Ia Lelei Ou Mata
1. O le ā le uiga o le lelei o mata, ma aiseā e tāua ai?
1 I lana lauga i luga o le Mauga, sa taulaʻi atu ai Iesu i le telē o le aafiaga o mata faafaatusa po o mata faaleagaga i lo tatou olaga atoa. Na ia fetalai e faapea: “Pe afai foʻi e lelei ou mata, e malamalama uma ai lou tino. A e afai e leaga ou mata, e pōuliuli uma ai lou tino.” (Mata. 6:22, 23) O mata e lelei, e taulaʻi atu i se fuafuaga e tasi—o le faia lea o le finagalo o le Atua—e lē tosina ese e lē soona popole i mea faaletino. (Mata. 6:19-21, 24-33) O le ā e fesoasoani iā i tatou e tausia ai pea le lelei o mata?
2. O le ā le vaaiga i mea faitino o loo faalaeiau e le Afioga a le Atua?
2 Ati Aʻe le Lotomalie: O le tausia lelei o manaʻoga o le aiga o se tasi, o se matafaioi faa-Kerisiano. (1 Timo. 5:8) Ae e lē manaʻomia ai le faia o ni a tatou saʻiliga e lē muta mai o mea e aupito sili ona lelei, ma mea aupito fou o loo iai. (Faata. 27:20; 30:8, 9) Na i lo lenā, ua timaʻi mai le Tusi Paia iā i tatou ia maua le lotomalie i “mea e aai ai ma mea e oofu ai” o mea ia e manaʻomia i le olaga. (1 Timo. 6:8; Epe. 13:5, 6) O le utagiaina o lenei fautuaga e fesoasoani iā i tatou e saʻo ai le mea e taulaʻi atu i ai o tatou mata.
3. O le ā e fesoasoani iā i tatou ia ʻalofia ai avega mamafa e faia e i tatou lava?
3 E atamai ona tatou ʻalofia avega mamafa e faia e i tatou lava i le faia o aitalafu e lē manaʻomia, o meatotino po o gaoioiga ia e manaʻomia ai le tele o taimi ma le mafaufau e alu ai. (1 Timo. 6:9, 10) E faapefea ona tatou faia lenei mea? Pe a mafaufau i se gaoioiga e fai, ia tatalo faatauanau e faatatau i le mataupu ma ia fuafua lelei pe faamata o le a lē faalavelavea ai a tatou gaoioiga faaleagaga. Ia maumauaʻi e faamuamua mea faaleagaga i lou olaga.—Fili. 1:10; 4:6, 7.
4. Aiseā e tatau ai ona tatou tulimataʻia auala e faafaigofie ai o tatou olaga?
4 Ia Faafaigofie Lou Olaga: O le isi fesoasoani e teena ai le tosina atu ma le matapeʻapeʻa i mea faitino, o le faafaigofie lea o lou olaga. Na faapea mai se tasi o uso na mafai ona tausia lelei lona aiga e aunoa ma le tele o mea faitino: “Ua tele atu nei mea e mafai ona ou fai i le faapotopotoga e auauna ai i oʻu uso. Ua ou talitonu nei e faamanuia e Ieova ana auauna uma, pe a latou faamuamua le tapuaʻiga moni na i lo o latou lava manaʻoga.” Pe mafai ea ona e olioli i faamanuiaga e sili atu e ala i le faafaigofie o lou olaga?
5. Aiseā e manaʻomia ai taumafaiga faifai pea ina ia tausia ai le lelei o tatou mata?
5 E manaʻomia taumafaiga faifai pea e teena ai taaʻiga a Satani, lana lalolagi matapeʻapeʻa, ma o tatou lava tino lē lelei atoatoa. Na i lo le tosina solo o o tatou mata, ia taulaʻi atu i le faia o le finagalo o le Atua ma lo tatou faamoemoe tautele o le ola lea e faavavau.—Faata. 4:25; 2 Kori. 4:18.