Ia Ola e Tusa ai ma lo Tatou Tuuina Atu
1 Po o oe o se tagata faatoʻā uma lava ona papatiso po ua leva foʻi, atonu o loo e manatua pea lenā laasaga tāua i lou olaga. O lo tatou papatisoga e lē o le iʻuga lea, ae o le amataga o lo tatou olaga tuuina atu faaleauaunaga lea e mafai ona tumau e faavavau. (1 Ioa. 2:17) O le ā e aofia ai i lo tatou ola e tusa ma lo tatou tuuina atu?
2 Mulimuli i le Faaaʻoaʻoga a Keriso: O le taimi lava na papatiso ai Iesu, ‘na amata ai lana galuega’ o le faalauiloaina o le “tala lelei o le malo o le Atua.” (Luka 3:23, LF; 4:43) O le tulaga foʻi lenā, pe a faailogaina lo tatou tuuina atu iā Ieova e ala i le papatisoga, ua tofia ai i tatou e avea o ni faifeʻau o le tala lelei. E ui e manaʻomia le tele o le taimi ma taumafaiga mo le mauaina o meafaitino manaʻomia o le olaga, ae o la tatou galuega autū lava o le faiva faa-Kerisiano. (Mata. 6:33) Na i lo le naunau e saʻilia le tamaoaiga po o le mamalu, o i latou ua tuuina atu i le Atua ‘latou te vivii i la latou faiva,’ e pei ona sa faia e le aposetolo o Paulo. (Roma 11:13) Po o e faatāuaina ea lou faaeaga o le auauna iā Ieova ma faia le mea silisili e te mafaia?
3 E pei o le tulaga o Iesu, e tatau ona tatou “tetee atu i le tiapolo.” (Iako. 4:7) Sa tofotofoina e Satani Iesu ina ua mavae Lona papatisoga, ma o loo ia taulaʻi mai foʻi i auauna tuuina atu a Ieova i aso nei. (Luka 4:1-13) Ona o loo siʻomia i tatou e le lalolagi a Satani, e tatau ona tatou faaalia le pulea totino ma ʻalofia so o se mea e faaleagaina ai o tatou mafaufau ma loto. (Faata. 4:23; Mata. 5:29, 30) Ua fautuaina Kerisiano e latou te “lē mafaia ona faatofutofusia i le laoʻai a [Ieova] atoa ma le laoʻai a temoni.” (1 Kori. 10:21) E manaʻomia ai i lenei mea ona tatou leoleo malu faasaga i faafiafiaga lē mamā, aumea leaga, ma lamatiaga i le Initineti. E tatau foʻi ona tatou ʻalofia faiga faa-aposetate. O le faaalia o le mataala i nei mea ma isi gaoioiga a Satani, o le a fesoasoani iā i tatou e ola e tusa ai ma lo tatou tuuina atu.
4 Faaaogā Sauniuniga a le Atua: Ina ia fesoasoani iā i tatou ia ola e tusa ai ma lo tatou tuuina atu, ua saunia ai e Ieova fesoasoani e ala mai i lana Afioga ma le faapotopotoga Kerisiano. Ia avea ma au faasologa i aso taʻitasi le faitauina o le Tusi Paia ma le tatalo iā Ieova. (Iosua 1:8; 1 Tesa. 5:17) Ia faaalia le naunau e auai i sauniga a le faapotopotoga. (Sala. 122:1) Ia auaumea faatasi ma i latou o ē matataʻu iā Ieova ma tausi i ana feʻau.—Sala. 119:63.
5 O le lagolagosua a Ieova, e mafai ai ona e ola e tusa ai ma lou tuuina atu ma maua ai le fiafia i le auauna atu iā te ia e faavavau.—Sala. 22:26, 27; Fili. 4:13.