Galuega Faateleina i le Lalolagi Aoao

Ua aumaia se fiafiaga tele e galuega faateleina faatiokarate. O loo iai la se fiafiaga tele a o sauniuni le lālā i le Iunaite Setete e siitia atu ana galuega o le lomia, le tuufaatasia, ma le felaʻuaʻiga o lomiga mai i Brooklyn agaʻi i Wallkill, i Niu Ioka. Ua uma nei ona toe faaleleia le fale lomitusi i Wallkill, ma o loo faamāeʻa nei se vaega telē o le fale na toe sosoo, ma ua uma ona faatauina masini fou e faaaogā i le fale lomitusi ma e lē o toe umi ona faapipiiina loa lea.

Talu mai le 1927, ua silia i le tasi le piliona tusi ua saunia i le fale lomitusi i Brooklyn. Peitaʻi, o loo iai se manaʻoga ia suia masini tuai nei, mo le lomia ma le tuufaatasia o lomiga, o nisi o nei masini ua 44 tausaga talu ona faaaogā. O lenei masini tuai e manaʻomia lava ona faaleleia i le tele o taimi, ma e manaʻomia tagata e galulue ai. O le fale o loo iai nei i Brooklyn e lē mafai ona tuu ai se masini e telē atu ma tele ni lomiga e mafai ona faia ai, lea e matou te manaʻomia. O lea la, na filifili ai loa e see atu le galuega tau lomitusi i Wallkill, lea e mafai ona faatū ai le masini lomitusi e lelei atu, ma masini e lelei atu e tuufaatasia ai lomiga, faapea ma tulaga lelei i le faagaoioia o le felaʻuaʻiga o lomiga.

Na faia talu ai nei se fetuutuunaʻiga mo le lomiaina o a tatou tusi i le lalolagi atoa. A o leʻi faia lenei fuafuaga, sa saunia i le lālā i le Iunaite Setete le toetoe lava 50 pasene o tusi sa faaaogā i la tatou galuega i le lalolagi atoa. Ae o lea ua see atu nei le saunia o nisi o tusi i isi lālā, e faaaogā ai o latou fale lomitusi ae faaitiitia galuega fai i totonu o le Iunaite Setete.

E fitu masini lomitusi fou e vave tele o le ituaiga o le MAN ua faatauina, lea o le a faatutūina i le ogatotonu o le 2004 i lālā e ono: Peretania, Pasili, Iapani, Mekisikō, Aferika i Saute, ma le Iunaite Setete. Ua uma ona faatūina le uluaʻi masini o lea ituaiga i Peretania ma o loo alualu lelei lava. E ala i le faaaogāina o nei masini fou e sili ona lelei mo lenei galuega, o le a mafai ai ona faateleina lomiga e saunia i le lalolagi aoao ae faaitiitia tagata faigaluega.

Masini Fou mo le Fale Lomitusi i Wallkill: E lua masini o lea ituaiga o le a faatutūina i Wallkill. E mafai e nei masini ona faia mekasini ma vaega taʻitasi o loo faia aʻe ai se tusi, e tusa lea ma le 90,000 i le itula. O lona uiga o le ota o mekasini e 350 a se faapotopotoga e mafai ona faia i le na o le 14 sekone. O nei masini e lua, faatasi ai ma le tolu o masini laiti ifo o le ituaiga o le MAN o loo i Wallkill, o le a mafai ona faia ai lomiga e manaʻomia mo le oganuu atoa a le Iunaite Setete.

O le a faatūina foʻi se masini e tuufaatasia ai lomiga i Wallkill. O lenei masini fou e mafai ona faia ai tusi faavaamalō ma Tusi Paia sausau auro e 120 i le minute e tasi. O le itu e tuufaatasia ai lomiga, o le a faatulaga i se auala e fesootaʻi ai masini uma, ina ia mafai ai ona faaaogā tatau le avanoa o loo iai faapea ma avanoa e galulue ai tagata faigaluega.

Ua faatulaga foʻi le Matagaluega o Felaʻuaʻiga ina ia sili atu ona saʻo ma lelei le faamaopoopoina, e ala i le faaaogāina lelei o meafaigaluega faakomepiuta ua iai. O le faiga fou ua iai nei mo le teuina o lomiga, ua mafai nei ona faaaogā na o se avanoa e itiiti ifo i le ʻafa o le avanoa o loo faaaogāina nei i Brooklyn. O nei faaleleiga o le a fesoasoani i le sologa lelei o le mauaina o lomiga e le 12,000 o faapotopotoga ma vaega, i le Iunaite Setete ma isi vaipanoa o loo latou fesoasoani atu i ai. E sili atu i le lima hekatea (50,000 mita faatafafā) le avanoa o le a faaaogāina. E tusa lenā ma le telē o Maota Fono e 8 pe a tuufaatasi po o Maota o le Malo e 125.

