O Tauaofiaga Itumalo ma Faavaomalo ua Faagaeetia ai i Tatou e Avatu le Viiga i le Atua!
O Tauaofiaga Itumalo ma Faavaomalo “Ia Avatu i le Atua le Viiga” ia o loo faia e oo mai le asō, e mataʻina le molimau o loo avatu ai. O nei faatasitasiga matagofie faatiokarate, ua faamamaluina ai le suafa o Ieova ma faaleleia atili ai foʻi lo tatou tomai e ‘avatu iā Ieova le viiga o lona suafa.’ (Sala. 96:8) O le mea moni, ua alagatatau ona avatu le viiga iā te ia ona o ana galuega ofoofogia o le foafoaga, ia e faaatagia ai ona uiga matagofie.—Iopu 37:14; Faaa. 4:11.
Ia faaaogā fesili o loo mulimuli mai faatasi ai ma au lava faamaumauga na fai, ina ia sauniuni ai ma faia sou sao i le toe autaluina o le polokalame o le tauaofiaga, lea o le a faia i le vaiaso o Novema 17.
1. E faapefea ona tala atu e foafoaga e leai ni ola le mamalu o le Atua, ma ua faapefea ona ese mai ai le auala e avatu ai e tagata le viiga iā te ia? (Sala. 19:1-3; “Ua Tala Mai e Foafoaga le Mamalu o le Atua”)
2. O le ā le mea moni i aso nei sa faaatagia mai e le liliuina faavavega o Iesu, ma ua faapefea ona faamalosia ai Kerisiano i lenei mea moni? (Lauga autū, “Ua Faamalosia i Tatou i Vaaiga Faavaloaga Faamamaluina!”)
3. E mafai faapefea ona tatou atiina aʻe le lotomaulalo lea na faaalia e le perofeta o Tanielu, ma e faapefea ona aogā iā i tatou le faia faapea? (Tani. 9:2, 5; 10:11, 12; “E Faaalia le Mamalu o Ieova i Ē Lotomaulalo”)
4. (a) O ā manatu e tolu e uiga i le faasalaga faafaamasinoga a le Atua tatou te aʻoaʻoina mai le valoaga a Amosa? (Amo. 1:3, 11, 13; 9:2-4, 8, 14) (e) O le ā se lesona aogā e mafai ona aʻoaʻoina e Molimau a Ieova i aso nei mai le faaaʻoaʻoga lapataʻi o loo i le Amosa 2:12? (“Le Valoaga a Amosa—Lana Feʻau mo o Tatou Aso”)
5. (a) O ā lamatiaga o le soona tagofia o le ʻava malosi, e tusa lava pe e lē onā ai se tagata? (e) E ono faapefea ona toe faaleleia le faafitauli o le faaaogāina sesē o le ʻava malosi? (Mare. 9:43; Efe. 5:18; “ʻAlofia le Mailei o le Faaaogāina Sesē o le ʻAva Malosi”)
6. O ā aogā o loo e mauaina mai le lomiga fou ‘Matamata i le Nuu Lelei’? (“ʻLe Nuu Lelei’—O se Faataʻimuaga o le Parataiso”)
7. O ā auala e tolu tatou te ono ‘faaatagia atu ai le mamalu o Ieova’? (2 Kori. 3:18; ‘Ia Faaatagia Atu le Mamalu o Ieova’)
8. O le ā le pogai o le inosia fua e aunoa ma ni māfuaaga, ma o le ā e fesoasoani iā i tatou e tumau ai i le faamaoni e ui i le inosia fua o i tatou? (Sala. 109:1-3; “E Inosia Fua e Aunoa ma ni Māfuaaga”)
9. O le ā le silasila a Keriso i tulaga aloaʻia, ma e faapefea ona iloa e se tasi po o le ā le itu e manaʻomia ona ia atiina aʻe atili ai le silasila a Keriso i tulaga aloaʻia? (Mata. 20:20-26; “Ia Maua le Silafaga a Keriso i Tulaga Aloaʻia”)
10. O le ā e fesoasoani iā i tatou ina ia tinoū ai faaleagaga e ui i le lē lavavā o o tatou tino? (“Lē Lavā ae e Lē Vaivai Ai”)
11. O ā nisi o auala o loo faaaogā e Satani e faaauiluma ai faiga pepelo, ma o le ā le auala talafeagai faale-Tusi Paia e tali atu ai i taumafaiga e faaleagaina ai lo tatou faatuatua? (Ioa. 10:5; “Ia Faaeteete i ‘Leo o Tagata Ese’”)
12. (a) E faapefea ona mulimuli mātua i le faaaʻoaʻoga a Iesu o loo faamauina i le Mareko 10:14, 16? (e) O le ā e te fiafia i ai i le tusi fou Ia Faalogo i le Faiaʻoga Sili? (“O a Tatou Fanau—O se Tofi Tautele”)
13. O le ā le auala e viia ai e talavou Ieova? (1 Timo. 4:12; “Le Auala e Viia ai e Talavou Ieova”)
14. O ā ni vaaiga o le tala “Molimau Atu ma le Loto Tele e ui i Teteega” o loo e manatuina pea?
15. E faapefea ona tatou ono faaaʻoaʻo i le faaaʻoaʻoga na faia e (a) Peteru ma Ioane? (Galu. 4:10) (e) Setefano? (Galu. 7:2, 52, 53) (i) le faapotopotoga o le uluaʻi senituri? (Galu. 9:31; o le tala ma le lauga “Ia ‘Lē Mapu’ Ona Taʻutaʻu Atu le Tala Lelei”)
16. (a) O ā auala ua tatou maumauaʻi ai e avatu le viiga i le Atua? (e) O le ā e mafai ona tatou mautinoa i ai a o tatou faatatauina manatu na tatou aʻoaʻoina mai le Tauaofiaga “Ia Avatu i le Atua le Viiga”? (Ioa. 15:9, 10, 16; “Ia Viia Ieova e Ala i le ‘Fua Tele Mai’”)
E ala i le mafaufau loloto i faatonuga matagofie faaleagaga na tolaulauina i le tauaofiaga, o le a faagaeetia ai i tatou e faatatauina mea na tatou aʻoaʻoina. (Fili. 4:8, 9) O le a faamalosia ai lo tatou naunautaʻiga ina ia “faia mea uma lava ia viia ai le Atua.”—1 Kori. 10:31.