Le Tusi Mai le Ofisa

Mo le ʻAutalaʻi Pele:

Iā Novema o le tausaga ua mavae i la tatou Tauaofiaga Itumalo lea na faamatuaina “Ia Mulimuli iā Keriso,” sa tatou olioli ai i le mauaina O le Tusi Paia o le Lalolagi Fou o Tusitusiga Eleni. E tatou te manatua le Uso o Geoffrey Jackson mai le Vaega Pule lea sa ia faamanatu mai iā i tatou o ē “matuā naunau i le Afioga a le Atua, e talitonu ʻo Tusitusiga Paia uma e mai le agaga o le Atua.’ (2 Timo. 3:16) Peitaʻi, ina ia malamalama ma faatatauina e i latou o le a faitau i lenā tusi mai le Atua, e tatau ona maua i le gagana ua masani ai na tagata.”

Ua faaalia mai le loto talisapaia o sui o faapotopotoga ma tagata i tua e faatatau i le faigofie o le Tusi Paia o le Lalolagi Fou. Sa vili mai se fafine i le ofisa ma talosagaina nisi kopi o le Tusi Paia. Aiseā? Sa ia faamalamalama mai, e faaaogā e nisi o la matou lotu lenei faaliliuga ma e faigofie ona malamalama uma ai, e tusa lava pe laʻitiiti pe matua. Seʻi o tatou faaauau ona faaaogā lelei lenei meafaigaluega i le auaunaga ina ia pāʻia ai loto o i latou e pei ni mamoe.

Sa faamatilatila mai e le polokalame o la tatou fonotaga ma le tauaofiaga itumalo talu ai nei faamanuiaga o le auaunaga paeonia. E matuā faalaeiauina i tatou i le vaai atu i le toʻatele o talavou o loo taumafai e avea le auaunaga paeonia ma a latou galuega. O le mea lea, e mafai ona e faapea mai e pei o le aposetolo o Paulo: “E telē le avanoa ua tuuina mai iā te aʻu e fai ai le galuega.” (1 Kori. 16:9) E mautinoa lava, o lou faaaogā lelei o lenei avanoa o le a tele ni faamanuiaga o le a e mauaina. (Faata. 10:22) E matou te faalaeiauina talavou ia avea le auaunaga paeonia ma au galuega.

O se faaeaga iā i matou i le ofisa le mātaulia faatasi ma outou o se ʻaufaigaluega olioli a le Atua.—1 Kori. 3:9.

O outou uso,

Ofisa i Samoa

This article is unique to Samoa.