Faasologa a le Aiga—Suʻesuʻega a le Aiga
1 O le meaalofa sili e mafai e oe o se matua Kerisiano ona avatu i lau fanau, o le totōina iā i latou o le alofa iā Ieova lea o loo iā te oe. O le nofoaga e sili ona lelei e faia ai faapea, “pe a e nofo i lou fale” mo le suʻesuʻega faale-Tusi Paia a le aiga i le vaiaso. (Teu. 6:5-7) E tusa lava pe iai sau tane talitonu, nofo i totonu o se aiga e eseese tapuaʻiga, po o se matua nofo toʻatasi, e mafai lava ona e fesoasoani i lau fanau e māfana atu iā te oe faapea ma Ieova, e ala i le faia e lē aunoa o le suʻesuʻega faaleaiga.
2 Amata le Suʻesuʻega a le Aiga: O le laasaga muamua lava, ia faavae se masaniga o le suʻesuʻe faatasi o se aiga. Pe afai e te lē mautinoa po o afea le taimi e fai ai le suʻesuʻega, aiseā e lē talanoa ai le tou aiga? (Faata. 15:22) Afai e iai sau fanau laiti, e ono sili atu iā te oe ona faia ni suʻesuʻega pupuu a o faagasolo le vaiaso. Ia fuafua po o lē fea faasologa e sili ona lelei mo lou aiga. Ia faatulaga se taimi maʻoti mo le suʻesuʻega i le faasologa a le tou aiga, ma ia maumauaʻi e pipii atu i ai.
3 O le ā o loo outou suʻesuʻeina? E suʻesuʻeina e nisi le lesona lea o le a talanoaina i le Suʻesuʻega Tautusi a le Faapotopotoga po o le Suʻesuʻega o le Olomatamata. E suʻesuʻe e isi ia mataupu ua faatulaga faapitoa mo fanau talavou. Na faapea mai se tamā o se tamaitiiti ma se teineitiiti: “O se tasi o mea e avea ai la matou suʻesuʻega ma mea e sili ona fiafia ai i le vaiaso, o lo matou faatino lea o vaaiga o loo i Laʻu Tusi o Tala o Le Tusi Paia. O le loloto o manatu ma le malamalama o loo maua mai ai, e sili atu ona tāua na i lo le tele o palakalafa e fai.”
4 Suʻesuʻega i Vaiaso Taʻitasi: E tatau ona fai le suʻesuʻega faaleaiga e lē aunoa, ma ia avea o se mea e faatalitalia ma le fiafia e tagata uma o le aiga. E mafai ona fetuunaʻi le aso ma le taimi o le suʻesuʻega ina ia taulima tulaga lē maʻalofia e tulaʻi mai. Atonu e iai foʻi se taimi e manaʻomia ai ona toe fetuunaʻi le mataupu. Ae peitaʻi, e so o se fetuunaʻiga lava e fai, e lē tatau ona umi ona faalavelavea ai le faasologa o le suʻesuʻega faaleaiga lea ua uma ona faataatia. I se tasi aiga, na faapea mai se faamatalaga a se teineitiiti: “Afai e suia le taimi o la matou suʻesuʻega, e faapipii lava e Tamā se pepa i le tapuni o le pusa aisa ina ia matou iloa uma le taimi e fai ai.” E faamālō i nei taumafaiga ina ia faatumau le faia o suʻesuʻega faaleaiga e lē aunoa! A o tausia aʻe lau fanau i “aʻoaʻiga ma apoapoaʻiga a le Alii,” ua e faaalia ai lou alofa e lē gata iā i latou ae faapea foʻi ma lo tatou Tamā faalelagi.—Efe. 6:4.