Faataʻitaʻi i le Agalelei o Ieova
1 Pe afai na e olioli i se lā goto matagofie, po o se taumafataga susua, pe lē uunaʻia ai ea i tatou e faafetai atu iā Ieova, le Puna o le agalelei uma? O lona agalelei ua uunaʻia ai i tatou e faaaʻoaʻo iā te ia. (Sala. 119:66, 68; Efe. 5:1) E faapefea ona tatou faaalia le uiga lea o le agalelei?
2 I Tagata e Lē Talitonu: O se tasi o auala e tatou te faataʻitaʻi ai i le agalelei o Ieova, e ala lea i le faaalia o le manatu mamafa moni iā i latou e lē aiga iā i tatou i le faatuatua. (Kala. 6:10) O le faaalia o le agalelei i auala aogā, e mafai ona iai sona aafiaga lelei i le auala e latou te vaai ai i Molimau a Ieova ma le feʻau o loo tatou avatuina.
3 O se faaaʻoaʻoga, a o faatalitali se uso paeonia i le itu e vaai ai gasegase tausavali i le falemaʻi, na ia nofo e sosoo ma se tinā matua e foliga mai e sili atu ona tigāina na i lo isi uma na iai i inā. Ina ua oo mai i le taimi o le uso e vaai ai le fomaʻi, na ia faatagaina le tinā matua lea e alu i lona avanoa. Mulimuli ane na toe feiloaʻi atu le uso i le tinā lea i le maketi, ma na matuā fiafia tele le tinā ina ua toe feiloaʻi i le uso. E ui lava e leʻi fiafia muamua le tinā i le tala lelei, ae na ia faapea mai, ua ia iloaina nei o Molimau a Ieova e alolofa moni lava i o latou tuaoi. Na amata ai se suʻesuʻega faale-Tusi Paia a le tinā lenei.
4 I o Tatou Uso: E tatou te faaaʻoaʻo foʻi i le agalelei o Ieova pe a faalautele atu la tatou fesoasoani i o tatou uso talitonu. I taimi o mala, e aofia i tatou i ē e muamua lava faaoo atu le fesoasoani i o tatou uso. E tatou te faaalia lenei lava agaga e tasi pe a tatou fesoasoani atu iā i latou e manaʻomia ni auala i sauniga, asiasi atu iā i latou ua lē atoatoa le malosi, ma faalautele atu foʻi lo tatou alofa iā i latou e tatou te lē iloaina lelei i le faapotopotoga.—2 Kori. 6:11-13; Epe. 13:16.
5 O le isi auala e faaalia ai le agalelei o Ieova o lona nofosauni “e faamagalo.” (Sala. 86:5) O le faataʻitaʻi atu iā te ia, e tatou te faaalia ai lo tatou fiafia i le agalelei e ala i lo tatou faamagalo atu i isi. (Efe. 4:32) E fesoasoani lenei tulaga e maua ai se aufaatasiga e ‘lelei ma matagofie’ ma o tatou uso talitonu.—Sala. 133:1-3.
6 Tau ina ia avea le agalelei tele o Ieova e faagaeetia ai i tatou e viia o ia ma ia faaali atu le olioli. O lea tau ina ia uunaʻia ai i tatou e taumafai e faataʻitaʻi i lona agalelei i mea uma e tatou te faia.—Sala. 145:7; Iere. 31:12.