Faataʻitaʻi i Uiga ma Manatu sa iā Iesu
1. O le ā le manatu sa faaalia e Iesu?
1 E ui lava e tatou te leʻi vāai lava i le Alo o le Atua, ae e ala i faamaumauga tusitusia o le soifuaga ma le faiva a Iesu, ua tatou alolofa moni ai lava iā te ia. (1 Pete. 1:8) O le usiusitai i le finagalo o lona Tamā, na ia tuua ai lona tulaga maualuga i le lagi ae afio mai i le lalolagi. I le avea ai o se tagata, na ia auauna atu ma le lē manatu faapito i isi ma avatu lona soifua e sui ai tagata. (Mata. 20:28) Ua timaʻi mai le Afioga a le Atua iā i tatou e faapea: “Ia iā te outou foʻi lea lava manatu sa iā Keriso Iesu.” E faapefea ona tatou faaalia lona uiga faataulaga?—Fili. 2:5-8, LT.
2. O le ā le luʻi o loo fesagaʻia e le toʻatele o Kerisiano, ma o le ā e fesoasoani iā i latou e foʻia ai?
2 Pe a Lagona le Vaivai: E ui lava sa lelei atoatoa Iesu, ae sa vaivai foʻi o ia. I se tasi taimi, a o ‘lē lavā i lana malaga,’ sa ia avatu ai se molimau māeʻaeʻa i se fafine Samaria. (Ioa. 4:6) Ua fesagaʻi foʻi Kerisiano i aso nei ma se luʻi faapena. Pe a uma se vaiaso o galuega mamafa, e mafai ona faigatā ona maua se malosi e auai i le galuega talaʻi. Ae peitaʻi, afai e tatou te faia e lē aunoa, o le a tatou iloa ai o le faiva faa-Kerisiano e faafouina ai faaleagaga i tatou.—Ioa. 4:32-34.
3. E faapefea ona tatou faataʻitaʻi i le naunau o Iesu e aʻoaʻo atu?
3 I se isi taimi, sa ō atu ai Iesu ma ona soo i se nofoaga tuufua ina ia maua ai sina mālōlōga. Peitaʻi, na iloa e le motu o tagata e toʻatele ma taufetuli e muamua atu ina ia feiloaʻi iā i latou. Na i lo le toʻatamaʻi, sa ‘mutimuti vale lona alofa iā te i latou’ ma sagaʻi atu e ‘aʻoaʻo iā te i latou i mea e tele.’ (Mare. 6:30-34) O le amata ma faia o suʻesuʻega faale-Tusi Paia e manaʻomia ai uiga faapena. E manaʻomia ni taumafaiga faifai pea ma se alofa moni mo tagata. Afai e lē o faia sau suʻesuʻega faale-Tusi Paia i le taimi nei, aua le faavaivai i le saʻilia o se suʻesuʻega.
4. E faapefea i le paeonia lagolago ona fesoasoani iā i tatou e faataʻitaʻi ai i uiga ma manatu sa iā Keriso?
4 Ia Faamuamua Manaʻoga Faaleagaga: O le paeonia lagolago e mafai ona fesoasoani iā i tatou e taulaʻi atu ai i gaoioiga faaleagaga. Na tusi mai se tuafafine talavou e faapea: “Sa faalaeiauina e le tinā o laʻu uō i maʻua e matou te paeonia lagolago faatasi mo se masina. Sa ou fiafia lava ina ua matou paeonia faatasi ma ia. Sa ou olioli i le oo ina iloa lelei o uso ma tuafāfine, ma e leʻi umi ae pei i latou o soʻu aiga. Sa ou fiafia foʻi i le mauaina o avanoa e talanoa ai i isi e faatatau iā Ieova, ma aʻoaʻoina i latou i upu moni matagofie o le Malo. O nei mea uma ua ou lagonaina ai le vavalalata iā Ieova ma lana faalapotopotoga.”—Sala. 34:8.
5. Aiseā e ao ai ona faaauau ona taumafai e faataʻitaʻi i uiga ma manatu sa iā Iesu?
5 E tatou te fesagaʻi uma lava ma se tauiviga i o tatou tino lē lelei atoatoa ma o tatou faanaunauga e faafiafia Ieova. (Roma 7:21-23) E tatau ona tatou teena le agaga o le lalolagi o le lē manaʻo e tigāina. (Mata. 16:22, 23) E mafai ona fesoasoani Ieova iā i tatou ina ia taulau manuia i lenei tulaga, e ala i lona agaga paia. (Kala. 5:16, 17) A o tatou faatalitali mo lo tatou faaolataga i le lalolagi fou amiotonu a le Atua, seʻi o tatou faataʻitaʻi atu i uiga ma manatu sa iā Iesu e ala i le faamuamua o manaʻoga o le Malo faapea ma manaʻoga o isi na i lo tatou.—Mata. 6:33; Roma 15:1-3.