Pe E te Fesili Atu mo Nisi Tagata e Talaʻi i Ai?

Pe afai o loo e faia se suʻesuʻega faale-Tusi Paia, aiseā e te lē fesiligia ai le tagata aʻoga pe e iai ni ana uō, tauaiga, po nisi e masani ai e fiafia e suʻesuʻe mea o loo aʻoaʻoina e le Tusi Paia? E mautinoa le tele o ni tagata o le a taʻu atu iā te oe. Pe afai e malie i ai lau tagata aʻoga, e mafai ona e taʻua lona igoa pe a e asiasi atu i tagata na, ma ofo i ai se suʻesuʻega faale-Tusi Paia. E te ono faapea atu, “O loo fiafia tele [Taʻu le igoa o lau tagata aʻoga] e suʻesuʻeina le Tusi Paia, ma ua ia manatu atonu e te manaʻo foʻi e maua aogā mai le polokalame o suʻesuʻega faale-Tusi Paia e aunoa ma se totogi.” Ona faataʻitaʻi puupuu lea o le auala e fai ai le suʻesuʻega, e faaaogā ai le tusi Aʻoaʻoga a le Tusi Paia.

Afai o loo iai se tagata aʻoga o loo lelei lona agaʻigaʻi i luma, ona timaʻi lea o ia e faamatala le fuafuaga o le suʻesuʻega i ana uō, ma tagata o lona aiga o ē atonu e fiafia e suʻesuʻe le Tusi Paia. E na te ono valaaulia i latou e auai i lana suʻesuʻega o loo fai. Ae a faapea e lē o talafeagai, e na te ono faatulaga e tou te feiloaʻi ma tagata na, ina ia faataʻitaʻi i ai le faiga o le suʻesuʻega. O le faia faapea, o le a faalototele ai le tagata aʻoga e amata ona tufa atu i isi le malamalamaga o le Tusi Paia.

O i latou o loo masani ona e asiasi i ai atonu e mafai foʻi ona latou taʻu atu iā te oe igoa o nisi tagata, e tusa lava pe latou te leʻi taliaina le faia o se suʻesuʻega faale-Tusi Paia e lē aunoa. Pe a e ofo atu iā i latou se kopi o le tusi Aʻoaʻoga a le Tusi Paia, e te ono fesili atu faapea, “Pe e te silafia se isi tagata e fiafia e maua se kopi o lenei tusi?”

I le vaai atu i le faanatinati tele o le taimi ua iai, e tatou te mananaʻo e faaaogā so o se auala e fesoasoani ai i tagata ina ia faalogo ma talia le tala lelei. Pe e te fesili atu mo nisi tagata e talaʻi i ai?