Ia Aapa Atu i la Tatou Faiva
1 Na faatonuina e le aposetolo o Paulo Kerisiano ina ia savavali i ala o le Atua ma ia ‘faasilisili pea i ai i latou.’ (1 Tesa. 4:1) O le ā le uiga o lenei mea mo i tatou? O se tasi o uiga o le faaauau pea lea ona tatou saʻilia auala e aapa atu ai mo isi gaoioiga faaleagaga, ma ia faamalolosi e ‘matuā faaiʻuina la tatou faiva.’—2 Timo. 4:5.
2 Māfuaaga e Faia Ai: O le māfuaaga e tatou te aapa atu ai i la tatou faiva, ona tatou te faanaunau e auauna atoatoa i Lē na Faia i tatou. Tatou te mananaʻo e tutupu aʻe faaleagaga ma saʻilia auala e faaleleia ai la tatou faiva. O le iai o se faasologa lelei o mea e fai ma se uunaʻiga saʻo, o le a fesoasoani iā i tatou e ausia ai sini faaleagaga.—Sala. 1:1, 2; Fili. 4:6; Epe. 10:24, 25.
3 Ina ia faalautele atu la tatou faiva, e manaʻomia ona tatou atiaʻe le agaga faataulagaina e foaʻi atu. O le a mafai ona tatou atiaʻe lenei agaga pe a tatou tatalo faatauanau, ma manatunatu loloto i faaaʻoaʻoga lelei a Iesu. (Mata. 20:28) Na matuā faafiafiaina Iesu a o auauna atu mo isi i lana faiva. (Galu. 20:35) E mafai ona tatou faataʻitaʻi iā Iesu e ala i le faaalia o le naunau totino i tagata, ma ia nofo sauni mo avanoa e aapa atu ai i la tatou faiva.—Isa. 6:8.
4 Le Vaega a Mātua: O le faanaunauga e auauna mo isi ma faalautele atu la tatou faiva, e mafai ona totō i fanau a o laiti. O le a mātauina e tamaiti taumafaiga ma galuega filigā a tagata o le aiga i le faalauteleina o la latou faiva. Na uunaʻia se tasi uso e aapa atu a o laʻitiiti lava, a o galulue faatasi ma le tamā o lona tamā i galuega a le faapotopotoga. A o vaai atu i le maelega ma le fiafia o le tamā o lona tamā, na uunaʻia ai o ia e saʻili avanoa e auauna ai mo ona uso. Ua avea nei o ia ma auauna o le faiva.
5 Manaʻoga mo Uso: “Afai e naunau se tasi i le faiva . . . , e manaʻo o ia i le galuega lelei.” (1 Timo. 3:1) Ua faalaeiauina uso e nei upu e aapa atu, ina ia agavaa mo isi faaeaga i le faalapotopotoga a Ieova. E lē manaʻomia fua ni tomai faapitoa ina ia faia ai lenā mea. O se uso e aapa atu, e na te saʻilia muamua le Malo ma fai sona sao maelega i le faiva. (Mata. 6:33; 2 Timo. 4:5) O le a ia taumafai e avea ma faaaʻoaʻoga lelei mo isi.
6 Lalolagi Aoao: O loo faavaveina e Ieova le galuega o le aoaoina. (Isa. 60:22) O loo iai se manaʻoga faanatinati mo i latou uma o ē mulimuli i le faaaʻoaʻoga a Iesu, ina ia latou galulue atoatoa i la latou faiva. O le lipoti a le lalolagi aoao mo le tausaga faaleauaunaga e 2006, na faaalia ai e 248,327 ē na papatisoina. O se fua faatatau e tusa e sili atu i le 680 ē fou mai i aso taʻitasi! Tau ina ia tatou faaauau pea ona tatou mātaʻitū i auala e galulue atoatoa ai i la tatou faiva.