Pe Mafai Ona Faaavanoa Lou Maota?
1 E toʻatele Kerisiano i le uluaʻi senituri sa latou faaavanoa o latou fale e fai ai sauniga a le faapotopotoga. (1 Kori. 16:19; Kolo. 4:15; File. 1, 2) I aso nei, o nisi faapotopotoga e lē lava nofoaga e fai ai Suʻesuʻega Tautusi a vaega o le Faapotopotoga ma feiloaʻiga mo le auaunaga i le fanua. O le iʻuga, o nisi vaega o suʻesuʻega tautusi ua oo atu i le 30 tagata pe sili atu, ua toʻatele mamao na i lo le aofaʻiga manaʻomia pe ā ma le 15 tagata.
2 O se Faaeaga Matagofie: Po o e mafaufau ea e faaavanoa lou maota mo Suʻesuʻega Tautusi a le Faapotopotoga? Ia iai se potu e lava le telē ma māmā, e lelei molī, e savili ma talafeagai lelei mo lea fuafuaga. Talu ai o suʻesuʻega tautusi o se sauniga a le faapotopotoga ma o se vaega o le faatulagaga a Ieova e aʻoaʻo ai ona tagata, o le faia la o le suʻesuʻega tautusi i lou maota o se faaeaga e matuā matagofie lava. E toʻatele sa faamatala mai na latou maua aogā faaleagaga ona o le faaavanoaina o o latou maota i lenei auala.
3 Afai e te manatu e talafeagai lou maota, aua le faatalatū e faailoa atu i toeaina. Atonu o loo latou saʻili mo nisi nofoaga. Afai e lē talafeagai ona fai ai suʻesuʻega tautusi, pe mafai la ona feiloaʻi ai i inā mo le auaunaga i le fanua? E tusa lava pe lē o iai se manaʻoga i le taimi nei, ae o le a fiafia toeaina i le iloaina o loo avanoa lou maota. Atonu o le a e olioli i lenā faaeaga i le lumanaʻi.
4 Ia Faaalia Amioga Lelei: Pe a faatasitasi i se maota o se aiga, e manaʻomia uma e le aofia ona faaaloalo i mea totino a lē e ana le fale. E tatau i mātua ona faamautinoa o loo nonofo a latou fanau i le vaega tonu lea ua filifilia mo le suʻesuʻega, ae aua le feoaʻi solo i isi vaega o le fale. E tatau foʻi ona faaalia le magafagafa mo tuaoi, ma faaeteete ia ʻalofia le tulaʻi mai o ni faafitauli lē talafeagai.—2 Kori. 6:3, 4; 1 Pete. 2:12.
5 Na faalaeiau mai le Eperu 13:16 iā i tatou ina ia aua neʻi galo “ona agalelei ma alolofa atu, auā o taulaga faapena e fiafia ai le Atua.” O le faaavanoa o lou maota mo se sauniga a le faapotopotoga o se auala lelei lea e faasafua atu ai mea lelei i isi ma e ‘ava ai iā Ieova i ou ʻoa.’—Faata. 3:9.