Ia Faamuamua le Auai e Lē Aunoa i Sauniga
1 E faamuamua e aiga Kerisiano le auai e lē aunoa i sauniga a le faapotopotoga. Ae ona o mea fai o le olaga i aso nei ua tulaʻi mai ai se luʻi. Po ua avea ea feʻau i le aiga, galuega totogi, po o le faia o meaaʻoga ma mea ua amata ona ōia ai le taimi lea sa tuu ese mo le tapuaʻiga iā Ieova? O le tagaʻi i mea e pei ona silasila i ai Ieova o le a fesoasoani iā i tatou e tausisi ai i mea e tatau ona faamuamua.—1 Samu. 24:6; 26:11.
2 Sa lē amanaʻia ma le loto i ai e se tamāloa Isaraelu le silasila a Ieova i le tapuaʻiga, i le faia o seuseu po o le fai fafie i le Sapati. Atonu sa manatu le tamāloa e faapea o loo ia faia lenei mea mo lona aiga pe na manatu foʻi ua na o sina gaoioiga laʻitiiti. Ae peitaʻi, o le faasalaga na tuuina i lenei tamāloa ua faaalia ai e Ieova e faapea, o le faia o galuega masani i taimi ua faatulaga mo le tapuaʻiga iā te ia o se mea e ao ona manatu mamafa i ai.—Nu. 15:32-36.
3 Faafetaiaʻia o le Luʻi: O le toʻatele lava o tagata, o se luʻi le faatulaga o galuega totogi ia lē faalavelaveina ai le auai i sauniga. Ua faafetaiaʻia e nisi lenei luʻi e ala i le talanoa atu i o latou pule, fesuiaʻi sifi ma ē e faigaluega faatasi, saʻilia o se galuega e sili atu ona talafeagai, po o le faafaigofie o le auala e ola ai. E mautinoa o na faataulaga o loo faia mo le tapuaʻiga moni, e faafiafiaina ai le Atua.—Epe. 13:16.
4 E mafai foʻi ona avea o se luʻi le faia o meaaʻoga. Na faapea mai se talavou: “E fai nisi o aʻu meaaʻoga a o leʻi oo i le taimi o sauniga, ona toe fai foʻi lea pe a foʻi mai i le fale.” Pe afai e lē mafai ona faia uma meaaʻoga lea e tuu mai e fai i pō o sauniga, e faamalamalama e nisi o mātua i faiaʻoga faapea o sauniga faa-Kerisiano o le mea lea e faamuamua e lo latou aiga.
5 O le lagolagosua ma le fuafua lelei i le aiga, o mea tāua ia i le faataunuuina o galuega i le fale a o sauniuni le aiga e vave taunuu atu i le sauniga. (Faata. 20:18) E oo lava i tamaiti, e mafai ona aʻoaʻoina e fai o latou laʻei ma sauni e ō ese atu mo le sauniga i le taimi ua faatulagaina. O le faataʻitaʻiga a mātua e mafai ona tāmau ai iā latou fanau le tāua o sauniga.—Faata. 20:7.
6 A o faateleina omiga o lenei faiga o mea, e tāua tele lo tatou auai e lē aunoa i sauniga a le faapotopotoga. Seʻi o tatou faaauau ona vāai i mea e pei ona silasila i ai Ieova, ma avea le auai e lē aunoa i sauniga o se mea e ao ona tatou faamuamuaina.—Epe. 10:24, 25.