Ia Talanoa Atu i Isi i “le Malamalama o le Lalolagi”
1. O le ā le malamalama tele na valoia mai i le Afioga a le Atua, ma o le ā le aso faailogaina e mafai ona tataʻi faapitoa atu ai manatu i lenei malamalama?
1 Na valoia e Ieova e ala mai i le perofeta o Isaia e faapea: “O le nuu sa savavali i le pōuliuli, ua latou iloa le malamalama tele; o ē sa nonofo i le nuu o le ata o le oti, ua pupula mai iā te i latou le malamalama.” (Isa. 9:2) O lenā “malamalama tele” sa vaaia i le auala na soifua ai le Alo o le Atua lava ia o Iesu Keriso. O lana galuega talaʻi a o iai i le lalolagi, ma aogā na maua ona o lana taulaga na faaleleia ai le tulaga faaleagaga o i latou na i le pōuliuli. O le ituaiga malamalama lenā o loo manaʻomia e tagata i nei taimi o le pōuliuli. O le Talisuaga Afiafi a le Alii ua tatou maua ai se avanoa faapitoa e tataʻi atu ai manatu i “le malamalama o le lalolagi.” (Ioa. 8:12) I le tausaga na teʻa nei, na faaalia ai e le faitau miliona o tagata sina faatuatua, e ala i le aufaatasi ma i tatou ona o le usitaia o le faatonuga a Iesu: “[Ia] faia le mea nei e fai ma faamanatuga iā te aʻu.” (Luka 22:19) A o latalata atu i le Faamanatuga o le Maliu o Iesu i lenei tausaga, e faapefea ona tatou tataʻi atu manatu i le malamalama tele lea ua faasusulu mai e Ieova?—Fili. 2:15.
2. E faapefea ona tatou faateleina lo tatou loto faafetai mo le taulaga togiola, ma o le ā e iʻu i ai le faia faapea?
2 Ati Aʻe se Loto Talisapaia: O le vaitau o le Faamanatuga o se taimi lelei e toe manatunatu loloto ai i le tele o le alofa na faaalia e Ieova ma Iesu, i le saunia o le taulaga togiola mo tagata. (Ioa. 3:16; 2 Kori. 5:14, 15) O le manatunatu loloto e mautinoa le faateleina ai o lo tatou loto faafetai mo lenei sauniga mamalu. E mananaʻo tagata uma o Ieova e tuuʻese se taimi e faitau ma mafaufau loloto ai i le faitau Tusi Paia faapitoa mo le vaitaimi o le Faamanatuga, e pei ona faatulaga i la tatou tusi Iloiloina o le Tusi Paia i Aso Taʻitasi. O le mafaufau i uiga lē mafaatusalia o Ieova, lea e faaalia i lana sauniuniga o le togiola, e tatou te mitamita ai e avea o ia ma o tatou Atua. O le manatunatu loloto i le uiga o le togiola mo i tatou taʻitoʻatasi, e faateleina ai lo tatou lotofaafetai i le Atua ma lona Alo, ma uunaʻia ai i tatou e fai le mea sili e tatou te mafai i le faia o le finagalo o le Atua.—Kala. 2:20.
3. E faapefea ona tatou faaalia lo tatou talisapaia o le Faamanatuga?
3 Pe a loloto lo tatou talisapaia o le sauniuniga a Ieova mo le faaolataga, o le a iai se aafiaga o lo tatou naunau mo le Faamanatuga iā tatou tagata aʻoga o le Tusi Paia, toe asiga, tauaiga, tuaoi, uō i le aʻoga, uō i galuega, ma isi e tatou te valaaulia mo lenei sauniga faapitoa. (Luka 6:45) O lea la, ia fai ni taumafaiga faapitoa e valaaulia uma ai i latou na, ma avatu iā i latou tusi valaaulia mo le Faamanatuga e faamanatu ai iā i latou. Ina ia aua neʻi misia se tasi, ua iloa e le toʻatele le aogā o le faia o se lisi o i latou e masani ona latou valaaulia i le Faamanatuga, ma faaopoopo i ai tagata fou i tausaga taʻitasi. O le faia i se tulaga maopoopo ma faia le mea sili e mafai e valaaulia ai tagata loto fiafia, o le a avea o se auala lelei e faaalia ai lo tatou loto faafetai iā Ieova le Atua “i lana mea foaʻi fua e lē mafaamatalaina.”—2 Kori. 9:15.
4. O le ā e fesoasoani iā i tatou ina ia faateleina lo tatou sao i le faiva iā Mati ma Aperila?
4 Faatele so Tatou Sao i le Faiva: Pe mafai ona e faateleina sou sao i le faiva iā Mati ma Aperila? O le taumafai e tufa atu i isi “le tala lelei i le mamalu o Keriso” e mautinoa le faamanuiaina e le Atua. Ua poloaʻia e Ieova o le Puna o le malamalama uma faaleagaga: “Ia pupula mai le malamalama mai le pōuliuli.” (2 Kori. 4:4-6) Po o fea lava le taimi e talafeagai ai, o le a faatulaga e toeaina taimi e faia ai ni feiloaʻiga faaopoopo mo le auaunaga i le fanua ma nofoaga e fai ai, ma taulamua e lagolago i tagata talaʻi o loo mananaʻo e faaalu se taimi umi i le faiva. E ono aofia ai le galulue i le taeao pō i alatetele po o le faatulaga e fai oganuu o pisinisi, ma molimau atu e ala i le telefoni i le aoauli po o le afiafi foʻi. Ina ia fesoasoani e faateleina lou sao i le faiva, ia faatulaga lou sini mo ni itula talafeagai e maua, ma taumafai malosi ia maua. O le toʻatele lava e manatu, o le avatu iā Ieova o le mea sili e latou te mafai e aofia ai le avea o se paeonia lagolago.—Kolo. 3:23, 24.
