Saʻili Ē ua Tatau Ai
1 O faatonuga a Iesu mo le faatinoga o le galuega talaʻi, ua aumaia ai se luʻitau iā i tatou. Na fetalai o ia: “O se aai po o se faoa aai tou te oo atu i ai, ia fesili [pe saʻili] po o ai sē i ai ua tatau.” (Mata. 10:11) Ona ua seāseā maua tagata i o latou fale, e mafai faapefea ona tatou saʻilia i latou?
2 Iloilo Lau Oganuu: O le laasaga muamua, ia iloilo lau oganuu. O le ā tonu lava le taimi e mautinoa e maua ai tagata i o latou fale? O fea e mafai ona maua ai i latou a o faagasolo le aso? Pe e iai ea se aso patino o le vaiaso, po o se taimi patino o le aso e sili atu ai ona latou fiafia i se asiasiga? O le fetuutuunaʻi o lau faiva ina ia talafeagai ma faasologa ma tulaga o tagata o i oganuu o le faapotopotoga, e mafai ona fesoasoani ina ia e maua ai ni iʻuga e sili ona lelei.—1 Kori. 9:23, 26.
3 E toʻatele tagata talaʻi ua taulau manuia i le mauaina o tagata i o latou fale i afiafi. O nisi tagata e ona le fale, e sili atu ona latou toʻafimālie ma fia faalogo i le taimi lenā. O isi foʻi auala e faaoo atu ai le tala lelei i tagata, o le galueaʻiina lea o oganuu pisinisi ma le talaʻi atu i nofoaga faitele.
4 I se tasi o masina mo galuega faapitoa, na faatulaga ai e se faapotopotoga le galuega talaʻi mo afiafi o Aso Toonai ma Aso Sa, ma afiafipō o Aso Lulu ma Aso Faraile. Na latou faatulaga foʻi le molimau atu e ala i telefoni, ma le galulue i oganuu pisinisi. O nei faatulagaga na faapogaia ai le agaga maelega i le faiva, ma na filifili ai le faapotopotoga e faaauau pea a latou talaʻiga i na taimi.
5 Ia Maelega e Fai Toe Asiga: Afai e faigatā ona maua tagata i la outou oganuu pe a e toe foʻi e asi i latou, ia taumafai e fai se fuafuaga maʻoti pe a māeʻa asiasiga taʻitasi, e aofia ai ma le uluaʻi asiasiga. Ona faamautinoa lea, e te toe foʻi e asi i latou. (Mata. 5:37) Pe a talafeagai, atonu e te fesili mo le numera o le telefoni a lē e ona le fale. E fesoasoani foʻi lenā iā te oe e toe faafesootaʻi ai le tagata.
6 O lo tatou filigā e saʻili ē ua tatau ai, e toe asia ma atiina aʻe lo latou fiafia i le upu moni, e mautinoa o le a maua ai le faamanuiaga a Ieova.—Faata. 21:5.