Ia Tomai e Faaaogā le Tusi Paia
1. Aiseā e aogā tele ai le Tusi Paia?
1 O le tomai e faaaogā le Afioga faagaeeina a le Atua, e mafai ai ona tatou faalauiloa atu ma aʻoaʻo manino atu le upu moni, ma faaalialia ai aʻoaʻoga sesē ma uputuu a tagata.—2 Timo. 2:15; 1 Pete. 3:15.
2. O le ā e fesoasoani iā i tatou ia faigofie ma vave ona maua mau e faaaogā?
2 Ia E Iloa Lelei: Pe a faaaogā so o se meafaigaluega lava, e maua le tomai pe afai ua e iloa lelei le meafaigaluega. O le faitauina o le Tusi Paia mai le amataga e oo i le faaiʻuga, o le a e iloa ai le ata atoa o le matua o le Tusi Paia. E fesoasoani foʻi iā te oe ia manatua ai mau ma faigofie ai ona suʻe. A o faateleina la lou iloa o le Tusi Paia, o le a e tautala atu ma le aasa ma le mautinoa pe a e molimau atu lē fuafuaina i isi, pe auai foʻi i le faiva i le fanua.—1 Tesa. 1:5.
3, 4. (a) O ā nisi o auala e faateleina ai lou iloa lelei o le Tusi Paia? (e) Po ua e faaaogā isi auala ina ia atili iloa lelei ai le Tusi Paia?
3 Ia fai ma au masani le tatala o lau Tusi Paia, ma mulimuli ai i taimi o sauniga a le faapotopotoga. Pe a fai au lava suʻesuʻega ma sauniuniga mo sauniga a le faapotopotoga, faitau mau o loo faasino mai ma mānatunatu loloto i auala e faatatau ai. E toʻatele e manatu o le faitau saʻo o le mau mai i le Tusi Paia nai lo le faitau mai le komepiuta, po o le lolomi foʻi i ni pepa, o le a faigofie ai ona suʻe lea mau i se taimi mulimuli ane, pe a manaʻomia i le taimi o le talaʻiga.—Ioa. 14:26.
4 O nisi aiga ua faatulaga se taimi e taumafai ai ia tauloto mau o le Tusi Paia. E mafai ona fai lenei faiga e ala i le faaaogā o ni fasi pepa malō ona tusi ai lea o le mau i le isi itū ae tusi upu o le mau i le isi itū. Ona auauaʻi lea ona faaaogā fasi pepa ia e siaki ai pe latou te manatua upu o le mau, pe taʻu mai foʻi le mau o le Tusi Paia o loo maua ai le faaupuga. O le faaaogā o le Tusi Paia e faataʻitaʻi ai se taulimaga i le fanua, ma le auala e tali atu ai i se tulaga e tetee mai, ia po o se fesili foʻi, e faateleina ai lou tomai.
5. Aiseā tatou te mananaʻo ai ia faateleina lo tatou tomai i le faaaogāina o le Tusi Paia?
5 E leai se isi tusi e faatusatusaina lona aogā i le Tusi Paia. Na o le Tusi Paia lava o loo maua ai tusitusiga e mafai ai ona maua e tagata le ‘poto mo le faaolataga.’ (2 Timo. 3:15) Talu ai o le toʻatele o tagata i la tatou oganuu e lē masani i ʻoa tautele o loo maua i le Tusi Paia, ua iā i tatou la māfuaaga e ao ai ona faaleleia lo tatou tomai, ma faailoa atu iā i latou mea moni o loo ofo mai e le Tusi Paia.—Faata. 2:1-5.