Fesoasoani i Isi ia Maua Aogā o le Togiola
E Faia le Faamanatuga o le Maliu o Keriso iā Aperila 12
1. O le ā se tasi o auala e faaalia ai e tagata o le Atua lo latou loto faafetai mo le togiola?
1 “Faafetai i le Atua i lana mea foaʻi fua e lē mafaamatalaina!” (2 Kori. 9:15) Ua faamatalaina lelei e na upu o tatou faalogona e faatatau i le alofa agalelei o le Atua ua faailoa mai i ona tagata e ala iā Iesu Keriso. O le a matuā matilatila sea loto faafetai i le Atua, a o tatou potopoto faatasi e faamanatu le maliu o Keriso i le aso 12 o Aperila.
2. O ai isi e auai faatasi ma auauna a Ieova mo le Faamanatuina o le Maliu o Keriso, ma o le ā e manaʻomia ona latou fai ina ia aogā ai iā i latou le togiola?
2 Pe tusa e sefulu miliona isi tagata e latou te auai faatasi ma auauna a Ieova mo le faamanatuina o le Maliu o Keriso i tausaga taʻitasi. O le faia faapea, e latou te faaalia ai se agaga faafetai mo le taulaga a Keriso. Ae ui i lea, e manaʻomia ona latou faatuatua i le togiola ina ia aogā ai iā i latou. (Ioa. 3:16, 36) E faapefea ona tatou fesoasoani iā i latou e ati aʻe lea faatuatua? A o faagasolo lenei vaitau o le Faamanatuga, ia tatou faalaeiauina i latou, ia faia sa latou lava suʻesuʻega o le Tusi Paia ma auai i sauniga faalevaiaso a le faapotopotoga. Manatu i fautuaga o loo mulimuli mai.
3. E faapefea ona amataina se suʻesuʻega faale-Tusi Paia ma i latou e tatou te valaaulia i le Faamanatuga?
3 Suʻesuʻega Faale-Tusi Paia: Pe a e valaaulia ni tagata fiafia e auai i le Faamanatuga, aiseā e lē taumafai ai e amata se suʻesuʻega faale-Tusi Paia ma i latou i le tusi Aʻoaʻoga a le Tusi Paia? Ia taumafai e faamatala i le tagata aʻoga le Faamanatuga e ala i le suʻe o le tusi i le itulau e 206-208 ma talanoaina le ulutala “O le Talisuaga a le Alii, o se Aso Faamanatu e Viia ai le Atua.” E te ono talanoaina na manatu i se asiasiga se tasi pe lua. Pe a māeʻa ona talanoaina lenā mataupu, atonu e ono manaʻo le tagata e talanoaina le mataupu e 5, “O le Togiola o le Meaalofa Sili Lea a le Atua.” O le taimi lava e mautinoa ai o le a faaauau pea le suʻesuʻega faale-Tusi Paia, ona toe foʻi lea i tua e talanoaina mataupu muamua e fā o le tusi.
4. O ai e mafai ona tatou ofoina i ai se suʻesuʻega faale-Tusi Paia i le vaitau lenei o le Faamanatuga?
4 O ai e mafai ona tatou ofoina i ai se suʻesuʻega faale-Tusi Paia e faaaogā ai le auala e pei ona taʻua? E mafai ona ofo i nisi e tou te faigaluega faatasi, uō i le aʻoga, po o tuaoi e fiafia e fai lenā talanoaga. E ono faafesootaʻi e uso ia tane lē talitonu a tuafāfine i le faapotopotoga. Ae ia aua neʻi galo le ofoina o se suʻesuʻega i ou tauaiga e lē o ni Molimau. E lē gata i lea, e tatou te mananaʻo e fai ni taumafaiga faapitoa e valaaulia i le Faamanatuga i latou na iai se taimi na auaufaatasi ai ma le faapotopotoga. (Luka 15:3-7) Seʻi o tatou saʻilia i latou uma na, ina ia latou maua aogā o le togiola.
5. E faapefea ona tatou timaʻia tagata aʻoga o le Tusi Paia ma isi tagata fiafia e auai i sauniga faalevaiaso a le faapotopotoga?
5 Sauniga a le Faapotopotoga: O le Faamanatuga o le sauniga muamua lenā e mafai ona auai le toʻatele o tagata aʻoga o le Tusi Paia ma isi e faaalia le fiafia. E faapefea la ona tatou timaʻi iā i latou ina ia auai ma maua aogā i isi sauniga a le faapotopotoga? O La Tatou Faiva o le Malo, o Aperila 2005 i le itulau e 8 o loo iai fautuaga nei: “Ia taʻu i ai le matua o le lauga i le lautele o loo sosoo mai. Ia faaali i ai le mataupu o le a talanoaina i le Suʻesuʻega o le Olomatamata ma le Suʻesuʻega Tautusi a le Faapotopotoga. Faamatala le Aʻoga o le Faiva Faatiokarate ma le Sauniga o le Auaunaga. Pe afai e iai sou tofiga i le aʻoga, e te ono faataʻitaʻi i ai. Ia taʻu atu i ai manatu tāua na maua i le sauniga. Faaaogā ata o loo i a tatou lomiga e fesoasoani ai ia latou iloa mea o loo talanoaina. Ia valaaulia i latou ina ia auai i sauniga mai lava i le uluaʻi suʻesuʻega faale-Tusi Paia.”
6. O ā auala e lua e tatou te fesoasoani ai iā i latou e loto faamaoni ina ia maua aogā o le togiola?
6 Pe a faia e lē aunoa suʻesuʻega a i latou e loto faamaoni ma auai e lē aunoa i sauniga a le faapotopotoga, e masani lava ona vave lo latou agaʻigaʻi i luma faaleagaga. O lea la, seʻi o tatou faalaeiauina isi ina ia maua aogā mai sauniuniga faaleagaga, faapea ma le meaalofa silisili a le Atua—o le togiola.