Talaʻi ma Avatu se Molimau Māeʻaeʻa
1 I le avea o “se taʻimua ma sē e pule” sa toleniina ai e Iesu ona soo mo se galuega talaʻi tele i le lumanaʻi. (Isa. 55:4; Luka 10:1-12; Galu. 1:8) Sa faamatalaina e le aposetolo o Peteru le faatonuga na avatu e Iesu i upu nei: “Ua na poloaʻi mai foʻi iā te i matou e talaʻi atu i le nuu, ma [“molimau māeʻaeʻa,” NW], o ia lava lē ua tofia e le Atua e fai ma faamasino i ē o ola ma ē ua oti.” (Galu. 10:42) O le ā e aofia ai i le avatuina o se molimau māeʻaeʻa?
2 E mafai ona tatou aʻoaʻoina le tele o mea mai le iloiloina o le faaaʻoaʻoga a le aposetolo o Paulo. Ina ua feiloaʻi ma toeaina matutua o le faapotopotoga i Efeso, sa ia faamanatu atu iā i latou e faapea: “Ma loʻu leʻi natia se mea aogā, ina neʻi lē faailoa atu ma aʻoaʻo atu iā te outou i luma o le nuu, atoa foʻi ma lea fale ma lea fale. Ua ou [“molimau māeʻaeʻa,” NW] iā Iutaia atoa ma Eleni le salamō i le Atua, ma le faatuatua i lo tatou Alii o Iesu Keriso.” E ui lava ina fesagaʻi o ia ma tofotofoga, ae sa galue mamafa pea Paulo e faaoo atu le tala lelei i le tele o tagata e mafai ai. E leʻi lava le tufa atu na o upu moni faavae i lana ʻaufaalogologo, peitaʻi sa ia galue mamafa ina ia taʻu atu iā i latou le “finagalo uma o le Atua.” Ina ia faataunuuina lenā mea, sa ia faia ni taumafaiga malolosi ma ni faataulagaina. Na ia faapea mai atili: “O loʻu lava ola foʻi ou te lē naunau i ai, seʻi ou faauma loʻu momoʻe ma le olioli, atoa ma le faiva ua ou maua mai le Alii o Iesu, ou te [“molimau māeʻaeʻa,” NW] atu le tala lelei o le alofa tunoa o le Atua.”—Galu. 20:20, 21, 24, 27.
3 E faapefea ona tatou faataʻitaʻi i le faaaʻoaʻoga a Paulo i aso nei? (1 Kori. 11:1) E ui ina tatou fesagaʻi ma tulaga faigatā i le sailia o aiga ma tagata taʻitoʻatasi ua tatau ai, ae o loo tatou taumafai e faaoo atu le tala lelei i ituaiga o tagata ma gagana eseese, ma filigā e ati aʻe le fiafia o i latou tatou te feiloaʻi i ai i le talaʻiga. (Mata. 10:12, 13) E manaʻomia ai le faaaluina o o tatou taimi, taumafaiga ma le alofa mo tagata.
4 Pe e Mafai Ona Avea Oe o se Paeonia Lagolago? O Mati ma Aperila o se avanoa lelei lea mo oe e avatu ai se molimau māeʻaeʻa e ala i le paeonia lagolago. Maʻeu le faalaeiauina ona o le toʻatele o i latou na faia ni taumafaiga faapitoa e paeonia lagolago ai i le tausaga ua teʻa!
5 O faalaeiauga na saunia e le faalapotopotoga a Ieova, na uunaia ai se tuafafine ua 80 tausaga e iai ni ona faafitauli tau i le soifua mālōlōina. Na ia tusi mai e faapea: “Na toe faaolaolaina ai le faanaunauga ua leva ona iā te aʻu, ma ua ou lagona ai e tatau ona ou toe paeonia lagolago tasi lava.” Sa ia filifili ai loa e avea ma ona sini le paeonia iā Mati. Na ia faapea mai: “O le mea muamua lava na ou faia, o loʻu nofo ma fuafua pe ua lava tupe e faatino ai. Sa ou talanoa i laʻu tama teine e uiga i laʻu fuafuaga auā sa ou manaʻomia lana fesoasoani. Na faateʻia aʻu ina ua ia talosaga atu e fia avea foʻi o ia o se paeonia lagolago.” A o faagasolo le masina, na faaaluina ai e le tuafafine matua lea le 52 itula i le faiva. “O le tele o taimi ou te tatalo ai iā Ieova ina ia faafou loʻu malosi pe a ou lagona loʻu vaivai. I le faaiʻuga o le masina, na ou matuā olioli ma faamalieina, ma sa ou faafetai iā Ieova i le tele o taimi mo lana fesoasoani iā te aʻu. Ma ou te manaʻo ou te toe paeonia lagolago foʻi.” E ui lava i faafitauli tugā tau i le soifua mālōlōina, ae o le mea fiafia lea na oo iā te ia, e mafai foʻi ona faalaeiauina ai isi o ē e mananaʻo moni e fia avea ma paeonia lagolago.
