Faasologa a le Aiga—Mau o le Aso
1 O mātua alolofa e la te faia ni taumafaiga i aso taʻitasi e saunia ai taumafa lelei mo la la fanau. Ae e sili atu ai ona tāua le saunia mo i latou o taumafa faaleagaga mai le Afioga a le Atua. (Mata. 4:4) O se tasi o auala e te fesoasoani ai i lau fanau e ati aʻe le naunau i meaʻai faaleagaga ma “tutupu ai i le faaolataga” o le talanoaina lea e le aiga o le mau ma le faaopoopoga i aso taʻitasi. (1 Pete. 2:2) O fea la le taimi e talanoaina ai le mau i le faasologa a le tou aiga?
2 I le Taimi o Taumafataga: O le amata o lou aso i le talanoaina o le mau e mafai ona fesoasoani ai i lou aiga e mafaufau iā Ieova i le aso atoa. (Sala. 16:8) Na filifili se tinā e faitau ma talanoaina le mau ma le faaopoopoga ma lana tama tama a o fai le mālū taeao ma fai le tatalo a o leʻi alu atu le tama i le aʻoga. Na faamalosia ai le tama e taofi mau i lona faatuatuaga i le feagai ai ma faiga faalotonuu, teena o faaosoosoga i amioga lē mamā, ma faia se molimau ma le lototele i tamaiti faapea ma faiaʻoga. E ui lava e na o ia le Molimau i le aʻoga, ae na te leʻi lagonaina e faapea e na o ia le Molimau o loo iai.
3 Afai e lē talafeagai le talanoaina o le mau i le taeao, e ono talanoaina la e lo outou aiga i se taimi mulimuli ane, atonu i le taimi o le taumafataga. O nisi e latou te talanoaina mea na tutupu i le auaunaga i le fanua, ma manatu ua latou fiafia ai i a latou faitauga Tusi Paia o loo fai. E manatua ma le fiafia e le toʻatele taimi o taumafataga i le afiafi, o nisi ia o taimi sa sili ona fiafia ai o se aiga.
4 I le Pō: O nisi o aiga, o le taimi sili ona lelei e talanoaina ai le mau o le aso, o le taimi a o leʻi momoe. O le taimi foʻi lea e sili ona lelei e tatalo faatasi ai o se aiga. A o faalogo lau fanau o e talanoa e faatatau iā Ieova i aso uma, ma tatalo iā te ia, o le a moni la Ieova iā i latou.
5 Tau ina ia faamanuia Ieova i au taumafaiga i le totōina o le upu moni i lau fanau, a o e faaaogā lelei le tamaʻitusi Iloiloina o le Tusi Paia i Aso Taʻitasi.