Ia Faaalia le Naunau Moni i Isi—E Ala i le Sauniuni Lelei

¹ O le sauniuni lelei mo le faiva e fesoasoani iā i tatou e faaalia le naunau moni i isi. E faapefea? Pe a tatou sauniuni lelei, o le a lē alu uma o tatou mafaufau i la tatou taulimaga ae taulaʻi atu i le tagata o le aiga. E lē gata i lea, e fesoasoani iā i tatou ia foʻia le popole ae tatou talanoa atu i tagata mai o tatou loto. E faapefea la ona tatou sauniunia se taulimaga aogā?

² Faaaogā se Taulimaga e Fetaui Lelei: Ia filifili mai i La Tatou Faiva o le Malo o Ianuari 2006 se taulimaga ua fautuaina, lea e fetaui lelei i la outou oganuu, ma mafaufau pe faapefea ona e faamatalaina i au lava upu. Ia fetuunaʻi i la outou oganuu. Mo se faaaʻoaʻoga, pe afai e masani ona outou feiloaʻi ma tagata e eseese a latou lotu, pe e eseese foʻi atunuu, mafaufau po o le a faapefea ona latou fiafia i lau taulimaga. O le fetuunaʻi o lau taulimaga i tagata eseese o loo e talanoa atu i ai, e faaalia ai lou naunau moni iā i latou.—1 Kori. 9:22.

³ Pe a amata ona e faaaogā le taulimaga, ia faaauau ona e faalelei atili lenā taulimaga. Talu ai e tāua tele upu amata, e ao ona e mātau le auala e tali mai ai tagata i lau faatomuaga. Pe faamata e naunau mai o ia i le mataupu? Po o tali mai i fesili o loo e fai atu? Afai e leai, ona fai lea o ni fetuutuunaʻiga seʻia e maua lelei se taulimaga e aogā.

⁴ Fesoasoani mo le Manatuaina o Mea: Ua avea o se luʻi i le toʻatele le manatuaina o se taulimaga pe a talanoa ma tagata i o latou aiga. Afai ua tupu lenā mea iā te oe, pe ua e taumafai e faataʻitaʻi leo tele lau taulimaga i se isi tagata? E mafai ona fesoasoani le faia faapea iā te oe ina ia manino ai manatu i lou mafaufau ma faamatala atu i se auala faigofie ma sologa lelei. E sauniunia ai foʻi oe e faafoe auala eseese e tali mai ai tagata o aiga.

⁵ O le isi fesoasoani e manatua ai mea, o le tusia lea o se aotelega puupuu o le taulimaga i se fasipepa ma toe autilo i ai a o leʻi oo atu i le fale. Ua iloa e nisi le aogā tele o le fasipepa lea, e fesoasoani iā i latou e maua ai le toʻa, ma lelei ai talanoaga ma tagata. I nei auala, o le sauniuni lelei e fesoasoani iā i tatou e faaalia ai le naunau moni i isi ma faaleleia ai lo tatou taulimaina o le tala lelei.