6 Na faaaogā e se uso o lē e leʻi faatalitalia e vāea mai i lana galuega totogi, le avanoa e paeonia lagolago ai. A o faagasolo le masina, sa faagaeetia o ia e le maelega mo le galuega talaʻi, ma e uma ane le masina, ua amata lana suʻesuʻega fou faale-Tusi Paia. Pe a toe tomānatu i le mea na tupu, na ia faapea mai: “E ese le manaia o lenei masina!” Maʻeu le faafiafiaina o ia ona o le mauaina o le taʻitaʻiga ma le fesoasoani a Ieova! Ioe, na sasaa mai e Ieova faamanuiaga mo taumafaiga faaopoopo na ia faia i le faiva, ma o le a faia foʻi faapena e Ieova iā te oe.—Mala. 3:10.
7 E lē faigofie le paeonia lagolago mo le toʻatele o nisi. Ae peitaʻi, e ui i tiute tauave masani a le aiga i aso fai soo aemaise ai faafitauli o le tagata lava ia, e toʻatele uso ma tuafāfine ua mafai ona paeonia. O le faia o se molimau māeʻaeʻa e masani ona aofia ai le faataulagaina o o tatou taimi ma le malosi, ae e lē mafaatusalia lenā i faamanuiaga tatou te maua.—Faata. 10:22.
8 O Mati ma Aperila o masina sili ia ona lelei e paeonia lagolago ai. E lima faaiʻuga o vaiaso o Mati. O le talaʻi i faaiʻuga o nei vaiaso ma faaaogā lelei afiafi atonu o le a mafai ai e se tasi e faigaluega i aso uma ona paeonia lagolago ai. E faaopoopo atu i ai, atonu e mafai foʻi ona e faaaogā aso mālōlō i le vaitaimi o le masina o Aperila. O nisi atonu e maua taimi mālōlō mai i aʻoga ma galuega totogi, lea e mafai ona fesoasoani iā i latou e ausia itula manaʻomia e 50. Ina ia faatulaga itula e 50 o le faiva iā Mati po o Aperila, pe e mafai ona e faaaogā se tasi o faasologa faataʻitaʻi o le paeonia lagolago o loo mulimuli mai i lenei mataupu? Ia talanoa ma isi i lau faasologa; atonu o le a faalaeiauina ai nisi e auai faatasi ma oe i le faiva. Afai e lē mafai ona e paeonia lagolago, ia faatū se sini faapitoa mo nei masina, ma lagolagosua iā i latou o ē o loo mafai ona paeonia. Ia faia nei loa au fuafuaga ina ia faatele ai lou taimi i le faiva iā Mati ma Aperila.
9 Ia Faaalia le Agaga Talisapaia mo le Faamanatuga: I tausaga taʻitasi i le vaitaimi o le faamanatuga, o le lotofaafetai mo le togiola e uunaia ai le faitau afe e ‘faaaogā tatau le taimi’ e paeonia lagolago ai. (Efe. 5:15, 16) I le tausaga ua mavae i Samoa, e 44 paeonia lagolago iā Mati ae 17 iā Aperila. O se faatatauga mo nei masina e lua, e 30. E faatusatusa atu i le fua faatatau e 5 o ē na paeonia lagolago i masina muamua atu o le tausaga faaleauaunaga. O le vaitaimi lenei o le faamanatuga o se avanoa lelei lea e faaalia ai lo tatou talisapaia o le taulaga togiola a Iesu Keriso, e ala i le faateleina o lo tatou auai i le faiva i le fanua.
