Pusa Fesili

◼ Pe e tatau i Molimau a Ieova ona tufa atu i isi ni kopi tusitusia pe ua puʻeina foʻi o ni lauga?

E faalaeiauina ma faamalosia i tatou i lauga faale-Tusi Paia. (Galu. 15:32) O se tulaga masani la le manaʻo ia faaoo atu nei faamatalaga e faalaeiauina ai i isi e lē o auai i lea sauniga. Pe a manatu i le tele o faiga faaonapō nei e mafai ona faia ai lea tulaga, e faigofie tele ona puʻe se lauga ma tufa atu i isi. O nisi o loo latou teuina se aofaʻiga o ni lauga na puʻe, e aofia ai ni lauga sa faia i le tele o tausaga ua mavae, ma ona o ni māfuaaga lelei ua latou avatu ai i isi po o le toe faia foʻi o ni kopi ma avatu i a latou uō. O isi ua fai a latou tuatusi i le initaneti ona tuu lea i ai o lauga ina ia mafai e so o se tasi ona kopi pe download.

O le tulaga talafeagai lava ia, e lē afāina pe a tatou puʻeina ni lauga tatou te faalogologo ai pe mo o tatou aiga foʻi. E lē gata i lea, e ono faatulaga e toeaina e puʻe ni lauga mo sui o le faapotopotoga o loo faataʻotolia i ni maʻi ma ua lē mafai ai ona auai i sauniga. Peitaʻi, e iai māfuaaga lelei e lē tatau ai ona tufa atu i isi lauga tusitusia pe ua puʻe foʻi.

Talu ai o lauga e tele lava ina fai atu e fuafua i manaʻoga o le faapotopotoga, e faigofie lava la ona tatou faauigasesēina ni manatu i se lauga puʻe e tufa mai tatou te faalogologo ai, auā tatou te lē o malamalama i le māfuaaga na ala ai ona saunia lenei lauga. E lē gata i lea, e faigatā iā i tatou i nisi taimi ona iloa po o ai le failauga ma o anafea na fai ai, ina ia tatou faamautinoa ai e saʻo faamatalaga o loo taʻua ma o loo tutusa ma le malamalamaga saʻo o le upu moni ua iai. (Luka 1:1-4) E lē gata i lea, o le tufa atu i isi o kopi tusitusia pe puʻeina foʻi se lauga e ono faaosoosoina ai se tasi e avatu po o le talia foʻi o se viiga sa lē tatau ona fai.—1 Kori. 3:5-7.

O loo galue mamafa le pologa faamaoni ma le faautauta e saunia mai taumafa faaleagaga e “talafeagai” ma i “le taimi tatau.” (Luka 12:42) E aofia ai le faatulagaga o lauga e fai i faapotopotoga a Molimau a Ieova atoa ai ma CD, DVD ma isi mea faapena ua uma ona puʻe o loo mafai ona download i le tuatusi aloaʻia i le initaneti o le jw.org. E tatou te mautinoa o le a saunia mai e le pologa faamaoni ma le faautauta ma lana Vaega Pule mea tatou te manaʻomia ina ia faamalosia lo tatou faatuatua.—Galu. 16:4, 5.