Ia Faailoa Atu Lou Lotofaafetai
1 E ui lava o loo tatou ola i “aso faigatā” ae tele ni māfuaaga e tatou te lotofaafetai ai iā Ieova. (2 Timo. 3:1) E aupito sili i nei mea uma, le mea alofa tautele o lona Alo lea na foaʻi mai mo i tatou. (Ioa. 3:16) E lē gata i lea, a o matelāina faaleagaga i latou o i lotu sesē, ae o loo tatou olioli i le anoanoaʻi o taumafa faaleagaga. (Isa. 65:13) O i tatou o se vaega o le ʻauuso i le lalolagi aoao, ma ua faaeaina e faia se sao i le faalauteleina atu ma le fiafia o le tapuaʻiga moni. (Isa. 2:3, 4; 60:4-10, 22) E faapefea ona tatou faailoa atu iā Ieova lo tatou lotofaafetai ona o faamanuiaga ua ia liligi mai iā i tatou?—Kolo. 3:15, 17.
2 Auaunaga Fiafia ma le Lotoatoa: Ina ua talanoaina le foaʻi faaletino, na tusi le aposetolo o Paulo e faapea: “E alofa le Atua i lē ua foaʻi ma le loto mālie.” (2 Kori. 9:7) E faatatau foʻi lenei mataupu silisili i la tatou auaunaga i le Atua. E faaalia le lotofaafetai i lo tatou matuā naunau i le upu moni, lo tatou fiafia e auai i sauniga faa-Kerisiano, lo tatou maelega i le faiva i le fanua, ma lo tatou lotofiafia e faia le finagalo o le Atua.—Sala. 107:21, 22; 119:14; 122:1; Roma 12:8, 11.
3 I Isaraelu anamua, e leʻi faamaʻoti maia e le Tulafono se vaega patino mo nisi o taulaga e ofoina atu. Sa mafai e tagata tapuaʻi taʻitoʻatasi ona faaalia lona lotofaafetai e ala i le foaʻi atu “e tusa ma le manuia” ua ia maua mai iā Ieova. (Teu. 16:16, 17) E faapena foʻi i aso nei, o le a uunaʻia i tatou e le lotofaafetai e faia le mea aupito sili tatou te mafaia i le galuega talaʻi o le Malo ma le faia o soo i le mafai e oo i ai. I masina o le tau māfanafana, e masani ona maua ai isi avanoa e faaalia ai le lotofaafetai. E faaaogā ai e nisi ia taimi e mālōlō ai mai galuega, po o aʻoga, e faateleina ai o latou taimi e auai i le auaunaga i le fanua, e mafai foʻi ona avea ai o se paeonia lagolago. Pe e mafai la ona faateleina lau faiva?
4 Faateleina le Faafetai: O se auala tāua e tatou te faaalia ai lo tatou lotofaafetai iā Ieova, o le tatalo. (1 Tesa. 5:17, 18) Ua uunaʻia i tatou e le Afioga a le Atua ina ia ‘faateleina le faatuatua ma le faafetai.’ (Kolo. 2:7) E tusa lava pe tatou te pisi, pe i se tulaga lotomafatia, e tatau lava ona faaaofia i a tatou tatalo i aso taʻitasi le faafetai. (Fili. 4:6) O le mea moni, e auala i la tatou faiva, faapea ma a tatou tatalo, e mafai ona “faatele ai le viiga o le Atua i le tele o le faafetai.”—2 Kori. 9:12.