O Afea e Toe Foʻi ai e Asi Tagata Fiafia?

1. O ā mea e aofia ai i le faia o soo?

¹ E aofia ai i le faia o soo le toe foʻi e asi so o se tagata lava na faaali mai le naunau e fia iloa faatulagaga a le Malo o Ieova. (Mata. 28:19, 20) O le taimi sili ona lelei e fai ai toe asiga e faalagolago i a tatou faasologa, ia faapena foʻi le tagata fiafia. Aiseā e ao ai ona tatou vave toe foʻi e asi le tagata?

2, 3. Aiseā e ao ai ona tatou taumafai e vave ona toe foʻi?

² Aiseā e Ao ai Ona Vave Ona Toe Foʻi? O le galuega o le talaʻia o “lenei tala lelei o le malo” ua toe o se aga ona uma loa lea, ma ua lata mai foʻi le iʻuga o lenei faiga o mea. (Mata. 24:14; 1 Pete. 4:7) O le mea lea, a o iai pea le avanoa o “le aso o le faaolataga” mo ē fiafia, e ao lava ona tatou utagia le timaʻiga ina ia ‘⁠talaʻi le upu ma le maelega,’ lea e aofia ai le toe foʻi atu i le vave e mafai ai e atiaʻe le fiafia sa faaalia.—2 Kori. 6:1, 2; 2 Timo. 4:2.

³ O loo naunau Satani e faaleagaina so o se fatu o le Malo tatou te totōina i le loto o se tagata fiafia. (Mare. 4:14, 15) E masani ona tauemu tagata o le aiga, tagata e faigaluega faatasi, ma isi i ē e faaalia le fiafia. O le vave ona toe foʻi atu o le a faigofie ai ona sosoo la tatou talanoaga lea na fai muamua, a o leʻi mafai ona tapē e isi le fiafia e pei ona faaalia.

4. I le ulua’i asiasiga, e faapefea ona tatou faataatia se faavae mo se toe asiga?

⁴ Fai se Fuafuaga: E sili ona lelei le fai o se fuafuaga maʻoti i le taimi e te toe foʻi atu ai a o leʻi tuua le fale. Ia faatū se fesili e te taliina i lau asiasiga e sosoo ai. E tāua ai tele ona iai ni au faamaumauga tusitusia o mea na talanoaina i lau uluaʻi asiasiga ma le taimi e te toe foʻi atu ai e asi. Afai e fetaui ma oe, e mafai ona e fai i ai e te toe foʻi atu i le aso e sosoo ai ia po o se isi avanoa vave . Afai o le faaiʻuga o le vaiaso lea na e asiasi atu ai ma e faigaluega le tagata i le vaiaso, atonu na te lotomalie e te toe foʻi atu i le faaiʻuga o le vaiaso e sosoo ai. Pe a fai sau fuafuaga e te toe foʻi atu, ia mautinoa e te tausisi i au upu.—Mata. 5:37.

5. E faapefea i lo tatou toe foʻi atu e aunoa ma se faatuai ona fesoasoani iā i tatou e faataunuu le poloaʻiga a Iesu, ia fai isi ma soo?

⁵ E iai mafuaaga lelei e vave ai ona tatou toe foʻi i tagata fiafia. Ia fai se fuafuaga ma ia vave ona toe foʻi atu, auā “ua itiiti le taimi o totoe.” (1 Kori. 7:29) O le vave ona tatou toe foʻi atu e asi ē na fiafia i le feʻau o le Malo, o le ono taulau foʻi lea o a tatou taumafaiga.