Ia Fai Sou Sini e Maua se Suʻesuʻega Faale-Tusi Paia
1 “Inā tepa aʻe ia o outou mata, ma vaavaai i le fanua ua sinasina mai nei i le seleselegāsaito.” (Ioa. 4:35) Ua fetaui lelei fetalaiga a Iesu ma le tulaga o Kerisiano i aso nei.
2 O loo maua pea tagata e naunau moni, e fia aʻoaʻoina ala o Ieova. E manino lea tulaga i le aofaʻiga o soo fou o loo papatisoina i tausaga taʻitasi. Afai o e naunau moni lava e maua se suʻesuʻega faale-Tusi Paia, o le ā se mea e ao ona e fai?
3 Ia Fai Sou Sini: Muamua, ia faatū sou sini e amata ma faia pea se suʻesuʻega faale-Tusi Paia. Ia manatua lou sini pe a e auai i le galuega talaʻi. Ona o la tatou auaunaga faa-Kerisiano e aofia ai le talaʻi ma le aʻoaʻo atu, o lea e tatau ai iā i tatou uma ona saʻilia avanoa e maua ai se suʻesuʻega faale-Tusi Paia.—Mata. 24:14; 28:19, 20.
4 O Isi Vala e Ao Ona Manatua: E ao i tagata talaʻi o le Malo ona tatalo faatauanau, auā e tatou te maua i nisi o taimi tagata o loo tatalo mo se fesoasoani ina ia malamalama i le Tusi Paia. O se matuā faaeaga le faaaogā o i tatou e Ieova ina ia maua ma aʻoaʻo na tagata!—Ha. 2:7; Galu. 10:1, 2.
5 Na tatalo se tuafafine e fia maua sana suʻesuʻega faale-Tusi Paia, ona ia faaali lea o le sāvali Pe E te Manaʻo e Fia Iloa Atili e Faatatau i le Tusi Paia? i lana galuega. Sa mafai ona ia amataina se suʻesuʻega fale-Tusi Paia ina ua maua e se fafine le sāvali ma faitau i ai, ma faatumu le kuponi o loo i le pito i tua.
6 E mafai foʻi ona fesoasoani atu uso ma tuafafine ua taulau i le amataina ma le faia o suʻesuʻega, ina ia ausia lou sini o le faia o se suʻesuʻega faale-Tusi Paia. Ia tatalo i le Atua mo au taumafaiga e maua sau suʻesuʻega, ma faaaogā lelei fesoasoani mai isi ina ia taulau ai lou sini. Atonu o le a e olioli ai i le faia o se suʻesuʻega faale-Tusi Paia i se taimi lata mai.