ʻAlofia “Mea Lē Aogā”

¹ O se tasi o auala taatele o fesootaʻiga i aso nei, o le Imeli (E-mail). E ui lava atonu e talafeagai ona fefaaaliaʻi ai mea tutupu ma manatu o tagata i aiga ma uō e ala i lenei auala o fesootaʻiga, ae o ā “mea lē aogā,” (NW) e mafai ona fesootaʻi atu i le soona faaaogāina ma le lē pulea o le Imeli?—Faata. 12:11.

² Mea e Tatau Ona Faaeteete i ai i le Faaaogāina o le Imeli: Ua manatu nisi, e sili atu ona lelei a latou fesootaʻiga ma le faalapotopotoga a Ieova pe a maua ni faamatalaga fou e ala i le Imeli. E aofia ai i nei mea ia mea tutupu, faamatalaga i mea tutupu i Peteli, tala i mala po o sauāga, e oo lava i faamatalaga faalilo e faasilasila atu i Aʻoga o le Faiva o le Malo mo toeaina. E foliga mai ua soona naunau lava nisi e auina atu na feʻau ma le manatu ia avea muamua i latou o ē e faailoaina atu na faamatalaga fou i a latou uō.

³ I nisi taimi, e faasesē ai pe soona faatele foʻi faamatalaga ma mea na tutupu, po ona o le gugutu, ua fai atu ai e nisi ni manatu sesē. O i latou e vave faaali atu na mataupu, e masani lava ona faia e aunoa ma le mauaina o faamatalaga uma. (Faata. 29:20) I nisi o tulaga, e tusa lava pe lē saʻo na faamatalaga, ae ua faasalalau atu lava ona o le faitatala. O na faamatalaga lē saʻo ma le taufaasesē, o ni “tala leaga,” ma e lē faaalia ai le amioatua moni.—1 Timo. 4:6, 7.

⁴ Pe afai e te faaali atu ni faamatalaga e iloa ane e lē saʻo, o oe la o le a paʻū i ai tulaga faanoanoa ma le fenuminumiaʻi ona o lenei mea. Ina ua oo mai iā Tavita se tala ua soona faatelē e faapea ua maliliu uma ona atalii, na ia “saeia ona ofu” i le faanoanoa. Ae peitaʻi, o le mea moni, e na o le toʻatasi o ona atalii na maliu. O se mea na matuā mafatia ai, ae o le soona faatele o tala lē saʻo, na faaopoopo ai mafatiaga iā Tavita. (2 Samu. 13:30-33) E mautinoa lava, e tatou te lē mananaʻo e faia so o se mea o le a taʻitaʻisesēina pe faalotovaivaia ai nisi o tatou uso.

⁵ Auala o Fesootaʻiga ua Tofia e le Atua: Ia manatua, e iai se auala o fesootaʻiga ua uma ona tofia e lo tatou Tamā faalelagi, o “le auauna faamaoni ma le mafaufau.” Ua iai i lenā “auauna” le tiute tauave, e filifili ai po o ā faamatalaga e mafai ona faailoa atu i le aiga o le faatuatua, ma le “taimi tatau,” (NW) e faailoa atu ai. E na o le faalapotopotoga lava a le Atua e mafai ona maua atu ai nei meaʻai faaleagaga. E tatau ona tatou vaavaai atu pea i le auala o fesootaʻiga ua tofia e le Atua e aumaia ai faamatalaga maufaatuatuaina, ae lē o le Initineti.—Mata. 24:45.

⁶ Nofoaga o Fesootaʻiga i le Initineti: E iai la tatou lava nofoaga o fesootaʻiga i le Initineti: www.watchtower.org. Ua lava ma totoe lenei nofoaga e avatu ai faamatalaga i le lautele. E lē manaʻomia ona faia e so o se tagata, se komiti, po o se faapotopotoga se faamatalaga e uiga i Molimau a Ieova i luga o le Initineti. Ua auina atu e nisi i luga o le Initineti ia mataupu o a tatou lomiga, faatasi ma mau uma ma faasinotusi, ma ua oo foʻi ina ofoina atu ni kopi o mataupu o fonotaga i ni meaalofa tauofo. E tusa lava pe maua ai ni tupe pe leai, ae o le toe faia o ni kopi o lomiga a Molimau a Ieova i le Initineti ma auina atu i isi, ua solia ai le tulafono tau i aiā. E ui ina ono manatu nisi o se mea lelei lea ua faia mo le ʻauuso, ae e lē faatagaina lenei mea, ma ua tatau nei loa ona faamuta.

⁷ O le faaalia o le faautauta ma le mafaufau lelei pe a faaaogāina fesootaʻiga i le Initineti, ua faamautinoa ai ua tutumu o tatou mafaufau “i oloa uma lava e tāua ma le matagofie.”—Faata. 24:4.