“Ia Maelega i la le Agaga”
1. O ā uiga faaalia e ao ona mātauina ai la tatou talaʻiga?
1 E leai se vala o la tatou auaunaga faa-Kerisiano e alualu ona mālōlō lea. Nai lo lea, o loo faalaeiauina i tatou “ia maelega i la le agaga” ma “ia outou pologa mo Ieova.” (Roma 12:11) Peitaʻi, e anoanoaʻi mea e māfua ai ona fāiifo lo tatou maelega mo le faiva. E faapefea ona “faamumū e pei o se afi” lo tatou maelega ma le aasa mo la tatou auaunaga o le Malo?—2 Timo. 1:6, 7.
2. O le ā le fesootaʻiga i le suʻesuʻega a le tagata lava ia ma le maelega i le faiva?
2 Suʻesuʻega a le Tagata Lava ia o le Tusi Paia: O se tagata talaʻi e uigā lona talaʻia o le Malo, e naunau i le tulafono a le Atua ma e matuā pāʻia lona loto i upu moni o loo maua ai. (Sala. 119:97) Pe a tatou aʻoaʻoina ni mea moni i a tatou lava suʻesuʻega, e faagaeetia ai o tatou loto ma faamalosia ai lo tatou maelega. O le alofa i Lē na saunia mai nei upu moni ma lo tatou faanaunauga e taʻu atu le tala lelei i isi, e uunaʻia ai i tatou e vivii i le Atua ma faalauiloa atu lona suafa. (Epe. 13:15) E mautinoa lava la, o lo tatou pulunaunau e talaʻia le tala lelei e faaalia ai lo tatou talisapaia loloto o lona aogā.
3. E faapefea ona taaʻina e le agaga o le Atua la tatou faiva?
3 Tatalo mo le Agaga o le Atua: O se faiva e uigā e lē mafai ona faataunuu i lo tatou lava malosi. O le maelega moni e maua mai le agaga o le Atua. (1 Pete. 4:11) O le faalatalata atu i le Puna o le “malosi,” o le a tatou maua ai le malosi faaleagaga e molimau atu ai ma le loto tele. (Isa. 40:26, 29-31) Ina ua fesagaʻi le aposetolo o Paulo ma faigatā i lana faiva, sa ia “maua le fesoasoani mai le Atua.” (Galu. 26:21, 22) O le malosi e toe faaolaola ai mai le agaga o Ieova e mafai ona fesoasoani iā i tatou ia maelega i la tatou faiva, o lea e ao ai la ona tatou tatalo mo le agaga.—Luka 11:9-13.
4. O ā iʻuga lelei e mafai ona faapogaia e le maelega, peitaʻi o le ā le faaeteetega e ao ona iai?
4 O le maelega aasa mo le talaʻiga o le Malo e tele ina faapogaia ai le maelega i aumea Kerisiano. (2 Kori. 9:2) I le oganuu, e tele ina faigofie ona tali mai tagata i se feʻau e taʻuina atu i se uiga aasa ma maumauaʻi. Peitaʻi, o le maelega, e ao lava ona ō faatasi ma le faautauta ma le agamalu. (Tito 3:2) E ao ona tatou taumafai e faamamalu i le tagata o le aiga ma faaaloalo i lona saʻolotoga e filifili ai i le mea e ao ona fai.
5. O ā timaʻiga faagaeeina e ao ona tatou taumafai e faatatauina?
5 Talu ai o loo tatou faalauiloaina atu le Malo, o lea seʻi faaauau ona tatou “maelega i la le agaga.” Ia tatou atiaʻe tomai e ala i le suʻesuʻeina o le Tusi Paia ma tatalo faatauanau atu iā Ieova, o lē e na te aumaia iā i tatou le agaga paia mamana. O le faia faapea, o le a tatou maelega ai pea i la tatou faiva “ma le agaga paia, atoa ma le matuā mautinoa lava.”—1 Tesa. 1:5.