Toe Faafou Masini Lomitusi i Ausetalia: Ua tusa nei ua 30 tausaga o le masini lomitusi o le ituaiga o le TKS lea o loo iai nei i le Lālā i Ausetalia. Ua faia nei la ni fuafuaga ina ia suia lea masini i se masini o le fausaga fou o le ituaiga o le Hantscho lea ua faaaogāina nei i Wallkill. O le masini lomitusi o le Hantscho e sili atu i le faaluaina lona saosaoa na i lo le masini o loo iai nei, ma e mafai ona lolomi atili ai nisi lomiga pe a manaʻomia. O loo latou faamoemoe e iai i le masini mea uma lava mo le gaosia o mekasini, lea o le a sili atu ai ona lelei le tuupusaina ma le felaʻuaʻiga o mekasini. O le uiga o lenei mea, e mai le taimi e tuuina ai le taʻaiga pepa i le masini lomitusi, e lē toe manaʻomia se tagata e tago i ai seʻiloga e oo i le taimi e fao pusa ai mo felaʻuaʻiga. E lē gata i lea, o loo latou faamoemoe foʻi e faaopoopo i le masini ni totoga ina ia faaitiitia ai galuega fai i le lolomiina o lomiga.

O lenei suiga e tatau ona faatinoina i le ʻafa mulimuli o le 2004. O lona uiga o le a manaʻomia ai ona lomia a tatou mekasini i se isi nofoaga, atonu i Iapani mo ni nai masina, e amata atu pe tusa o Iulai 2004.

E Manaʻomia Lau Fesoasoani! E mautinoa o lo tatou faanaunauga uma taʻitoʻatasi, ia lagolagoina atoatoa lenei tulaga auiluma o manaʻoga o le Malo. E faapefea ona tatou faia lenā mea?

O le tau atoa o le sosooga o le fale e faia ai lomiga i Wallkill e aofia ai ma masini lomitusi e lua o masini fou e fitu ma isi mea e faia ai galuega, e ono silia i le 70 miliona tālā Amerika. O le mea moni, e sili atu le tau e iai i le lalolagi aoao. O fea e maua mai ai tupe e totogi ai nei mea uma? E maua mai i foaʻi tauofo o loo tuu i totonu o pusa o loo tusia ai “Meaalofa mo le Galuega i le Lalolagi Aoao—Mataio 24:14” o loo i Maota o le Malo, faatasi ai ma foaʻi o loo auina atu i ofisa o le lālā e Kerisiano o loo naunau e vāai ua faataunuuina le finagalo o le Atua. Po o fea lava e tulaʻi mai ai se manaʻoga, e tali atu ma le aao māfola auauna faamaoni a Ieova i taimi uma. O se faaaʻoaʻoga, i ona po o Mose, sa manaʻomia ai ni mea e fau ai le fale fetafaʻi ma ona vaega uma faamamaluina, atoa ai ma mea uma sa faaaogā i totonu o le fale fetafaʻi. Sa tuu atu le faaeaga i auauna uma a le Atua e fesoasoani ai i le fausiaina o le fale fetafaʻi, ma sa latou foaʻi e tusa ai ma mea na mafai e le tagata lava ia.—Eso. 35:4-24.

Ia avea ia lenei avanoa e avatu ai le faafetai tele ona o ā outou foaʻi, ua mafai ai ona faateleina le galuega faatiokarate i le lalolagi aoao. Tau ina ia faaauau ona faamanuia Ieova iā i tatou uma i le itu faaleagaga ona o ia mea.

[Pusa/Ata i le itulau 3]

Lālā ua Mauaina Masini Lomitusi Fou ma Aso na Auina Atu Ai

Peretania: Aokuso 2003

Pasili: Novema 2003

Iapani: Ianuari 2004

Mekisikō: Fepuari 2004

Aferika i Saute: Aperila 2004

Iunaite Setete: Aperila ma Me 2004

[Siata i le itulau 4, 5]

(For fully formatted text, see publication)

E faatusa le Masini Lomitusi i se pasi

Umi: 40 mita

Maualuga: 5.5 mita

Mamafa: 204 tone

[Ata i le itulau 3]

Le fale i le 117 Adams Street i le 1927

[Ata i le itulau 4, 5]

Agaʻigaʻi i luma le galuega

Ianuari 2003

Aperila 2003

Iulai 2003

Vaaiga iā Iulai 2003

[Ata i le itulau 6]

“ . . . sa loto lava le nuu i le galuega.”—Nee. 4:6.

[Ē Ana le ata i le itulau 3]

Copyright by MAN Roland Druckmaschinen AG