Ia Faaalia le Naunau Moni i Isi—E Ala i le Faamālō Atu i Ai
1 O le faamālō moni atu, e faalaeiauina ai isi, e uunaʻia ai e gaoioi, ma latou maua ai le olioli. Ua iloa e le toʻatele o le ʻautalaʻi faapea, o sina upu puupuu e avatu ai se faamālō moni, e masani ona fesoasoani e uaʻi mai ai le faalogo a tagata i la tatou faiva. E faapefea ona tatou faamālō atu i tagata, a o tatou tufa atu le tala lelei iā i latou?
2 Ia Mātauina Mea: Ina ua mavae le toe afio aʻe o Iesu Keriso i le lagi, sa ia mātauina mai galuega lelei sa faia e faapotopotoga e fitu i Asia Itiiti. (Faaa. 2:2, 3, 13, 19; 3:8) I se tulaga tutusa, o le naunau moni i tagata e tatou te feiloaʻi i la tatou faiva, o le a uunaʻia ai i tatou e tulimataʻi avanoa e avatu ai se faamālō iā i latou. O se faaaʻoaʻoga, o se aiga e lelei ona tausia tafatafāfale, o se matua o loo faaalia le alofa faapelepele i lana fanau, po o se ʻataʻata faaleuō ma se faatalofa mai a le tagata o le aiga, o mea uma nei e tatou te maua ai le avanoa e faamālō atu ai. Po o e mātauina ea na mea ma tausolomua e avatu se faamālō i na tulaga?
3 Ia Avea o Sē e Faalogologo Lelei: Pe a tatou talaʻi atu i isi, ia faalaeiau i latou e faaali mai o latou lagona e ala i le fai atu o ni fesili talafeagai. Faaali le faaaloalo iā i latou i le uaʻi lelei atu i mea o loo latou fai mai ai. (Roma 12:10) E te ono faalogo atu i se mea e latou te fai mai ai lea e mafai ona e faamālō moni atu ai lava, ona faavae ai lea i inā o la oulua talanoaga i se mea o loo oulua mafaufau tutusa i ai.
4 Faaaogā le Faautauta: O le ā e ao ona tatou fai pe a faamatala mai e le tagata o le aiga se mea e lē o ōgatasi ma upu moni o le Tusi Paia? Na i lo le tetee atu o se faamatalaga lē saʻo, ia faaali atu le loto faafetai i manatu o le tagata o le aiga, ma faaauau i le faapea atu, “Ou te iloa sa tele se taimi na e mafaufau ai i lenei mataupu.” (Kolo. 4:6) E tusa foʻi po o lenei tagata o se tagata e finau, ae e tatou te faamālō atu pea lava iā te ia mo lona naunau moni i le mataupu. O le faaalia o se uiga agamalu e ono faatoʻafilemu ai se tasi e foliga mai e matuā tetee lava i le tala lelei.—Faata. 25:15.
5 Ina ia avea i tatou o ni tagata e faalaeiau atu, e ao ona moni la tatou faamālō atu i tagata. O le faaaogā o faaupuga e ati aʻe ai, e faamamaluina ai Ieova ma tosina mai ai isi i le feʻau o le Malo.