Vivii iā Ieova i Aso Uma Lava
1. O le ā ua uunaʻia auauna a le Atua e fai, ma aiseā?
1 Sa saʻafi le tupu o Tavita ma faaalia lona faanaunauga e vivii iā Ieova i “aso uma lava,” e oo lava i le faavavau. (Sala. 145:2, 7, 21) Ua iā i tatou foʻi māfuaaga lelei e vivii ai iā Ieova i aso taʻitasi.—Sala. 37:10; 145:14, 18; 2 Pete. 3:13.
2. O ā auala e ono vivii ai iā Ieova aiga i aso taʻitasi?
2 Ia Vivii iā Ieova i o Tatou Aiga: O loo iai a tatou lomiga e atiaʻe ai lea e fesoasoani mai i le faia o a tatou talanoaga uigā e uiga iā Ieova ma le Tusi Paia, pe a iloiloina le mau o le aso, pe a tatou olioli i le Tapuaʻiga a le Aiga, ma pe a sauniuni foʻi mo sauniga a le faapotopotoga. E toʻatele aiga ua taumafai malosi ina ia iai uma i le taimi o se taumafataga, a itiiti mai pe tasi i le aso. O le aai faatasi e lē gata e lē faananatia, e toʻafimālie talanoaga, ma maua ai avanoa e viia ai Ieova. O talanoaga faasamasamanoa a le aiga e faamaʻite e mātua, e matuā tāua tele e fesoasoani i le tausia aʻe o a latou fanau “i aʻoaʻiga ma apoapoaʻiga a Ieova.”—Efe. 6:4; Teu. 6:5-7.
3. O ā avanoa e viia ai Ieova pe a tatou faatasi ma o tatou uso?
3 Ia Vivii iā Ieova Faatasi ma o Tatou Uso: Pe a auai i le auaunaga i le fanua pe i sauniga a le faapotopotoga, e tatou te maua ai avanoa sili ona lelei e vivii ai iā Ieova faatasi ma a tatou aumea talitonu. (Faata. 15:30; Fili. 4:8; Epe. 13:15) Talu ai e tatou te alolofa uma lava iā Ieova, e tatau la ona faigofie ona faaaofia ai faaupuga o lo tatou talisapaia o Ieova i a tatou talanoaga ma uso.—Sala. 106:1.
4. E ese mai i le faiva i le lautele, o ā isi avanoa e mafai ona tatou vivii ai iā Ieova?
4 Ia Vivii iā Ieova pe a Talanoa i Tagata Lē Talitonu: Ona o le tulaga o mea o iai, e ono lē mafai ona tatou auai i le faiva i le lautele i aso uma, ae o le tau lava ina talanoa puupuu i se tasi lua te faigaluega faatasi, se tasi e aʻoʻoga faatasi, ma tagata tatou te faatasitasi e uiga iā Ieova ma ana fuafuaga, e mafai lava ona avatu ai le faamoemoe i tagata loto faamaoni. (Sala. 27:14; 1 Pete. 3:15) A o malaga se tuafafine i se vaalele, sa mafai ona ia molimau i se fafine na la malaga faatasi, ma na lagona e lenei tagata le matuā faamāfanafanaina ma faalaeiauina i mea na ia faalogo i ai, o lea na ia tuuina ai lona tuatusi ma le numera o le telefoni i le tuafafine ina ia mafai ai ona la fesootaʻi pea. A o mafatia le lalolagi i le faateteleina o faafitauli ma agaʻi ina leaga tele le tulaga o mea, ae o loo faaauau pea ona avatu e tagata o Ieova le “tala lelei” iā i latou o loo naunau e fia faalogo mai. O le faia faapea ua maua ai e isi le faamoemoe ma faapogaia ai i latou e vivii iā Ieova.—Isa. 52:7; Ro 15:11.
5. Aiseā e tatou te faanaunau ai e vivii iā Ieova, ma o le ā e ono iʻu i ai?
5 E mautinoa lava le faafiafiaina ai o Ieova i le faafofoga mai o vivii atu ana auauna iā te ia i aso uma! E faapei ona faia e lana foafoaga vaaia lea o loo siʻomia ai i tatou, e mafai foʻi ona tatou tautatala atu i ona viiga i aso uma i o tatou aiga, i le faapotopotoga, ia po o taimi foʻi e talanoa ai iā i latou e leʻi avea ma ē e vivii iā Ieova.—Sala. 19:1-4.