10 A o latalata mai Aperila 16, ia manatunatu po o le ā le uiga o le faamanatuga iā te oe. Ia mafaufau i mea tāua na tutupu i le maliu o Iesu ma mea sa ia matuā manatu mamafa i ai. Manatu foʻi i le olioli lea sa iā Iesu ma le auala na fesoasoani ai lenā mea e tumau ai i le faileagaina o ia. Ia manatunatu i lona tulaga o ia o le ulu o le faapotopotoga, le vaaia o le galuega talaʻi ma le faia ma soo. (1 Kori. 11:3; Epe. 12:2; Faaa. 14:14-16) E mafai la ona faaalia lou talisapaia mo mea uma na faia e Keriso e ala i le faia o sou sao atoatoa i le galuega talaʻi e tusa ai ma lou tulaga.
11 Faalaeiau Isi ia Avatu se Molimau Māeʻaeʻa: O le faia o se sao i le auaunaga o le paeonia lagolago, ua maua ai e toeaina ma auauna o le faiva se avanoa lelei e faalaeiau ai i isi. Pe a galulue ma se tagata talaʻi i le faiva i le fanua po o le faia foʻi o ni asiasiga faaleoleo mamoe, ua maua ai e i latou le avanoa lelei e fesoasoani ai i isi ia faia se sao atoatoa i lenei galuega faapitoa. Tau ina ia avea lenei mea ma mataupu o a tatou tatalo, ina ia faaopoopo le malosi i a tatou taumafaiga e avatu ai se molimau māeʻaeʻa.
12 A o galulue soosootauau uma toeaina ma auauna o le faiva mo le fuafuaga a le faapotopotoga mo le faateleina o galuega iā Mati ma Aperila, e ao lava i le ovasia o le fanua ona manatu mamafa i le vaaia o le galuega faaevagelia. E tatau ona ia faatulaga nofoaga mo le auaunaga i le fanua, o aso, ma taimi talafeagai mo le toʻatele o le ʻautalaʻi ma ia faasilasila atu e lē aunoa i sauniga o le auaunaga. Atonu e mafai ona faia fuafuaga ia fetaui ma taimi eseese a o faagasolo le aso, ina ia maua ai le avanoa o tagata o le faapotopotoga e faia se sao i vala eseese i le galuega o le molimau atu. E mafai ona aofia ai le galueaʻiina o oganuu pisinisi, molimau atu i luga o alatetele, galuega i le fale i le fale, faia o toe asiga ma le molimau atu i luga o le telefoni. E faaopoopo atu i lenā, e tatau ona ia fuafua ia lava lomiga, o mekasini ma oganuu a o faagasolo nei masina.
13 O le ofo mo le masina o Mati o le tusi o Le Poto, faatasi ai ma le sini ia amata ni suʻesuʻega faale-Tusi Paia. O fautuaga lelei mo le ofoina o le tusi o Le Poto o loo maua i le faaopoopoga o La Tatou Faiva o le Malo o Ianuari 2002. O le ofo mo Aperila o mekasini o Le Olomatamata ma le Ala Mai! Ia taumafai e faaaogā taulimaga ua fautuaina i “Le Tala e Fai Atu e Uiga i Mekasini.” E tatau i tagata uma ona faaalu se taimi e sauniuni lelei ai ina ia avatu se molimau māeʻaeʻa.
14 Maʻeu le faamanuiaina o lo tatou galulue i lalo o le taʻitaʻiga a le Ulu o le faapotopotoga, o Keriso Iesu, ma maua le faaeaga o le tufa atu o le tala lelei i isi! A o latalata mai masina o Mati ma Aperila, seʻi o tatou tauivi e avea ma masina e sili ona mataʻina a o tatou usiusitai i le faatonuga a Keriso ia talaʻi ma avatu se molimau māeʻaeʻa.
[Pusa i le itulau 4]
Auala Eseese e Paeonia Lagolago ai iā Mati ma Aperila 2003
Aso Itula
Aso Gafua 1 2 — — 2 —
Aso Lua 1 — 3 — — —
Aso Lulu 1 2 — 5 — —
Aso Tofi 1 — 3 — — —
Aso Faraile 1 2 — — —
Aso Toonaʻi 5 4 3 5 6 7
Aso Sa 2 2 3 2 2 3
Mati 56 56 54 55 50 50
Aperila 50 50 51 53 — —
Pe e talafeagai se tasi o nei faasologa mo oe?