Faamanuiaga o le Faiva Faapaeonia
1, 2. O ā faamanuiaga e fesootaʻi atu i le faiva faapaeonia, ma aiseā?
1 Na faapea mai se tasi paeonia, “Ou te iloa e leai se isi galuega e aumaia iā te aʻu le lotomalie lea e maua i le faalauiloa atu o le upu moni i isi.” Sa faapea mai le isi paeonia: “I le iʻuga o aso taʻitasi, e lelei laʻu moe, ma e faatumulia loʻu loto i le fiafia.” O faamatalaga a nei paeonia, ua faaleo mai ai lagona o i latou mai atunuu uma lava o ē ua tofo i faamanuiaga o le faiva faapaeonia.—Faata. 10:22.
2 O le fesoasoani i isi ina ia maua le poto e faasaoina ai ola lea o loo i le Afioga a le Atua, e aumaia ai le lotomalie moni. (Galu. 20:35; 1 Tesa. 2:19, 20) Na tusi se tasi ua loa ona iai i le faiva faapaeonia e faapea: “E ese le faagaeetia ma faamalosia ai o le faatuatua i le vaai atu i le malosi o le mana o le Afioga a le Atua e uunaʻia ai tagata e faia suiga i o latou olaga.” Ioe, o le faaavanoaina o i latou e fesoasoani i tagata ma faia suʻesuʻega faale-Tusi Paia, ua olioli ai paeonia i faamanuiaga faapena.
3, 4. E faapefea i le avea ma paeonia ona aʻoaʻoina ai se tasi e faalagolago iā Ieova, ma e faapefea i lenei tulaga ona fesoasoani i se tasi e tupu aʻe ai faaleagaga?
3 Faalagolago iā Ieova: O le faalagolago i le agaga o le Atua i aso uma a o latou galulue i la latou faiva, e fesoasoani lea i paeonia e ati aʻe ai “fua o le Agaga” ma avea ma puipuiga iā i latou. (Kala. 5:16, 22, 23) E lē gata i lea, ona e latou te faaaogā i taimi uma le Afioga a le Atua, ua maua ai e paeonia le tomai i le faaaogāina o le Tusi Paia e tali puipui atu ai i le upu moni, ma faamalosia ai isi. (2 Timo. 2:15) Na taʻua e se uso na paeonia mo le faitau sefulu o tausaga e faapea: “Ua fesoasoani le faiva faapaeonia iā te aʻu e faateleina ai loʻu malamalamaga o le Tusi Paia, lea ua ou faaaogāina e fesoasoani ai i le toʻatele o tagata ia iloa Ieova ma ana fuafuaga.” Maʻeu le faamalieina ai!
4 E tatau foʻi ona faalagolago paeonia sauatoa iā Ieova i le tele o isi vala. E faamalosia lo latou faatuatua a o vaai atu i le auala o loo faamanuia ai e Ieova a latou taumafaiga mo le mauaina o mea e latou te manaʻomia i le itu faaletino. Na taʻua e se uso e 72 ona tausaga na paeonia sauatoa mo le 55 tausaga e faapea: “E leʻi tuulafoaʻia lava aʻu e Ieova.” E lē gata i lea, o le faafaigofie o o latou olaga, ua saʻoloto mai ai paeonia i le tele o popolega o le olaga. Pe e logolelei iā te oe lenei tulaga?—Mata. 6:22; Epe. 13:5, 6.
5. E faapefea ona fesoasoani le faiva faapaeonia i se tasi e faalatalata ai iā Ieova?
5 Ia Faalatalata i le Atua: O la tatou faiā ma Ieova o se mea totino e matuā tāua tele. (Sala. 63:3) Pe a tatou faia se sao atoatoa i le faiva ona o lo tatou alolofa iā Ieova, o le a oo ina vavalalata ai lenā faiā. (Iako. 4:8) Na taʻua e se uso na avea ma paeonia mo le silia i le 18 tausaga e faapea: “O le auaunaga faapaeonia ua tatou mafai ai ona ʻtofo ma iloa ai e lelei Ieova,’ i le atiina aʻe i lea aso ma lea aso o se faiā malosi ma Lē na Foafoaina Mea.”—Sala. 34:8.
6. O le ā e tatau ona iai i paeonia, ma o ai isi e ese mai i paeonia e latou te maua aogā?
6 E lē gata e tatau i paeonia ona talafeagai lo latou tulaga mo le galuega faapaeonia, ae e tatau foʻi ona iai so latou faatuatua malosi, se alofa faamaoni iā Ieova ma tuaoi, faapea ai ma le lotomalie e faia ni faataulaga. (Mata. 16:24; 17:20; 22:37-39) Peitaʻi, o laufofoga fiafia o paeonia i atunuu uma ua faamaonia ai, o faamanuiaga o le faiva faapaeonia e sili atu i lo mea na faataulagaina. (Mala. 3:10) O nei faamanuiaga e lē na o paeonia o mauaina, ae o loo maua foʻi e o latou aiga ma le faapotopotoga le tele o aogā mai uiga ma galuega matagofie o loo faia e paeonia.—Fili. 4:23.