Faasologa a le Aiga—Sauniga a le Faapotopotoga
1 Afai o oe o se matua Kerisiano, e te manaʻo la ia ola aʻe lau fanau e alolofa ma auauna iā Ieova, ma ia mauaina le ola e faavavau i le lalolagi fou e pei ona folafola mai e le Atua. E faapefea ona e fesoasoani iā i latou e faamuamua le tapuaʻiga iā Ieova i o latou olaga? O le auala e sili ona lelei, e ala lea i lau faataʻitaʻiga. (Faata. 20:7) Na faapea mai se tasi o tuafafine ina ua ia toe manatua le faaaʻoaʻoga a lona tinā: “E leʻi fesiligia lava pe e matou te ō i le sauniga pe leai.” Ma o lenā lagona o loo tumau pea iā te ia.
2 Po o malamalama ea lou aiga i le fuafuaga o sauniga a le faapotopotoga? O aʻoaʻoga o loo tatou maua mai i nei faatasitasiga e faamalosia ai i tatou e faia e lē aunoa le finagalo o le Atua, ma o le aufaatasiga o loo tatou olioli ai ma o tatou uso, o se puna tāua lea o faalaeiauga. (Isa. 54:13; Roma 1:11, 12) Ae peitaʻi, o le fuafuaga autū mo na sauniga o le viia ai o Ieova “i totonu o faapotopotoga.” (Sala. 26:12) O sauniga faa-Kerisiano e tatou te maua ai avanoa e faaalia ai lo tatou alofa mo Ieova ma tapuaʻi atu iā te ia.
3 “Ia Faaeteete”: O le talisapaia o le fuafuaga faale-Atua mo a tatou sauniga, o le a uunaʻia ai i tatou “ia faaeteete” ina neʻi fāifai mālie ona tatou ati aʻe se masaniga o le misi o sauniga i nai mea e itiiti lo latou tāua. (Efe. 5:15, 16; Epe. 10:24, 25) Pe a fai le faasologa a lo outou aiga, e te ono amata i le faatulaga o taimi mo sauniga a le faapotopotoga. Ona faamautinoa lea ia aua neʻi faataga so o se mea e faalavelavea ai lenā faasologa. Ia faamautinoa o loo tuu faamuamua e lou aiga le auai i sauniga.
4 Pe e lē faagaeetia ai ea i tatou pe a tatou faitau i tala i o tatou uso o loo tauivi ma ni toʻatugā ina ia auai i sauniga faapea ma fonotaga? E ui lava e lē o faigatā naʻuā lou tulaga o iai, ae atonu foʻi o loo e fesagaʻia ni luʻi. Ua faafaigatā atili e Satani tagata o le Atua e tapuaʻi atu iā Ieova. Ae ui i lea, ia faamautinoa o loo iloa e lau fanau taumafaiga maumauaʻi a lo outou aiga e auai i sauniga a le faapotopotoga. O le faia faapea, o le a e avatu ai iā i latou meaalofa faaleagaga o le a lē mafai ona latou faagaloina.