Pusa Fesili

◼ E faapefea ona tatou tausisia le taimi saʻo a o fai sauniga a le faapotopotoga?

E ese le vave o le taimi pe a tatou talanoa i ni tala fiafia ma a tatou uō. O le pogai lea ua faigatā ai ona faia a tatou vaega mo sauniga i taimi faatulagaina. O ā ni fautuaga e mafai ona fesoasoani ai?

Ia amata i le taimi tonu. Pe a potopoto le faapotopotoga atoa, atonu e lelei ona valaaulia loa le aofia pe a toe tasi pe toe lua ni minute e alaala i o latou nofoa, ina ia mafai ai ona amata le sauniga i le taimi atofaina i se auala maopoopo. (Fai. 3:1) O sauniga mo vaega toʻalaiti e pei o feiloaʻiga mo le auaunaga i le fanua, e lē tatau ona taofia seʻi faatali i latou atonu o tuai ona taunuu mai.

Ia sauniuni lelei. O se tasi o auala e mafai ona tausisia ai le taimi, o le muaʻi sauniuni lelei. Ia manatua lelei le fuafuaga autū o le mataupu o le a e talanoaina. Ia iloa manatu autū ma faamatilatila mai. ʻAlofia le faaalu uma o le taimi i ni manatu e faalētāua. Ia faafaigofie le taulimaga. Afai e aofia ai i lau vaega ni faataʻitaʻiga po o ni faatalanoaga, ia faataʻitaʻi muamua a o mamao le taimi. O le mea sili e tatau ona fai, ia fua le umi o lau vaega a o faataʻitaʻia ma le leotele.

Ia vaevae lau mataupu. E tusa lava po o lou tofiga o se lauga po o se talanoaga ma le aofia, o le a e iloa le aogā pe a vaevae lau mataupu i ni vaega. Ia fuafua po o le ā le umi o vaega taʻitasi, ma tusi i tafatafa ane o ia vaega. A o faia lau taulimaga ia faamautinoa ua e pipii i le taimi ua faatulagaina mo vaega taʻitasi. I se talanoaga ma le aofia, ʻalofia le faataga o le tele o manatu mai le aofia i le amataga o se mataupu, ina ia aua neʻi faatopelauina ai le talanoaina o isi manatu e sili ona tāua ia e mulimuli mai. E tatau ona lava se taimi o le faisuʻesuʻega o Le Olomatamata e autalu ai le pusa o fesili autalu lenā e i le faaiʻuga o le mataupu. E tatau foʻi ona faaeteete ia faisuʻesuʻega ia aua neʻi faaaogā uma ma le taimi ua tuu mo le pese ma le tatalo faaiʻu.

Ia faaiʻu i le taimi tonu. Afai e tele ni vaega i se sauniga, e pei o le Sauniga o le Auaunaga, e ao i failauga taʻitoʻatasi ona iloa le taimi e amata ma faaiʻu ai lana vaega. O le ā e mafai ona faia pe afai ua ovataimi le sauniga? E mafai e se uso po o ni uso ona faasao le taimi e ala i le oto mai na o manatu tāua ae aua le auiliiliina uma manatu. O se tasi lenā o faailoga e iloa ai le faiaʻoga tomai pe afai e mafai ona ia faia faapea.

A o i tatou le aofia, e mafai ona tatou fesoasoani i le uso lea e faia le mataupu e ala i le faapupuu ma tuusaʻo a tatou tali. I le faia faapea, e mafai ai ona tatou saosaolaumea uma lava i sauniga, ina “ia faia mea uma lava ma le matagofie ma le sauni lelei.”—1 Kori. 14:40.