Ua Matua le Faatoʻaga mo le Seleselega
1. O le ā le galuega tāua o loo faagasolo i le taimi nei?
1 Ina ua uma ona molimau atu i se fafine Samaria, ona taʻu atu lea e Iesu i ona soo: “Inā tetepa aʻe ia outou ma vāai atu i le faatoʻaga, ua matua mo le seleselega.” (Ioa. 4:35, 36) Na amata mai ai i le taimi lea se seleselega faaleagaga, ma na silafia mamao mai e Iesu o le a aofia ai le lalolagi atoa i lea galuega. O loo faaauau pea ona aafia tuusaʻo ai Iesu i le seleselega, mai i le lagi i le mea o afio ai. (Mata. 28:19, 20) O ā ni faamaoniga e iloa ai o le a faaauau pea ona faateleina i se tulaga saoasaoa lenei galuega a o agaʻi atu i lona tumutumuga?
2. O ā taualumaga e faaalia ai ua matuā faateleina i se tulaga saosaoa le galuega o le seleselega i le lalolagi aoao?
2 Seleselega i le Lalolagi Aoao: A o faagasolo le tausaga faaleauaunaga e 2009, sa iai se faatelega e 3.2 pasene i le ʻautalaʻi i le lalolagi aoao. I atunuu o loo taofiofia ai le galuega na tulaʻi mai ai se faatelega e 14 pasene. Na oso i luga le aofaʻi o suʻesuʻega faale-Tusi Paia sa lipotia mai i masina taʻitasi ua sili atu i le 7,619,000—o se aofaʻiga ua sili atu i le tumutumuga o le ʻautalaʻi ma e toetoe lava ʻafa miliona e sili atu ai i le aofaʻiga o suʻesuʻega na lipotia mai i le tausaga muamua atu. A o saoasaoa le faateleina o le galuega i le tele o vaipanoa, ua tulaʻi mai ai le tele o talosaga mo ni misionare na toleni mai i Kiliata. O oganuu e ese gagana e tautatala ai o loo maua mai ai se aofaʻiga tele o ē ua gauaʻi mai, mai le tele o atunuu. E manino mai o loo faatelevaveina e Ieova le galuega i le faaiʻuiʻuga o le seleselega. (Isa. 60:22) Po o iā te oe se vaaiga saʻo i le “fanua” i la outou oganuu?
3. O le ā le manatu e ono iai i nisi e faatatau i le seleselega i o latou vaipanoa?
3 Le Seleselega i Lou Lava Vaipanoa: E ono faapea mai nisi, “e lē o matuā fua mai laʻu oganuu.” E moni o nisi oganuu e foliga mai e lē o matuā fua tele mai e pei o isi oganuu, ia po ua lē o toe tutusa foʻi ma taimi ua teʻa. O tulaga faapea, e ono manatu ai nisi Molimau ua leai ni tagata e toe tali mai i ia vaipanoa, o lona uiga ua faaitiitia a latou galuega i le tau lava ina aoao mai nai toega o loo totoe o le seleselega. Po o le tulaga moni lava lenā o i ai?
4. O le ā le vaaiga saʻo e faatatau i la tatou faiva e ao ona tatou atiaʻe, ma aiseā?
4 Mai le amataga seʻia oo i le faaiʻuga o se seleselega, o se taimi o gaoioiga faanatinati. Mātau le uiga faanatinati o loo i fetalaiga nei a Iesu: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) O Ieova, o le Alii lea o le seleselega, e pule po o afea ma po o gafea o le a tali mai ai nisi. (Ioa. 6:44; 1 Kori. 3:6-8) O le ā la lo tatou tofiga? Ua tali mai le Tusi Paia: “Ia e lūlū fatu i le taeao ma aua neʻi mālōlō lou lima seʻia oo i le afiafi.” (Fai. 11:4-6) Ioe, e oo loa le seleselega i lona tumutumuga, e lē o se taimi lea e mālōlō ai!
