Faaaliga—Ua Latalata Lona Tumutumuga Matagofie!
1 “Amuia lē faitau atoa ma ē faalogologo i upu o lenei valoaga ma tausi i mea ua tusia ai; auā ua latalata ona pō.” (Faaa. 1:3) O upu nei o loo faamatilatila ai le aogā o le tusi o Faaaliga i le Tusi Paia, aemaise lava ua tatou ola nei i le vaitaimi atofaina ua faataunuuina ai le tele o ona valoaga. O le mea lea, o le a amata ona tatou suʻesuʻeina le tusi Faaaliga—Ua Latalata Lona Tumutumuga Matagofie! i Suʻesuʻega Tautusi a le Faapotopotoga e amata i le vaiaso o Ianuari 8, 2007.
2 Talu mai le taimi mulimuli na tatou suʻesuʻeina ai le tusi Tumutumuga o le Faaaliga i Suʻesuʻega Tautusi a le Faapotopotoga, ua matuā anoanoaʻi suiga ua iai i le lalolagi. (1 Kori. 7:31) E lē gata i lea, o le toʻatele o i latou ua auai i le talaʻia o le tala lelei o le Malo, e latou te leʻi maua le avanoa e auai i le talanoaina o fuaiupu taʻitasi o le tusi o Faaaliga. O le a fesoasoani le suʻesuʻeina o le tusi Tumutumuga o le Faaaliga ina ia faaauau ai ona tatou mataala i mea o le a tutupu i le lumanaʻi.—Faaa. 16:15.
3 Ia fai ni au taumafaiga maumauaʻi ia e auai i vaiaso taʻitasi. E lē gata o le a fesoasoani lenei mataupu iā i tatou ina ia faaauau ona mataala, ae o le a fesoasoani feʻau a Iesu i faapotopotoga e fitu iā i tatou ina ia ʻalofia tulaga, ma mea e tutupu e ono aafia ai lo tatou tulaga faaleagaga ma le auai i le faiva.—Faaa. 1:11, 19.
4 Ia Sauniuni Lelei: A o lumanaʻi ai suʻesuʻega taʻitasi, ia faitau fuaiupu o le tusi o Faaaliga o le a talanoaina. Mātau manatu faale-Tusi Paia o loo faamatala ai fuaiupu o le Tusi Paia o loo talanoaina. Taumafai malosi ia malamalama i manatu autū ina ia pāʻia ai loto. (Nee. 8:8, 12) Faaalu se taimi e manatunatu loloto ai ma fesili ifo iā te oe lava ia: ‘O le ā ua taʻu mai e lenei mea iā te aʻu e faatatau iā Ieova ma le faataunuuina o lona finagalo? E faapefea ona ou gaoioi ia talafeagai ma lona finagalo ma fesoasoani i isi?’
5 Ua 92 nei tausaga talu ona amata “le aso o le Alii” mai le 1914. (Faaa. 1:10) Ua toe lava o se aga faataunuu mea e gatete ai le lalolagi o loo valoia mai e le tusi o Faaaliga. O le suʻesuʻeina o le tusi Tumutumuga o le Faaaliga o le a faafouina ai o tatou loto ma manatu, ma faamalosia ai lo tatou faatuatua e faapea, o “le taua i le aso tele o le Atua e ona le malosi uma lava” faapea ma le lalolagi fou, ua i faitotoʻa lava.—Faaa. 16:14; 21:4, 5.