Pe Mafai Ona Faalautele Atu Lau Auaunaga?

1. O le ā le manaʻoga faanatinati ua tulaʻi mai i le faiva i le fanua, ma aiseā?

¹ I le mātauina o se aofaʻiga tele o tagata ua faaalia le fiafia i le tala lelei o le Malo, na faatonu ai e Iesu ona soo ina ia “ʻaiʻoi atu . . . i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) Talu ai ua tatou iai nei i itula mulimuli o le vaitau o le seleselega, ua atili ai ona matuā faanatinati la tatou galuega i le taimi nei. O lona uiga, e ao ona tatou iloilo ma tatalo i ni auala e faateleina ai so tatou sao i le faiva i le fanua.—Ioa. 14:13, 14.

2. Ua faapefea ona tali mai nisi i le valaau, mo nisi e galulue i le fanua?

² Auala e Faalautele ai le Auaunaga: Ona o le taʻitaʻiga a Ieova ma lana fesoasoani, e toʻatele ua mafai ona amata i le auaunaga paeonia. (Sala. 26:2, 3; Fili. 4:6) O nisi ua faia se taumafaiga faapitoa ina ia auauna o se paeonia lagolago i se masina se tasi pe lua i le tausaga. O lenei tulaga, ua avea o se auala lelei e faalautele ai la latou faiva. Ona o le fiafia ua maua mai le avea ma paeonia lagolago, ua faapogaia ai le toʻatele o i latou e mafaufau i le avea ma paeonia sauatoa.—Galu. 20:35.

3. Afai sa e paeonia muamua, o le ā e te ono manaʻo e iloilo i le taimi nei?

³ Pe Mafai Ona E Toe Faaauau i le Auaunaga Paeonia?: Afai sa e auauna muamua o se paeonia, e lē taumatea o e manatua pea na taimi faagalogatā. Po o e tatalo ma manatunatu pe mafai ona e toe auauna o se paeonia? Atonu o le māfuaaga lea na e lē toe paeonia ai ua lē o toe iai i le taimi nei. Atonu o le taimi lenei mo oe ina ia e toe olioli ai i lena faaeaga o le avea ma paeonia—1 Ioa. 5:14, 15.

4. O le ā le avanoa tutasi lea ua tatala mai iā i tatou uma?

⁴ O loo faagasolo le galuega o le seleselega i le taimi nei ma ua lē o toe umi ae māeʻa loa. (Ioa. 4:35, 36) Tau ina ia tatou taʻitoʻatasi ma iloilo lo tatou tulaga o iai i le taimi nei, pe faamata e mafai ona fetuunaʻi a tatou mea fai i aso taʻitasi ina ia tele ai lo tatou taimi e auai i le fanua. A faapea foʻi e lē mafai moni lava ona toe faalautele atu la tatou auaunaga, pe mafai ona tatou vaai i ni auala e faaleleia atili ai la tatou faiva? (Mare. 12:41-44) Maʻeu se faaeaga ua tuu mai mo i latou uma lava o ē e mafai i o latou tulaga o iai nei, ona maua le avanoa e faaaogā ai e Ieova i lenei taumafaiga faapitoa!—Sala. 110:3.