5. Aiseā e ao ai ona faaauau pea ona tatou talaʻi ma le maelega i oganuu e foliga e lē fua mai?
5 Faaauau Pea i le Seleselega: E tusa lava po ua galueaʻiina soo la tatou oganuu ma e foliga e leai nisi e tali mai, o loo iai se māfuaaga e galue ai pea ma le maelega ma se uiga faanatinati. (2 Timo. 4:2) O suiga mataʻina i mea tutupu i le lalolagi o loo faapogaia ai tagata e suia o latou uiga ma manatunatu loloto ai i lo latou lumanaʻi. A o faasolo foʻi ina matutua tagata talavou, latou te ono lagona le manaʻomia o le saogalemu ma le toʻafimālie. E ono faagaeetia foʻi nisi ona o lo tatou maumauaʻi e ō atu pea lava pea. Ioe, o i latou e leʻi faalogo i le taimi muamua e ono faalogo mai i se isi taimi i le lumanaʻi. E oo lava iā i latou e teena ma le loto i ai la tatou feʻau e ao ona lapataʻia.—Eseki. 2:4, 5; 3:19.
6. Afai e lē faigofie ona galueaʻiina a tatou oganuu, o le ā e fesoasoani iā i tatou ia tumau ai pea le maelega?
6 Afai e lē faigofie ona galueaʻiina a tatou oganuu, o le ā e fesoasoani iā i tatou ia tumau pea le maelega? O se tasi o mea e fai e faaopoopo atu i la tatou talaʻiga mai lea fale i lea fale, o le faatino lea o isi vala o le talaʻiga, e pei o le molimau atu i pisinisi pe e ala i le telefoni. E mafai foʻi ona fesuisuiaʻi a tatou taulimaga ina ia eseese auala e tatou te talanoa ai i tagata. E mafai foʻi ona sui la tatou faasologa ina ia auai i le talaʻiga i le afiafi po o isi taimi e mautinoa e maua atu ai tagata i fale. E mafai foʻi ona tatou aʻoaʻoina se gagana fou ina ia mafai ai ona toʻatele nisi tatou te talanoa i ai i le tala lelei. E ono mafai foʻi ona faalautele la tatou faiva e ala i le avea ma paeonia sauatoa. E mafai foʻi ona tatou sifi atu i se vaipanoa e lē toʻatele se ʻaugalulue i le seleselega o iai. A iā i tatou se vaaiga saʻo i le seleselega, o le a tatou taumafai malosi la e auai atoatoa i le mea sili tatou te mafai i lenei galuega tāua.
7. E faaauau pea ona tatou galulue i le galuega o le aoaoina mai seʻia oo afea?
7 E faatapulaa le taimi e aoaoina pe e tau ai e faifaatoʻaga fua o a latou faatoʻaga po o se fuata o iai, o lona uiga e lē mālōlō pe faifai mālie seʻiloga lava ua māeʻa le galuega. O le uiga faanatinati lava lenā e manaʻomia foʻi i le seleselega faaleagaga. E faaauau pea la ona tatou galulue i le galuega o le aoaoina mai seʻia oo afea? E faaauau ai lava i “le taufaaiʻuiʻuga o le faiga o mea a le lalolagi” ma seʻia oo i “le iʻuga.” (Mata. 24:14; 28:20) I le pei o le Faifeʻau sili a Ieova, tatou te mananaʻo e faaiʻuina le galuega ua faatuatuaina mai iā i tatou. (Ioa. 4:34; 17:4) Seʻi o tatou taumafai nei loa e faaauau ma le maelega, ma le olioli, i la tatou faiva, ma se uiga mautinoa seʻia oo i le iʻuga. (Mata. 24:13) O loo faaauau pea le seleselega!
[Faamatalaga faaopoopo i le itulau 2]
Mai le amataga seʻia oo i le faaiʻuga o se seleselega, o se taimi o gaoioiga faanatinati