Po o E Nofo Sauni mo Mala Faalenatura?
1. Aiseā e atamai ai le sauniuni mo se mala?
1 I tausaga taʻitasi, e faitau miliona tagata i le lalolagi, e aofia ai le toʻatele o o tatou uso ma tuafafine o loo aafia i mafuiʻe, sunami, timuga tetele, afā, asiosio, ma lologa. Talu ai o mala faalenatura e tutupu faafuaseʻi, ma e ono aafia ai so o se tasi lava o i tatou, o se gaoioiga atamai la le sauniuni—Faata. 21:5.
2. Aiseā e ao ai ona taʻu i toeaina numera o au telefoni ma le tuatusi saʻo o le mea e tu ai lou fale?
2 Le Mea e Ao Ona Fai a o Leʻi Tupu se Mala: O nisi taimi e mafai e i latou e gafa ma ia tulaga ona aumai se lapataʻiga i ni mala o faaloloʻi mai. E tāua tele le uaʻi atu i na lapataʻiga. (Faata. 22:3) I tulaga faapena, e taumafai toeaina e faafesootaʻi tagata uma o le faapotopotoga e fesoasoani i ai ia faia sauniuniga talafeagai. Pe a māeʻa se mala, e taumafai malosi foʻi toeaina e faafesootaʻi i latou uma i le faapotopotoga ina ia faamautinoa po o saogalemu ma vaai po o le ā se fesoasoani o manaʻomia. E ono tele se taimi e alu lē aogā pe afai e lē o i toeaina ni faamatalaga aupito i lata mai e faatatau i le mea e mafai ona maua i ai oe. E tāua tele la i tagata talaʻi ona taʻu i le failautusi ma le ovasia o le latou suʻesuʻega tautusi e faatatau i tuatusi o o latou fale ma numera o a latou telefoni.
3. E faapefea ona tatou galulue faatasi ma toeaina pe afai tatou te nonofo i se vaipanoa e aafia gofie i mala?
3 Pe a latalata se faapotopotoga i se nofoaga e aafia gofie i mala, e ono fesili toeaina i le ʻautalaʻi e avatu igoa ma numera o telefoni o se tauaiga po o se uō e lē nofo i lea vaipanoa ma e mafai ona faafesootaʻi pe a iai se feʻau faavavevave. E mafai ai e toeaina ona iloa po o ai ua tuua lea nofoaga. E ono mananaʻo foʻi toeaina e faia se fuafuaga mo le faapotopotoga pe a tulaʻi mai se faalavelave, ma e aofia ai se lisi o mea e tatau ona iai a le tagata lava ia, o le nofoaga e ō iai, ma fuafuaga e fesoasoani atu ai iā i latou e lē atoatoa le malosi. E tāua le felagolagomaʻi i ia faatulagaga alofa.—Epe. 13:17.
4. O le ā e ao ona tatou fai pe a tupu se mala i lo tatou vaipanoa?
4 Pe a Uma se Mala: O le ā lau mea e fai pe a tupu se mala i le vaipanoa o loo e nofo ai? Ia faamautinoa ua tausia manaʻoga o iai o lou aiga i le taimi lava lenā. Afai e te mafai, ia avatu le fesoasoani talafeagai i isi ua aafia. Taumafai malosi e faafesootaʻi le ovasia o le tou suʻesuʻega tautusi, po o se isi toeaina i le vave e mafai ai. E manaʻomia ona fai le gaoioiga lenei e tusa lava po o e saogalemu ma e te lē o manaʻomia se fesoasoani. Afai e te manaʻomia se fesoasoani, ia e iloa o loo fai taumafaiga uma a ou uso ina ia fesoasoani iā te oe. (1 Kori. 13:4, 7) Ia aua neʻi galo o loo silafia e Ieova lou tulaga; ia faalagolago iā Ieova na te faatumauina oe. (Sala. 37:39; 62:8) Ia tulimataʻi avanoa e saunia ai se fesoasoani faaleagaga ma faalogona mo isi. (2 Kori. 1:3, 4) Ia vave ona toe faaauau ona fai au gaoioiga masani faaleagaga.—Mata. 6:33.
5. O faapefea iā i tatou o ni Kerisiano ona aafia i le ono tulaʻi mai o ni mala?
5 A o nofo popole le lalolagi i le ono tulaʻi mai o ni mala, ae o loo tatou faamoemoe atu ma le mautinoa i le lumanaʻi. Ua toe o se aga ona lē toe iai lea o ni mala. (Faaa. 21:4) Peitaʻi i le taimi nei, e mafai ona tatou uia laasaga talafeagai e sauniuni ai mo taimi o faigatā ma puapuaga, a o tumau pea lo tatou maelega i le faalauiloaina atu o le tala lelei i isi.