5. Ua faapefea ona aogā i isi le faaitiitia o itula e manaʻomia mo le paeonia lagolago?
5 Pe Mafai Ona E Paeonia Lagolago? Ua silia nei i le fitu tausaga talu ona faaitiitia itula manaʻomia mo le paeonia lagolago. O lenei fetuutuunaʻiga ua mafai ai e le toʻatele o isi tagata ona maua le olioli ma faamanuiaga o le auaunaga o le paeonia lagolago. Pe na e faataʻitaʻia le paeonia lagolago? Ua fai ma masani a isi le faia faapea i tausaga taʻitasi. I le tele o faapotopotoga e toʻatele tagata talaʻi e latou te faia faatasi lenei paeonia, ma ua avea ma gaoioiga matilatila a le faapotopotoga i le tausaga ma maua ai faamanuiaga. Pe e mafai ona e faatulaga se masina lelei e paeonia lagolago ai i le vaitau o le Faamanatuga? E sili atu ona lelei le masina o Aperila mo nisi, ona e lima faaiʻuga o vaiaso.
6. O ā fuafuaga mataʻina ua mafai ona tatou maua?
6 Po o faatulaga la outou faapotopotoga e asia i le asiasiga a le ovasia matagaluega iā Mati po o Aperila? O se faamanuiaga faaopoopo e mafai ona e maua. E pei lava ona muaʻi faasilasila atu, i le tausaga faaleauaunaga o le 2006, o i latou uma lava o loo auauna o ni paeonia lagolago i le masina o le asiasiga a le ovasia o le matagaluega, o le a valaaulia e auai i le ʻafa muamua o le fono lea e fai ma paeonia i le vaiaso o le asiasiga. E lē taumatea o faamatalaga e faamalosia ai faaleagaga e mauaina i lenei fono, o le a fesoasoani i le toʻatele o paeonia lagolago e aapa atu e avea ma paeonia sauatoa. E lē gata i lea, i le masina o Mati, o le a tatou maua le olioli e fesoasoani atu i tagata ina ia maua le malamalama faaleagaga e ala i le lomiga fou e fai ai suʻesuʻega O ā Aʻoaʻoga Moni a le Tusi Paia? Aiseā e lē fai ai ma ou sini le amata o se suʻesuʻega faale-Tusi Paia i le tusi fou?
7, 8. (a) O le ā e fesoasoani iā i tatou e fai se faasologa ina ia paeonia lagolago? (e) E faapefea ona fesoasoani le felagolagomaʻi o se aiga, ma e faapefea ona aogā i le aiga atoa?
7 A o e mafaufau i itula e 50 lea e manaʻomia mo le paeonia lagolago, ia mafaufau po o le ā le faasologa e mafai ai ona e faasusulu atu le malamalama o le upu moni i le pe tusa e 12 itula i vaiaso taʻitasi. Ia talanoa ma i latou na taulau manuia i le faia faapea, atoa ai ma isi. O le faia faapea e ono faalaeiau ai i latou e tou te paeonia faatasi. O le fuafua lelei, ua iloa ai e tagata talaʻi papatiso e talavou pe matutua, e lē faigatā tele le ausia o itula faatulagaina. Ia tatalo mo lenā sini. O lea la, pe afai e mafai, fai loa au fuafuaga, ma olioli i le paeonia lagolago!—Mala. 3:10.
8 Ua iloa e le tele o aiga o le felagolagomaʻi o le aiga atoa, e mafai ai e se tagata e toʻatasi o le aiga ona ausia lenei sini. Na filifili se tasi o aiga e paeonia lagolago uma tagata talaʻi e toʻalima ua papatiso. O isi tamaiti e toʻalua e leʻi papatiso na faia ni a la taumafaiga e faateleina le la auaunaga. Na faapefea ona aogā i le aiga le faia o nei taumafaiga faaopoopo? Na latou tusi mai: “E ese le manaia o la matou masina i le talaʻiga, ma e matou te lagona le faamalosia atili ai o sootaga o lo matou aiga. E matou te faafetai iā Ieova mo lenei faamanuiaga matagofie!”
9. E faapefea ona faasusulu atu lo tatou malamalama i lenei vaitau o le Faamanatuga?
9 Po o le a faagaeetia ai ea i tatou i la tatou galuega faapitoa i masina o Mati ma Aperila, ma tatou atili vavalalata atu ai i lo tatou Tamā faalelagi? O le a faalagolago tele lava i a tatou taumafaiga e faateleina lo tatou alofa mo le Atua ma lona Alo ma faateleina lo tatou sao i le faiva. Seʻi o tatou filifili e pei ona faia e le faisalamo lea na faapea mai: “Ou te matuā vivii atu iā Ieova i loʻu gutu, ou te faaneenee atu iā te ia i totonu o le toʻatele.” (Sala. 109:30) O le a faamanuia e Ieova la tatou galuega maelega i le vaitaimi o le Faamanatuga. O lea, ia tatou faasusulu atu le malamalama tele ina ia toʻatele nisi e ō ese mai le pōuliuli ma maua “le malamalama o le ola.”—Ioa. 8:12.