‘Ia Faalautele Atu’
1. O le a le tiute fai a i tatou taʻitoʻatasi?
1 I le ʻauuso Kerisiano, e tofu lava i tatou ma le tiute fai e saosaolaumea ai i le māfana o le faapotopotoga. (1 Pete. 1:22; 2:17) E maua lenā māfana pe a “faalautele atu” lo tatou alofa māfana o le tasi i le isi. (2 Kori. 6:12, 13, NW) Aiseā e tāua tele ai lo tatou iloa lelei o o tatou uso ma tuafāfine?
2. Aiseā e tāua ai le faia o ni faauōga ma uso tapuaʻi?
2 E Faamalosia ai le Agaga Faauō: A o agaʻi ina tatou masani lelei ma uso talitonu, e oo ina atili ai ona tatou talisapaia lo latou faatuatua, onosai, ma isi uiga lelei. E faatauvaa ai iā i tatou o latou masei, ae faamalosia noataga o faauōga. O le iloa lelei e le tasi o le isi, o le a sili ai ona tatou fefaamāfanafanaaʻi ma atiina aʻe e le tasi le isi. (1 Tesa. 5:11) E mafai ona avea i tatou ma “faamatalaloto” i isi ina ia tetee atu i taaʻiga lē mamā a le lalolagi a Satani. (Kolo. 4:11) I le vaai atu i nei omiga ua faatumulia ai le lalolagi i nei aso e gata ai, maʻeu so tatou lotofaafetai ona o le iai o ni uō lelei i tagata o Ieova!—Faata. 18:24.
3. E faapefea ona avea i tatou o se fesoasoani e faamalosia ai isi?
3 O uō mamae, e mafai ona faamalosia ma faamāfanafanaina ai i tatou pe a fesagaʻi ma tofotofoga matuiā. (Faata. 17:17) E manatua e se tasi Kerisiano o lē sa tauivi ma faalogona e faapea ua lē aogā o ia: “E iai uō e latou te fai mai upu faamālō ma faalaeiau iā te aʻu, ina ia fesoasoani e aveesea ai oʻu mafaufauga lē mautinoa sa iai.” O uō faapena o se faamanuiaga mai iā Ieova.—Faata. 27:9.
4. E mafai faapefea ona tatou iloa lelei isi i le faapotopotoga?
4 Faateleina le Naunau i Isi: E faapefea ona faateleina lo tatou alofa mo uso talitonu? E lē gata i le faafeiloaʻia o isi i sauniga Kerisiano, ae ia taumafai e faaaofia i latou i ni talanoaga uigā. Ia faaalia le naunau māfana e aunoa ma le isuisu fua i mataupu a tagata. (Fili. 2:4; 1 Pete. 4:15) O le isi auala e faalautele atu ai i isi, o le valaaulia lea o i latou mo se taumafataga. (Luka 14:12-14) Pe e fuafua foʻi e te lua galulue i le faiva i le fanua. (Luka 10:1) A o tatou tausolomua ina ia iloa lelei o tatou uso, ua tatou siitia ai le autasi i le faapotopotoga.—Kolo. 3:14.
5. O le ā se tasi o auala e faalautele atu ai a tatou faauōga?
5 Pe e tatou naunau e filifilia a tatou uō mamae tau lava o i latou e tatou te tupulaga faatasi, pe e na o i latou e tutusa mea tatou te fiafia i ai? E lē tatau i na tulaga ona faatapulaaina ai le faia o uō i totonu o le faapotopotoga. Na faia e Tavita ma Ionatana faapea Ruta ma Naomi ni noataga malosi o ni faauōga e ui i le eseese o tausaga ma talaaga. (Ruta 4:15; 1 Samu. 18:1) Pe mafai ona faalautele atu lau faauōga? O le faia faapea, e mafai ona aumaia ai ni faamanuiaga e leʻi faatalitalia.
6. O ā ni aogā o le faalautele atu o lo tatou alofa mo o tatou uso?
6 O le faalautele atu o lo tatou alofa mo isi, ua faamalosia ai e le tasi le isi ma maua ai le filemu i totonu o le faapotopotoga. E lē gata i lea, o le a faamanuia ai e Ieova i tatou ona o le alofa ua tatou faaalia i o tatou uso. (Sala. 41:1, 2; Epe. 6:10) Seʻi fai ma ou sini le faamasani lelei atu i le toʻatele o uso i le tele e te mafaia ai.