Ia Agalelei ma Alolofa Atu i Isi
1 O Toreka e “tele ana galuega lelei ma meaalofa na ia faia.” (Galu. 9:36, 39) O lona agaga foaʻi na alofagia ai o ia e Ieova atoa ma tagata latou te iloa o ia. Ua faapea mai le Eperu 13:16: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.” E faapefea ona tatou agalelei ma alolofa atu i isi i aso nei?
2 O se tasi o auala e maua ai e isi aogā mai iā i tatou, o le tufa atu lea i ai o a tatou “ʻoa” po o mea e sili ona tāua iā i tatou. (Faata. 3:9) O a tatou foaʻi i le galuega i le lalolagi aoao ua mafai ai ona fausia Maota o le Malo, Maota Fono ma fale o lālā i le lalolagi atoa. O lo tatou limafoaʻi ua mafai ai e le faitau miliona o tagata ona maua aogā mai aʻoaʻoga faatiokarate, ma auaufaatasiga faaleagaga lea e ati aʻe ai.
3 Ia Faamāfanafana Atu: Pe a tutupu ni mala, e nofosauni tagata o Ieova e faaalia le “agalelei” i uso talitonu faapea ma i latou tatou te lē tapuaʻi faatasi. (Galu. 6:10) Ina ua mavae le pasae aʻe o se mea i totonu o se fale e fai ai ni vailaau i Falani, ona faapea mai lea o le tala a se ulugalii e nonofo e sosoo lava ma le fale lea: “Na vave lava ona ō mai o tatou uso Kerisiano e fesoasoani e faamamā le vaega o le fogāfale lea ma te nonofo ai faapea ma vaega o le fogāfale lea na nonofo ai isi. Sa matuā maofa o matou tuaoi e vaai i le toʻatele o tagata na ō mai e fesoasoani.” Sa faapea atili mai se isi tuafafine: “Na lolofi mai toeaina e fesoasoani iā i matou. Na ō mai e faamalosiau iā i matou. O le mea tonu lava lenā na matou manaʻomia, na i lo le fesoasoani faaletino.”
4 A o tele auala e tatou te faaalia ai le agalelei i o tatou tuaoi, ae o le auala e sili ona lelei e fesoasoani ai iā i latou, o le tufa atu lea i ai o le iloa e faatatau i le upu moni, lea e aofia ai le “faamoemoe i le ola e faavavau” ua folafola mai e Ieova lava ia. (Tito 1:1, 2) Ua aumaia e le feʻau o le Tusi Paia le faamāfanafanaga moni lava iā i latou o loo faanoanoa i tulaga o le lalolagi o loo iai nei ma lo latou lava tulaga agasala. (Mata. 5:4) Seʻi o tatou agalelei ma alolofa atu i isi pe a fai o loo mafai ona tatou faia faapea.—Faata. 3:27.