Ia Faaaogā Tatau a Tatou Lomiga Faale-Tusi Paia

1, 2. O ā lagona o le toʻatele o tagata e faatatau iā tatou lomiga, ma o le ā le fesili ua tulaʻi mai ai?

¹ “Sa ou faitauina a outou lomiga talu mai lava le 1965. Ou te suʻe i le Tusi Paia pe a ou faitau a outou lomiga, ma o mea uma lava o loo iai e fetaui lelei ma le Tusi Paia. Sa ou manaʻo lava e iloa le mea moni e faatatau i le Atua ma Iesu, ma ou te faapea atu ma le faamaoni o loo oʻu mauaina tali saʻo mai i a outou lomiga, ma le Tusi Paia.” O le faamatalaga lenā na tusi atu ai se tasi o tamāloa i le ofisa ulu o Molimau a Ieova. I le tusi lava lenā, na ia talosaga atu ai mo se suʻesuʻega faale-Tusi Paia.

² I le pei o lenā tamāloa loto faafetai, e faitau miliona tagata i le lalolagi e talisapaia lomiga e suʻesuʻe ai le Tusi Paia ua saunia e “le auauna faamaoni ma le mafaufau.” (Mata. 24:45) I tausaga taʻitasi, ua lomia ai le anoanoaʻi o lomiga e fesoasoani i tagata loto faamaoni ‘ina ia iloa lelei le upu moni.’ (1 Timo. 2:4) E faapefea ona tatou faaaogā tatau a tatou lomiga faale-Tusi Paia?

3. E faapefea ona tatou ʻalofia le faamaumau o lomiga?

³ Aua le Faamaumauina: E puupuu lava sina taimi, ae e mafai ona tatou faaputuina ai le anoanoaʻi o lomiga na i lo lomiga e tatou te faaaogāina moni lava. O le ā e tatou te fai ina ia ʻalofia ai le faamaumau o a tatou lomiga tāua? E manaʻomia le faautauta pe a aumai lomiga e faaaogā i le faiva. Na i lo le aumai o ni kopi se tele o se lomiga o le a tatou ofoina i tagata, e ono aumai na o se lomiga se tasi pe lua ma toe aumai nisi pe a uma ona ofo na lomiga. O le faia faapea, e ʻalofia ai le anoanoaʻi o lomiga o loo faaputuputu i o tatou fale. I se tulaga tutusa, afai e tele ni mekasini e lē o ofoina, e talafeagai ona toe faaitiitia lau ota o mekasini.

4. O le ā e mafai ona fai pe afai ua tele naʻuā lomiga a se faapotopotoga?

⁴ Lomiga ua Tele Naʻuā: Afai o iai ni lomiga patino a le faapotopotoga ua tele naʻuā, e mafai e le auauna o tusi ona siaki atu i isi faapotopotoga i lenā vaipanoa pe latou te manaʻomia ni lomiga faaopoopo. E mafai ona ofo lomiga tuai i tauaiga lē talitonu, i tagata aʻoga o le Tusi Paia faapea ma isi tagata. O i latou e fou mai i le faapotopotoga atonu e fiafia i le mauaina o nei lomiga tuai mo a latou fatatusi.

5. E faapefea ona tatou faaalia le talisapaia o a tatou lomiga?

⁵ E tatou te mananaʻo e ausia e a tatou lomiga le fuafuaga na lomia ai, o le fesoasoani lea i tagata faamaoni e aʻoaʻoina atili e faatatau iā Ieova ma ana fuafuaga matagofie. E pei lava ona e leʻi faamaumau e Iesu taumafa ina ua uma ona fafagaina faavavega tagata, o lo tatou sini o le faia o le mea sili e mafai e faaaogā ai a tatou lomiga faale-Tusi Paia ua saunia. (Ioa. 6:11-13) O le feʻau faasaoola o loo iai i a tatou lomiga e lē oo atu i loto o tagata loto faamaoni, pe afai e tuu ai pea i a tatou fatatusi po o ato talaʻi. O lea la, e tatau ona tatou mafaufau lelei pe a aumai lomiga mo le galuega talaʻi ma faaaogā lelei ina ia aogā i isi.—Fili. 4:5.