamaoni iā Ieova: E aogā tele le felagolagomaʻi ma faatulagaga faale-Tusi Paia e faatatau i le faateʻaina ma teena ai tagata fai mea sesē lē salamō. E faatumauina ai le tulaga mamā o le faapotopotoga ma iloga ai i tatou o ni ē e tausia tapulaa maualuluga tau amio a le Tusi Paia. (1 Pete. 1:14-16) E puipuia ai i tatou mai taaʻiga e faaleagaina ai. (Kala. 5:7-9) E maua ai foʻi e lē ua fai mea sesē se avanoa e maua ai aogā atoatoa mai le aʻoaʻiga na tuuina atu, lea e mafai ona fesoasoani iā te ia e fuaina mai ai “le fua o le amiotonu.”—Epe. 12:11.
13. O le ā le suiga na faia e se tasi aiga, ma o le ā le iʻuga?
13 Ina ua uma ona faalogo i se lauga na faia i se fonotaga matagaluega, na iloa ai e se uso ma lona tuafafine le manaʻomia ona la faia o ni fesuiaʻiga i le auala e feutagaʻi ai ma lo la tinā, o lē o loo nofo i se isi nofoaga ma ua ono tausaga talu ona faateʻaina. Ina ua uma le fonotaga, na telefoni atu loa le uso i lona tinā, ina ua uma ona faamautinoa atu iā te ia lo la alofa, sa ia faamatala atu loa e faapea, e lē toe mafai ona la talanoa atu iā te ia, seʻi vagana lava ua iai ni manaʻoga tāua faaleaiga. E leʻi umi se taimi mulimuli ane, ae amata loa ona auai lona tinā i sauniga ma iʻu ai ina toe faaeaina. Sa amata foʻi ona suʻesuʻe e lana tane lē talitonu le Tusi Paia ma oo ina papatisoina.
14. Aiseā e ao ai ona tatou lagolagoina ma le faamaoni le faatulagaga o le faateʻaina?
14 O le manatu maualuga ma le faamaoni i le faatulagaga o le faateʻaina lea e otooto mai i le Tusi Paia, ua faaalia ai lo tatou alofa mo Ieova ma avatu ai se tali i lē o loo faifai iā te Ia. (Faata. 27:11) E mafai foʻi ona tatou mautinoa i le faamaoniga ma le taui a Ieova. Na tusi le tupu o Tavita e faatatau iā Ieova e faapea: “Na ou le tuueseina foi ana tulafono ia te au. E te amio alofa oe i le ua alofa; e te amiotonu oe i le ua amiotonu.”—2 Samu. 22:23, 26.