Tatou te Taʻu Atu i Isi le Faamoemoe o le Malo
1 I lenei vaitaimi o aso e gata ai, e toʻatele ua leai so latou faamoemoe. (Efe. 2:12) O isi ua latou tuu ma le lē atamai lo latou mautinoa i ʻoa faaletino, i taʻitaʻi o malo, i faasaienisi faaonapōnei ma isi mea. E tatou te fiafia i le iai o se faamoemoe moni mo le lumanaʻi, o le faamoemoe o le “taula o le agaga, e lē matosina ma ua mausalī”!—Epe. 6:19.
2 I le pulega a le Malo o le Atua, o le a toe faafoʻisia ai le laueleele i se parataiso. E toe faatutū ai ē e pele ua maliliu. (Galu. 24:15) O le a lē toe iai le mativa, faiga lē tonu, maʻi, tino matua ma le oti. (Sala. 9:18; Mata. 12:20, 21; Faaa. 21:3, 4) O nisi ia o folafolaga a Ieova ua lata ona faataunuuina. O le ā le vala o lo tatou faamoemoe e sili ona e naunau atu i ai?
3 Ia Taʻu Atu le Tala Lelei: E lē tatau ona tatou taofia le faamoemoe o le Malo iā i tatou lava. O le alofa i le Atua ma o tatou tuaoi e uunaʻia ai i tatou e faaaʻoaʻo iā Iesu e “folafola le tala lelei i ē matitiva, . . . e talaʻi le saʻolotoga i le tafeaga, ma ia pupula mata o ē tauaso, e tuu saʻoloto i ē ua faasauāina.” (Luka 4:18) Na talaʻi atu e Paulo le tala lelei i le maketi ma so o se mea e iai tagata. Na matuā tinoū o ia i le auaunaga. (Galu. 18:5) O lo tatou faataʻitaʻi i lona maelega i le auaunaga, e puipuia ai i tatou mai le “loto popole i mea a lenei lalolagi, ma le pepelo o le ʻoa” lea e faanenefu ai lo tatou faamoemoe.—Mare. 4:19.
4 E lē mou atu lo tatou faamoemoe i le Malo pe a feiloaʻi ma tagata e lē ano mai, o ē e manatu māmā i le feʻau o le Malo po o ē tetee mai. E tatou te ‘taofi mau i le faamoemoe ua tatou taʻutino atu ma le lē fefoʻifoʻiaʻi.’ (Epe. 10:23) E tatou te lē “mā i le tala lelei.” (Roma 1:16) Atonu o le a uunaʻia ai nisi e faalogo mai pe a tatou faaalia lo tatou mautinoa i le lumanaʻi ma le onosai.
5 E ui e tatou te faasino atu tulaga leaga ua iai le lalolagi lea e faataunuuina ai valoaga o le Tusi Paia, ae e lē o i tatou o ni ē e faamatilatilaina le faaumatiaga. Peitaʻi e taulaʻi atu la tatou galuega i le faamoemoe o le Malo—le tala lelei o le Malo o le Atua. Ia tatou talaʻi atu lenei tala lelei ma le maelega “ina ia mautinoa le faamoemoe e oo i le gataaga.”—Epe. 6:11.