O le a Faapefea Ona Latou Faalogo?

1. Aiseā e lē faigofie ai i nisi taimi le galuega talaʻi, ae aiseā e faaauau ai pea ona tatou talaʻi?

¹ Ona ua matuā lata tele mai le aso o Ieova, o loo iai se manaʻoga faanatinati e fesoasoani atu i le anoano o tagata ina ia maua le poto saʻo e uiga i le Atua ma lana fuafuaga mo le fanau a tagata. (Ioa. 17:3; 2 Pete. 3:9, 10) E lē faigofie i taimi uma ona fai lenei mea, ona o le tele o tagata e lē ano mai, ia po o le tauemu mai foʻi ona o le galuega talaʻi. (2 Pete. 3:3, 4) Ae ui lava i lea, ua iā i tatou māfuaaga uma e talitonu ai o loo iai pea tagata i a tatou oganuu, o ē o le a faalogo ma talia le tala lelei. O le a faapefea ona faalogo na tagata pe a leai se tasi e talaʻi i ai?—Roma 10:14, 15.

2. E faapefea ona faalaeiauina i tatou i le faaaʻoaʻoga a le aposetolo o Paulo?

² Fesagaʻia o Teteega: Ina ia faalogo i latou e naunau i le feʻau o le Malo o le Atua, e lē tatau lava ona tatou faamaamulu. O Filipi o le aai muamua lea i Europa na faalogo i le aposetolo o Paulo a o talaʻi atu le tala lelei. Ina ua fai ni moliaga sesē e faasaga iā i laʻua ma Sila, sa sasaina i laʻua ma lafo i le falepuipui. (Galu. 16:16-24) Ae ui i lea, e leʻi avea na mafatiaga ma mea na faavaivai pe solomuli ai Paulo ona o le fefe. Ina ua ia asiasi atu i Tesalonia le aai e sosoo ai i lana malaga faamisionare, sa ia faaalia le ‘lototele ona o le Atua.’ (1 Tesa. 2:2) Po ua lē faataʻitaʻia mai ea i le faaaʻoaʻoga a Paulo le māfuaaga tatou te lē ‘fiu ai’?—Kala. 6:9.

3. O ā māfuaaga e suia ai uiga o isi o ē sa lē fiafia mai muamua?

³ O le toʻatele sa mumusu e faalogo mo le tele o tausaga, ua suia o latou uiga faaalia i la tatou feʻau. O suiga i le tulaga tau tamaoaiga, o le aafia i maʻi, o le maliu o se tasi o le aiga, o tala i mea tutupu e faanoanoa ai i le lalolagi e mafai ona māfua ai na suiga. (1 Kori. 7:31) O nisi sa tetee o latou mātua, ae o lea ua matutua lava i latou ma ua naunau e faalogo mai. O le faaauau pea ona tatou talaʻi e maua ai e na tagata le avanoa e “valaau [ai] i le suafa o Ieova” a o leʻi tuai.—Roma 10:13.

4. O le ā e uunaʻia i tatou e faaauau pea e “lē aunoa” i le faiva?

⁴ Ia “Lē Aunoa”: O lo tatou alofa i le Atua ma tuaoi e uunaʻia ai i tatou e faaauau pea e “lē aunoa” i le galuega talaʻi ma le faia o soo, e pei lava ona sa faia e le ʻauaposetolo i le uluaʻi senituri. (Galu. 5:42) E toʻatele tagata i aso nei o loo “mapuitigā, ma feoi ona o mea inosia uma” o loo tutupu i le taimi nei. (Eseki. 9:4) Maʻeu se mapusaga ma se faamoemoe mo nei tagata pe a latou faalogo i le tala lelei! E tusa lava pe lē faalogo le tele o tagata, ae ua iā i tatou faamaoniga mai le Tusi Paia, o loo matuā faafiafiaina le finagalo o Ieova i a tatou taumafaiga.—Epe. 13:15, 16.